ແຜນການຈະໃຫ້ສຳເລັດ ແລະເປີດໃຫ້ບໍລິການພໍ່ແມ່ປະຊາຊົນລາວຢ່າງເປັນທາງການໃນປີ 2020 ຂອງໂຄງການ ກໍ່ສ້າງໂຮງໝໍກະເສມຣາດອິນເຕີເນຊັ່ນເນວ ວຽງຈັນ ອາດເປັນໄປໄດ້ຍາກເນື່ອງຈາກວຽກງານການກໍ່ສ້າງນັບແຕ່ມື້ເລີ່ມລົງມືປະຕິບັດມາຮອດຂະນະນີ້ເປັນເວລາປີກວ່າໜ້າວຽກໂດຍລວມພວມໄດ້ພຽງ 35% ທັງນີ້ຄະນະອຳ ນວຍການໂຮງໝໍເປີດເຜີຍວ່າຍ້ອນຂັ້ນຕອນດ້ານເອກະສານຂໍອະນຸຍາດນຳເຂົ້າອຸປະກອນຕ່າງໆ ນຳພາກລັດມີຄວາມຫຍຸ້ງຍາກຫຼ້າຊ້າຫຼາຍຈຶ່ງກາຍເປັນຕົ້ນເຫດເຮັດໃຫ້ໂຄງການດຳເນີນບໍ່ເປັນໄປຕາມແຜນການພ້ອມຮຽກຮ້ອງພາກລັດຈົ່ງຊ່ວຍແກ້ໄຂ.
ໂຮງໝໍກະເສມຣາດ ອິນເຕີເນຊັ່ນເນວ ວຽງຈັນ ເປັນໂຄງການຮ່ວມມືກັນລະຫວ່າງ ບໍລິສັດ ບາງກອກເຊັນ ຮັອດປີໂຕມະຫາຊົນ ຈໍາກັດ (ປະເທດໄທ) ແລະນັກທຸລະກິດຊາວລາວໂຮງໝໍດັ່ງກ່າວສ້າງຂຶ້ນເທິງພື້ນທີ່ 1,92 ເຮັກຕາ ທີ່ບ້ານດອນນົກຄຸ້ມ ເມືອງສີສັດຕະນາກ ນະຄອນຫຼວງວຽງຈັນ (ເສັ້ນທາງຕັດໃໝ່ດອນນົກຄຸ້ມ-ເສັ້ນທາງກໍາແພງເມືອງ) ຈະສ້າງໃຫ້ມີຫ້ອງກວດຈໍານວນ 38 ຫ້ອງ ແລະ254 ຕຽງ ໃຊ້ທຶນຈົດທະບຽນ 120 ຕື້ກີບ ຫຼື ປະມານ 15 ລ້ານໂດລາ ມູນຄ່າການລົງທຶນປະມານ70 ລ້ານໂດລາ ການກໍ່ສ້າງໃນໄລຍະທຳອິດຄາດວ່າຈະໃຫ້ສໍາເລັດ ແລະເປີດບໍລິການໄດ້ ໃນປີ 2020 ຊຶ່ງຈະມີ 110 ຕຽງ ລວມທັງຫ້ອງມາດຕະຖານທົ່ວໄປ, ພິເສດ ແລະຫ້ອງມໍລະສຸມ.
ບໍລິສັດຜູ້ລົງທຶນມີຄວາມມຸ່ງໝັ້ນທີ່ຈະຖ່າຍທອດເຕັກໂນໂລຊີດ້ວຍມາດຕະຖານລະດັບສາກົນ, ລະບົບບໍລິການຈັດການໂຮງໝໍ, ມີເຄື່ອງມື ແລະອຸປະກອນການແພດທີ່ທັນ ສະໄໝພ້ອມມີບຸກຄະລາກອນການແພດທີ່ຊ່ຽວຊານສະເພາະດ້ານເພື່ອເຮັດໃຫ້ໂຮງໝໍດັ່ງກ່າວກາຍເປັນໂຮງໝໍທີ່ດີທີ່ສຸດໃນລາວ.
ຢ່າງໃດກໍຕາມນັບແຕ່ມື້ລົງມືກໍ່ສ້າງໃນວັນທີ 25 ພຶດສະພາ 2018 ມາຮອດປະຈຸບັນໜ້າວຽກໂດຍລວມພວມສະເລ່ຍຄວາມສຳເລັດໄດ້ພຽງ 35% ທັງນີ້ທ່ານ ນາງ ວາລີ ເວດສະພົງ ຮອງຜູ້ອໍານວຍການໂຮງໝໍກະເສມຣາດອິນເຕີເນຊັ່ນເນວວຽງຈັນ ເປີດເຜີຍຕໍ່ຕີມຂ່າວພວກເຮົາວ່າ: ຄວາມຫຼ້າຊ້າແມ່ນມີສາເຫດມາຈາກການນຳເຂົ້າບັນດາອຸປະກອນເພື່ອຕິດຕັ້ງລະບົບຕ່າງໆພາຍໃນໂຮງໝໍຈຳນວນລວມ 600 ກວ່າລາຍການແມ່ນມີຄວາມຫຍຸ້ງຍາກຊັກຊ້າໃນດ້ານການແລ່ນເອກະສານ(ຜ່ານຂະແໜງການໜຶ່ງກໍຍັງອີກຂະແໜງການອື່ນແລ່ນໄປ-ມາບໍ່ກ້າຕັດສິນບັນຫາທັງທີ່ແມ່ນພາລະບົດບາດທີ່ສາມາດເຮັດໄດ້) ເພາະແຕ່ລະວຽກກໍ່ສ້າງຂອງໂຮງໝໍແມ່ນມີຄວາມກ່ຽວພັນກັນໝົດ ຖ້າວຽກໜຶ່ງຫຼ້າຊ້າອີກວຽກໜຶ່ງກໍຈະດຳເນີນການໄປຕໍ່ບໍ່ໄດ້ເຊັ່ນດຽວກັນ.
ຊຶ່ງກາຍເປັນບັນຫາຕົ້ນຕໍຖ່ວງດຶງໜ້າວຽກກໍຄືແກ່ເວລາຍາວນານເປັນການເພີ່ມຕົ້ນທຶນ ແລະຄ່າໃຊ້ຈ່າຍຂອງໂຄງການໃຫ້ຫຼາຍຂຶ້ນອີກພ້ອມດຽວກັນນັ້ນໂຄງການນີ້ກໍເປັນການຮ່ວມມືກັບຕ່າງປະເທດກໍຈະສົ່ງຜົນໂດຍກົງຕໍ່ຄວາມໜ້າເຊື່ອຖືຂອງນັກລົງທຶນຕ່າງຊາດຕໍ່ລາວໄດ້.
ແນວໃດກໍດີ ທ່ານ ນາງ ວາລີ ເວດສະ ພົງ ໄດ້ຮຽກຮ້ອງມາຍັງລັດຖະບານໂດຍສະເພາະບາງຂະແໜງການທີ່ກ່ຽວຂ້ອງຈົ່ງໄດ້ເພີ່ມຄວາມໃຈໃສ່ ແລະປັບປຸງກົນໄກປະສານງານລະຫວ່າງອົງກອນລັດດ້ວຍກັນໃຫ້ເປັນທີມດຽວກັນເພື່ອເຮັດໃຫ້ພາກປະຕິບັດຕົວຈິງ ແລະຂໍ້ກຳນົດໃນລະບຽບກົດໝາຍຖືກດຳເນີນໄປຢ່າງສອດຄ່ອງກົມກຽວກັນພ້ອມດຽວກັນນັ້ນກໍຕ້ອງມີການຕິດຕາມກວດກາຄືນການເຮັດວຽກງານຂອງແຕ່ລະຂະແໜງການທັງນີ້ກໍເພື່ອສ້າງຄວາມສະດວກວ່ອງໄວໃນການບໍລິການນັກລົງທຶນຈຶ່ງຈະສົມກັບການບໍລິການຜ່ານປະຕູດຽວໄດ້ທີ່ຈະປະກອບສ່ວນອັນສໍາຄັນໃນການຊ່ວຍດຶງດູດການລົງທຶນຈາກຕ່າງປະເທດໃຫ້ເຂົ້າມາລາວນັບມື້ນັບຫຼາຍຂຶ້ນໃນອະນາຄົດໄດ້.
ແຫຼ່ງຂໍ້ມູນ: ໜັງສືພິມເສດຖະກິດ-ສັງຄົມ