ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ (ນວ) ພ້ອມດ້ວຍຄະນະ ລົງເຄື່ອນໄຫວຊຸກຍູ້ການຜະລິດລະດູແລ້ງ ແລະ ການລວມກຸ່ມຜະລິດກະສິກຳອິນຊີ ທີ່ບ້ານໂນນແຕ້ ເມືອງໄຊທານີ ໂດຍການຕ້ອນຮັບຂອງທ່ານ ຄຳປະດິດ ເຂັມມານິດ ເຈົ້າເມືອງໄຊທານີ ມີທ່ານ ພວງປາຣິສັກ ປຣະວົງວຽງຄຳ ຮອງລັດຖະມົນຕີ ກະຊວງກະສິກຳ ແລະ ປ່າໄມ້ ພະແນກການກ່ຽວຂ້ອງ ຫົວໜ້າກຸ່ມ ອຳນາດການປົກຄອງບ້ານ ກຸ່ມຜະລິດກະສິກຳອິນຊີ ແລະ ຊາວສວນເຂົ້າຮ່ວມ.
ປີ 2020 ໃຫ້ຮູ້ວ່າ:
ປີ 2019 ນວ ປັກດຳເຂົ້າໄດ້ທັງໝົດ 66.279 ເຮັກຕາ ເທົ່າກັບ 97% ຂອງເນື້ອທີ່ການຜະລິດທັງໝົດ ຄາດວ່າຈະສາມາດສະໜອງເຂົ້າໄດ້ 302.565 ໂຕນ ທຽບໃສ່ແຜນການສະໜອງເຂົ້າໄດ້ 94,7% ຂອງແຜນການ 319.400 ໂຕນຕໍ່ປີ ສະເລ່ຍໃສ່ຫົວຄົນໄດ້ 287 ກິໂລຕໍ່ປີ ຖ້າທຽບໃສ່ແຜນການບໍລິໂພກ 250 ກິໂລຕໍ່ຄົນຕໍ່ປີ ຈະມີເຂົ້າເຫຼືອແຮໄວ້ ແລະ ຈໍລະຈອນຕະຫຼາດ ປະມານ 55.100 ໂຕນ ການປູກພືດຜັກ ປະຕິບັດໄດ້ 112.788 ໂຕນ ທຽບໃສ່ແຜນການປະຕິບັດໄດ້ 99% ຂອງແຜນການ ສະເລ່ຍໃສ່ຫົວຄົນໄດ້ 91 ກິໂລຕໍ່ປີ ທຽບໃສ່ແຜນການທີ່ວາງໄວ້ 90 ກິໂລຕໍ່ຄົນຕໍ່ປີ ເຫັນວ່າປະຕິບັດໄດ້ 101%
ການຜະລິດໄມ້ໃຫ້ໝາກ ປະຕິບັດໄດ້ 26.433 ໂຕນ ທຽບໃສ່ແຜນການປະຕິບັດໄດ້ 12.455 ໂຕນຕໍ່ປີ ສະເລ່ຍໃສ່ຫົວຄົນໄດ້ 21 ກິໂລຕໍ່ປີ ຖ້າທຽບໃສ່ແຜນການບໍລິໂພກທີ່ວາງໄວ້ 50 ກິໂລຕໍ່ຄົນຕໍ່ປີ ເຫັນວ່າປະຕິບັດໄດ້ 42% ການປູກພືດອຸດສາຫະກຳ ປະຕິບັດໄດ້ 4.451 ເຮັກຕາ ເຫັນວ່າປະຕິບັດໄດ້ລື່ນແຜນການ 2,7 ເທົ່າ ເນື້ອທີ່ແຜນການຜົນຜະລິດລວມ 60.824 ໂຕນ ນອກນັ້ນ ຍັງມີເນື້ອທີ່ສວນຢາງພາລາ 5.764 ເຮັກຕາ ສາມາດກີດຢາງໄດ້ແລ້ວ 3.670 ເຮັກຕາ ຜົນຜະລິດຢາງກ້ອນ 16.513 ໂຕນຕໍ່ປີ ການຜະລິດທາດຊີ້ນ ປາ ສາມາດປະຕິບັດໄດ້ 60.728,39 ໂຕນ ເທົ່າກັບ 99,89% ຂອງແຜນການ ສະເລ່ຍໃສ່ຫົວຄົນໄດ້ 64,93 ກິໂລຕໍ່ປີ ທຽບໃສ່ແຜນການຫຼຸດຄາດໝາຍ 0,11% ແຕ່ສາມາດສົ່ງອອກທາດຊີ້ນໄປຕ່າງແຂວງ 1.692 ໂຕນ ອັນພົ້ນເດັ່ນກວ່າໝູ່ ແມ່ນໂຄງການປູກຜັກອິນຊີ ສາມາດຜະລິດຜັກອິນຊີໄດ້ 3.000 ໂຕນ
ໃນນັ້ນ ຂາຍໃນຕະຫຼາດນັດພືດຜັກອິນຊີ ປີ 2019 ໄດ້ 1.500 ກວ່າໂຕນ ມູນຄ່າການຂາຍປະມານ 7,6 ຕື້ກີບ ເຊິ່ງຂາຍຢູ່ 6 ຈຸດ ໄດ້ຊ່ວຍແກ້ໄຂຄວາມທຸກຍາກ ແລະ ສ້າງລາຍຮັບໃຫ້ຊາວກະສິກອນໄດ້ເປັນຢ່າງດີ ນອກນັ້ນ ຍັງມີບາງໂຄງການໄດ້ມາຟື້ນຟູຄືນ ເຊັ່ນ: ໂຄງການປູກມັນຕົ້ນ ປະຕິບັດໄດ້ 2.843 ເຮັກຕາ ເທົ່າກັບ 147% ໂຄງການປູກສາລີ ປະຕິບັດໄດ້ 799 ເຮັກຕາ ເທົ່າກັບ 80%.
ສັງລວມແລ້ວເຫັນວ່າ ມີການຜະລິດຕະພັນກະສິກຳສົ່ງອອກໄປຕ່າງປະເທດ ຄື:
ດ້ານການປູກຝັງໄດ້ສົ່ງອອກຕ່າງປະເທດ: ເຂົ້າ 241 ໂຕນ ມູນຄ່າ 196.701 ໂດລາສະຫາລັດ ຫຼື ປະມານ 1,73 ຕື້ກີບ ທາດແປ້ງ 19.548 ໂຕນ ມູນຄ່າ 2.435.524 ໂດລາ ຫຼື ປະມານ 21,47 ຕື້ກີບ ພືດອຸດສາຫະກຳ 32.741 ໂຕນ ມູນຄ່າ 7.072.958 ໂດລາ ຫຼື ປະມານ 62,36 ຕື້ກີບ ໄມ້ 20.521 ໂຕນ ມູນຄ່າ 1.503.950 ໂດລາ ຫຼື ປະມານ 13,26 ຕື້ກີບ ໝາກໄມ້-ພືດຜັກ 2.106 ໂຕນ ມູນຄ່າ 142.852 ໂດລາ ຫຼື ປະມານ 1,25 ຕື້ກີບ ເຄື່ອງປ່າຂອງດົງ 144 ໂຕນ ມູນຄ່າ 183.397 ໂດລາ ຫຼື ປະມານ 1,61 ຕື້ກີບ ລວມທັງໝົດ 75.301 ໂຕນ
ລວມມູນຄ່າທັງໝົດ 11.535.382 ໂດລາ ຫຼື ປະມານ 101,76 ຕື້ກີບ ດ້ານການລ້ຽງສັດ ຄື: ຊີ້ນຄວາຍອົບແຫ້ງ 10 ໂຕນ ລວມມູນຄ່າ 937.500 ໂດລາ ຫຼື ປະມານ 8,27 ຕື້ກີບ ສັງລວມແລ້ວໄດ້ສົ່ງອອກຜະລິດຕະພັນກະສິກຳ ແລະ ປ່າໄມ້ ເປັນມູນຄ່າທັງໝົດ 16.626.618 ໂດລາ ຫຼື ປະມານ 146,67 ຕື້ກີບ.
ສຳລັບການຜະລິດກະສິກຳສະອາດ:
ປູກພືດຜັກອິນຊີ ເນື້ອທີ່ 279 ເຮັກຕາ ມີ 238 ຄອບຄົວ 11 ກຸ່ມ ການຜະລິດກວມເອົາ 6 ເມືອງ ຄື:
ເມືອງສີໂຄດຕະບອງ ນາຊາຍທອງ ໄຊທານີ ໄຊເສດຖາ ຫາດຊາຍຟອງ ແລະ ເມືອງປາກງື່ມ ຜະລິດສະມັດທະພາບສະເລ່ຍ 10,75 ໂຕນຕໍ່ເຮັກຕາ ຜົນຜະລິດ 3.000 ໂຕນຕໍ່ປີ ມີຕະຫຼາດຈຳໜ່າຍ 6 ຈຸດ ຄື: ຕະຫຼາດດົງນາໂຊກ ສູນການຄ້າ ລາວ-ໄອເຕັກ ຕະຫຼາດຫ້ວຍຫົງ ສູນການຄ້າວຽງຈັນເຊັນເຕີ ຕະຫຼາດບ້ານຊ້າງຄູ້ ແລະ ຕະຫຼາດຫຼັກ 8 ມູນຄ່າການຂາຍ 6 ຕື້ກວ່າກີບ.
ຫຼັງຈາກນັ້ນ ໄດ້ຮັບຟັງການໂອ້ລົມຂອງທ່ານເຈົ້າຄອງ ນວ ເຊິ່ງທ່ານໄດ້ສະເໜີໃຫ້ເອົາໃຈໃສ່ ຊຸກຍູ້ການຜະລິດກະສິກຳໃຫ້ເປັນລັກສະນະຮູບປະທຳ ໂດຍສຸມໃສ່ການຜະລິດລະດູແລ້ງ ເພື່ອສະໜອງໃຫ້ຂົງເຂດທີ່ໄດ້ຮັບຜົນກະທົບເພື່ອຄ້ຳປະກັນທາງດ້ານສະບຽງອາຫານ ແລະ ເນັ້ນໃສ່ການຜະລິດກະສິກຳສະອາດ ສີຂຽວ ໃຫ້ຂະແໜງການທີ່ກ່ຽວຂ້ອງສືບຕໍ່ແກ້ໄຂລະບົບຊົນລະປະທານ ເພື່ອສະໜອງນ້ຳໃຫ້ແກ່ການຜະລິດທັນກັບເວລາ ໂດຍສະເພາະ ລະດູແລ້ງ ສົກປີ 2019-2020.
ແຫຼ່ງຂໍ້ມູນ: ໜັງສືພິມວຽງຈັນໃໝ່