ປ່າສະຫງວນແຫ່ງຊາດນໍ້າຫ້າ ຕັ້ງຢູ່ພາກຕາເວັນຕົກຂອງ ເມືອງຫລວງນໍ້າທາ, ທິດຕາເວັນອອກຂອງເມືອງສິງ ແລະ ທິດເໜືອຂອງເມືອງວຽງພູຄາ ແຂວງຫລວງນໍ້າທາ. ມີເນື້ອທີ່ກວ້າງຂວາງເຖິງ 222.000 ກວ່າເຮັກຕາ ແລະ ຢູ່ຫ່າງຈາກເທດສະບານ ປະມານ 26 ກິໂລແມັດ. ເປັນສະຖານທີ່ທ່ອງທ່ຽວທີ່ມີຊື່ສຽງລືຊື່ ທາງດ້ານທໍາມະຊາດອັນສວຍສົດງົດງາມ ແລະ ໂດດເດັ່ນທີ່ສຸດ ຖືກຂະໜານນາມວ່າເປັນມໍລະດົກອາຊຽນ ຍ້ອນຄວາມອຸດົມສົມບູນ ທາງດ້ານປ່າໄມ້ ແລະ ຊີວະນາໆພັນ.
ປ່າສະຫງວນແຫ່ງຊາດນໍ້າຫ້າ ຖືກແບ່ງເປັນ 3 ເຂດ ຄື: ເຂດຫວງຫ້າມ, ເຂດນຳໃຊ້ເພື່ອການເກັບກູ້ເຄື່ອງປ່າຂອງດົງ ແລະ ເຂດເຮັດກະສິກຳ. ມີປະຊາຊົນຫລາຍກວ່າ 100 ຄອບຄົວ ທີ່ດໍາລົງຊີວິດຢູ່ບໍລິເວນປ່າສະຫງວນ. ໃນປີ 1999 ອົງການທ່ອງທ່ຽວແຫ່ງຊາດ ໄດ້ສົມທົບກັບຫ້ອງການທ່ອງທ່ຽວ ແຂວງຫລວງນ້ຳທາ, ໂດຍໄດ້ຮັບການສະໜັບສະໜູນ ທຶນຊ່ວຍ ເຫລືອລ້າ ຈາກປະເທດນິວຊີແລນ ເຂົ້າມາພັດທະນາການທ່ອງທ່ຽວ ແບບອະນຸຮັກໂດຍໃຫ້ປະຊາຊົນມີສ່ວນຮ່ວມ.
ສັດປ່າທີ່ຫາຍາກ 22 ສາຍພັນ, ມີນົກ 288 ສາຍພັນ. ມີລາຍການທ່ອງທ່ຽວທໍາມະຊາດ ແລະ ວັດທະນະນທໍາ ລາຍການຍ່າງປ່າຊົມຄວາມງາມຂອງທໍາມະຊາດ ຊົມສັດປ່າ, ລ່ອງເຮືອຢາງ, ທ່ຽວບ້ານປະຊາຊົນເພື່ອສຶກສາ ແລະ ຮຽນຮູ້ວິຖີຊີວິດດ້ານວັດທະນະທໍາ.
ໂຄງການດັ່ງກ່າວ, ໄດ້ເຮັດໃຫ້ຊຸມຊົນໄດ້ຮັບຜົນປະໂຫຍດ, ປະຊາຊົນ ມີວຽກເຮັດງານທໍາ ມີລາຍຮັບດີຂຶ້ນ. ພ້ອມນັ້ນຍັງການປົກປັກຮັກສາສິ່ງແວດລ້ອມ ຊ່ວຍຫລຸດຜ່ອນການຖາງປ່າເຮັດໄຮ່ ແລະ ອະນຸລັກຮັກສາຮີດຄອງປະເພນີອັນດີງາມ ໃຫ້ຍືນຍົງຄົງຕົວໄວ້ ໃຫ້ຄົນຮຸ່ນຫລັງໄດ້ສືບທອດ
ຂໍ້ມູນ ແລະ ຮູບພາບ: ຂ່າວສານປະເທດລາວ, Luangnamtha Touris
Hits: 55
