ເຖິງວ່າໂປຣຕີນຈາກພືດຈະຂາດກົດອາມິໂນຈໍາເປັນບາງຊະນິດ ແຕ່ຖ້າປະສົມປະສານກັນແລ້ວກໍສາມາດໃຫ້ກົດອາມິໂນທີ່ຄົບຖ້ວນໄດ້ເຊັ່ນດຽວກັນກັບໂປຣຕີນຈາກສັດ. ສະນັ້ນ ການກິນມັງສະວິລັດຄວນກິນໃຫ້ຄົບ 5 ໝູ່ ຈື່ງຈະເປັນຜົນດີຕໍ່ສຸຂະພາບ. ບໍ່ຄວນກິນແຕ່ສິ່ງທີ່ມັກ ຫຼື ແຊບເທົ່ານັ້ນ.
ຄາໂບໄຮເດດ ແຫຼ່ງອາຫານທີ່ພົບໄດ້ແກ່ ເຂົ້າຂັດສີ, ເຂົ້າປຸ້ນ ແລະ ອາຫານທີ່ເຮັດມາຈາກແປ້ງ ເຊິ່ງຄວນເລືອກກິນໃນປະລິມານທີ່ເໝາະສົມ ເພາະມີປະລິມານກາກໃຍສູງທີ່ມີປະໂຫຍດຕໍ່ລະບົບຂັບຖ່າຍ ແລະ ຊ່ວຍດູດຊຶມນໍ້າມັນສ່ວນເກີນທີ່ກິນເຂົ້າໄປອີກດ້ວຍ.
ໂປຣຕີນ ການດື່ມນົມ ຫຼື ກິນໄຂ່ ຈະຊ່ວຍໃຫ້ຮ່າງກາຍໄດ້ຮັບໂປຣຕີນຢ່າງດີ ແຕ່ຜູ້ທີ່ກິນມັງສະວິລັດແບບເຄັ່ງຄັດຈະຮັບປະທານບໍ່ໄດ້ເລີຍ ແຕ່ສາມາດທົດແທນໄດ້ດ້ວຍຖົ່ວປະເພດຕ່າງໆ ເຊັ່ນ: ຖົ່ວເຫຼືອງ, ຖົ່ວດໍາ,ເຕົ້າຮູ້ແຜ່ນ, ນໍ້າເຕົ້າຮູ້ ແລະ ອື່ນໆ ໂດຍຮັບປະທານຄາບລະຫຼາຍໆຊະນິດ ເພື່ອໃຫ້ຮ່າງກາຍໄດ້ຮັບໃນປະລິມານທີ່ພຽງພໍ
ວິຕາມີນ ແລະ ເກືອແຮ່ ມີຫຼາຍໃນໝາກໄມ້ ຜັກໃບຂຽວ ແລະ ອື່ນໆ ຜູ້ທີ່ກິນມັງສະວິລັດຕ້ອງກິນໃຫ້ຫຼາຍກວ່າຄົນກິນປົກກະຕິ ເພື່ອປ້ອງກັນບໍ່ໃຫ້ຂາດວິຕາມິນບີສອງ ແລະ ສໍາລັບໄອໂອດີນແມ່ນມີຫຼາຍໃນອາຫານທະເລ ຜູ້ທີ່ກິນມັງສະວິລັດຄວນໃສ່ເກືອອະນາໄມຂະນະທີ່ປຸງອາຫານເພື່ອທົດແທນໄປໃນໂຕ ສ່ວນທາດເຫຼັກຈະມີຫຼາຍໃນໝາກໄມ້ອົບແຫ້ງ ຜັກກາດນາ ແລະ ຜັກກູດ ເຊິ່ງຄວນຫາມາກິນຕະຫຼອດເພື່ອໃຫ້ພຽງພໍກັບຄວາມຕ້ອງການຂອງຮ່າງກາຍ.
ໄຂມັນ ຮ່າງກາຍຈະໄດ້ຈາກນໍ້າມັນພືດທີ່ນໍາມາປະກອບອາຫານ ເຊັ່ນ: ນໍ້າມັນຖົ່ວເຫຼືອງ ງາ ແລະ ເມັດໝາກອຶ ເປັນຕົ້ນ. ຄວນລະວັງບໍ່ໃຫ້ກິນນໍ້າມັນຫຼາຍເກີນໄປ ເພາະອາດຈະເຮັດໃຫ້ຄວາມດັນສະສົມໄດ້.
ສະນັ້ນ ເດັກນ້ອຍ ຜູ້ຍິງຖືພາ ແລະ ແມ່ທີ່ໃຫ້ນົມລູກ ທີ່ກິນມັງສະວິລັດ ຄວນເລືອກກິນໃນແບບທີ່ສາມ(ທີ່ສາມາດກິນນົມ ໄຂ່ ແລະ ປານ້ອຍໄດ້) ເນື່ອງຈາກຮ່າງກາຍຂອງຄົນກຸ່ມນີ້ຕ້ອງການ ເຄຊຽມ ວິຕາມີນເອ ວິຕາມີນບີສອງ ແລະ ບີສີບສອງ ຫຼາຍກວ່າກຸ່ມອື່ນໆ.
ຂໍ້ມູນ: ທ່ານ ນາງ ອາຈານ ສັນລະຍາ ຄົງສົມບູນເວດ ຜູ້ຊ່ຽວຊານດ້ານໂພສະນາການ
Hits: 3
