ຜາທໍ່ໜໍ່ຄໍາຖືວ່າເປັນອີກສະຖານທີ່ທ່ອງທ່ຽວທາງທໍາມະຊາດ ແຫ່ງໜຶ່ງທີ່ມີທິວທັດທໍາມະຊາດອ້ອມຂ້າງສວຍ ງາມເຕັມໄປດ້ວຍຕົ້ນໄມ້ນ້ອຍ-ໃຫຍ່ຂຽວສົດໃສນາໆຊະນິດປົກຄຸມພື້ນທີ່, ຕົວຜາມີລັກສະນະແປກປະຫຼາດບໍ່ເໝືອນບ່ອນອື່ນ, ນັບວ່າເປັນແຫຼ່ງທ່ອງທ່ຽວທີ່ມະຫັດສະຈັນ, ລຶກລັບໜ້າຄົ້ນຫາ.
ແຫຼ່ງທ່ອງທ່ຽວທີ່ວ່ານີ້ຕັ້ງຢູ່ ບ້ານນາທົ່ວ ເມືອງເຟືອງ ແຂວງ ວຽງຈັນ, ຫ່າງຈາກເທສະບານເມືອງປະມານ 3,5 ກິໂລແມັດ,ການເຂົ້າຫາສະຖານທີ່ທ່ອງທ່ຽວແມ່ນເດີນທາງດ້ວຍລົດ ຫຼື ຍ່າງ, ຜານີ້ຢູ່ຮ່ວມລະຫວ່າງຜາສອງອັນຕິດກັນເປັນຊັບສົມບັດອັນລ້ຳຄ່າ, ລຶກລັບ, ມະຫັດສະຈັນຄື: “ ໜໍ່ຄຳ “.
ສ່ວນລັກສະນະທົ່ວໄປຂອງພື້ນທີ່ຜາທໍ່ໜໍ່ຄໍາ ເປັນຜາຫີນປູນຕັ້ງໂດດດ່ຽວສະຫງ່າຢູ່ໃຈກາງເມືອງ, ມີຄວາມສູງຈາກລະດັບໜ້ານໍ້າທະເລປະມານ 700 ແມັດ, ເປັນເອກະລັກທີ່ບົ່ງບອກເຖິງຮູບຮ່າງສັນຖານຂອງເມືອງເຟືອງ ນອກຈາກ ເອກະລັກແລ້ວຜາທໍ່ຍັງໄດ້ເຊື່ອງຊ້ອນຄວາມລຶກລັບທີ່ຍັງບໍ່ມີໃຜທັນຮູ້, ໜ້າຜາທີ່ສູງຊັນນັ້ນຫາກເຮົາ ແນມຂຶ້ນໄປຈະເຫັນແສງປະກາຍຄໍາຢູ່ຫຼາຍຈຸດແຕ່ມີຈຸດໜຶ່ງຈຸດດຽວ ເທົ່ານັ້ນທີ່ເຫັນແສງນັ້ນເດັ່ນປະກາຍກວ່າຈຸດອື່ນໆ.
ປະຊາຊົນໃນພື້ນທີ່ເຊື່ອກັນວ່າແສງນັ້ນແມ່ນແສງ ຂອງຄໍາທີ່ມີຄຸນຄ່າມະຫາສານ, ພວກເຂົາເຈົ້າຮ້ອງຈຸດດັ່ງກ່າວວ່າ “ໜໍ່ຄໍາ” ຍ້ອນມີລັກສະນະເປັນ ທ່ອນກົມແຍກເປັນ 2 ຍອດເປັນທີ່ມາຂອງ “ຜາທໍ່ໜໍ່ຄໍາ” ມີຫຼາຍ ຄັ້ງທີ່ມີບາງກຸ່ມຄົນພະຍາມປີນ ໄຕ່ຂຶ້ນໄປເອົາໜໍ່ຄໍາແຕ່ຕ້ອງພົບກັບສິ່ງລຶກລັບ ຊຶ່ງນໍາມາແກ່ຄວາມຫາຍະນະ.
ຕາມຂໍ້ມູນລາຍງານຈາກພະແນກ ຖວທ ເມືອງເຟືອງຮູ້ວ່າ:
ສະຖານທີ່ທ່ອງທ່ຽວທີ່ຫຼາຍຄົນເຊື່ອກັນວ່າລຶກລັບແຫ່ງນີ້ແມ່ນຢູ່ໃນການຄຸ້ມຄອງຂອງບ້ານ ຊຶ່ງຂະນະນີ້ຍັງຢູ່ໃນຂັ້ນຕອນຍາດແຍ່ງ ທຶນເພື່ອມາພັດທະນາ ແລະເຖິງວ່າຈະບໍ່ທັນໄດ້ຮັບການປະກາດເປີດເປັນແຫຼ່ງທ່ອງທ່ຽວຢ່າງເປັນທາງການແຕ່ປະຈຸບັນສະຖານທີ່ດັ່ງກ່າວ ກໍໄດ້ມີນັກທ່ອງທ່ຽວທັງພາຍໃນ ແລະຕ່າງປະເທດໃຫ້ ຄວາມສົນໃຈໄປທ່ຽວຊົມເປັນຈໍານວນຫຼວງຫຼາຍໃນແຕ່ລະວັນໂດຍສະເພາະວັນບຸນເທສະການຕ່າງໆ.
