ກົມອຸຕຸນິຍົມ ແລະ ອຸທົກກະສາດ ໄດ້ແຈ້ງການ ພ້ອມທັງລາຍງານສະພາບອາກາດປະຈໍາວັນທີ 1 ກັນຍາ 2019 ໂດຍໄດ້ລະບຸວ່າ:
ພາຍຸດີເປຼ່ຊັນໄດ້ກໍ່ຕົວຢູ່ໃກ້ເຂດພາກເໜືອດ້ານຕາເວັນຕົກຂອງປະເທດຟິລິປິນ ຊຶ່ງໃນເວລາ 7 ໂມງເຊົ້າມື້ນີ້ ມີຈຸດໃຈກາງຢູ່ເສັ້ນຂະໜານທີ 19 ອົງສາເໜືອ ແລະ ເສັ້ນແວງທີ 117.3 ອົງສາຕາເວັນອອກ ພວມເຄື່ອນທີ່ໄປຫາເກາະໄຮນໍາດ້ວຍຄວາມໄວ 25 ກິໂລແມັດຕໍ່ຊົ່ວໂມງ ແລະ ຈະເພີ່ມກຳລັງແຮງຂຶ້ນເປັນພາຍຸໝຸນເຂດຮ້ອນໃນໄລຍະວັນທີ 2 – 6 ກັນຍາ 2019 ນີ້ ແລະ ສືບຕໍ່ເຄື່ອນທີ່ລຽບໃກ້ແຄມຝັ່ງປະເທດ ສສ ຫວຽດນາມ
ຊຶ່ງລັດສະໝີຂອງພາຍຸຫົວນີ້ຈະກວມເອົາເຂດພາກກາງ ແລະ ພາກໃຕ້ຂອງປະເທດລາວ ແລະ ຈະເຮັດໃຫ້ມີຝົນຕົກໃນລະດັບປານກາງ ຫາ ຕົກໜັກຢູ່ບັນບໍລິເວນກ້ວາງ ແລະ ຕົກໜັກຫຼາຍແຕ່ເຂດແຂວງຄຳມ່ວນ ລົງຫາ ພາກໃຕ້ ພ້ອມມີລົມພັດແຮງເປັນບາງໄລຍະ.
ດັ່ງນັ້ນ, ຈຶ່ງຂໍແຈ້ງເຕືອນເຖິງອຳນາດການປົກຄອງທຸກພາກສ່ວນ ແລະ ພໍ່ແມ່ປະຊາຊົນທີ່ອາໃສໃນເຂດພາກກາງ ແລະ ພາກໃຕ້ ໃຫ້ສືບຕໍ່ກຽມພ້ອມຮັບມືກັບສະພາບນໍ້າຖ້ວມຍື່ງ ແລະ ລົມພັດແຮງ ທີ່ອາດຈະເກີດຂຶ້ນໃນໄລຍະວັນທີ 1 ຫາ 6 ກັນຍາ ນີ້ ພ້ອມທັງຍົກຍ້າຍວັດຖຸສິງຂອງທີ່ມີຄ່າ ແລະ ສັດລ້ຽງໄປໄວ້ບ່ອນທີ່ປອດໄພ. ຂໍໃຫ້ຕິດຕາມການລາຍງານສະພາບອາກາດຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.
Hits: 3
