ກອງປະຊຸມກອງເລຂານຸ ການຄະນະກຳມະການຮ່ວມມື ຮັກສາຄວາມສະຫງົບຮຽບຮ້ອຍ ຕາມຊາຍແດນທົ່ວໄປ ລາວ-ໄທ, ໄທ-ລາວ ຄັ້ງທີ 26 ໄດ້ຈັດຂຶ້ນຢູ່ທີ່ ນະຄອນໄກສອນ ພົມວິຫານ, ແຂວງສະຫວັນນະເຂດ ສປປ ລາວ.
ໂດຍການເປັນປະທານ ຮ່ວມຝ່າຍລາວນຳໂດຍທ່ານພົນ ຈັດຕະວາ ສີພັນ ພຸດທະວົງ ຫົວ ໜ້າກົມທະຫານຊາຍແດນ, ກົມໃຫຍ່ເສນາທິການກອງທັບ ປະຊາຊົນລາວ, ເລຂານຸການຄະນະກຳມະການຮ່ວມມືຮັກສາຄວາມ ສະຫງົບຮຽບຮ້ອຍຕາມຊາຍແດນທົ່ວໄປ ລາວ-ໄທ, ຫົວໜ້າປະຕິບັດງານເພື່ອແກ້ໄຂບັນຫາຢາເສບຕິດຕາມຊາຍແດນ ລາວ-ໄທ, ຝ່າຍໄທ ນຳໂດຍທ່ານ ພົນໂທ ໄພໂຣດ ວິໄລສັກ ເຈົ້າກົມກິດຈະການຊາຍແດນທະຫານກອງບັນຊາການສູງສຸດກອງທັບໄທ, ເລຂານຸການຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍ ແດນທົ່ວໄປ ໄທ-ລາວ ຫົວໜ້າປະຕິບັດງານ ເພື່ອແກ້ໄຂບັນຫາຢາເສບຕິດຕາມຊາຍແດນໄທ-ລາວ, ມີບັນດາແຂກທີ່ຖືກເຊີນ.
ພ້ອມດ້ວຍພະນັກງານທີ່ກ່ຽວຂ້ອງທັງ ສອງຝ່າຍເຂົ້າຮ່ວມ.
ການຈັດກອງປະຊຸມໃນຄັ້ງ ນີ້ກໍເພື່ອເປັນການປຶກສາຫາລືແລກປ່ຽນຄໍາຄິດຄໍາເຫັນ, ຮ່າງບົດບັນທຶກກອງປະຊຸມ GBC ລາວ-ໄທຄັ້ງທີ 26 ຕາມເນື້ອໃນບົດບັນທຶກກອງປະຊຸມ GBC ລາວ-ໄທ ຄັ້ງທີ 25 ທີ່ຈັດຢູ່ ໃນນະຄອນ ຫຼວງບາງກອກຣາຊະອະນາຈັກໄທ ລະຫວ່າງ ວັນທີ 4-7 ທັນວາ 2018 ທີ່ຜ່ານມາ
ແລະ ພິຈາລະນາວາງທິດທາງ ແຜນການການຮ່ວມມືດ້ານ ຄວາມໝັ້ນຄົງ ແລະ ຄວາມສະຫງົບຮຽບຮ້ອຍຕາມບໍລິເວນ ຊາຍແດນ ລາວ-ໄທ ລວມທັງເປັນການກະກຽມຄວາມພ້ອມ, ປຶກສາຫາລືຮອບດ້ານໃຫ້ແກ່ໃນການຈັດກອງປະຊຸມຄະນະກຳມະການຮັກສາຄວາມສະຫງົບຮຽບຮ້ອຍ ຕາມຊາຍແດນທົ່ວໄປ ລາວ-ໄທ, ໄທ-ລາວ ຄັ້ງທີ 26 ໂດຍຝ່າຍ ລາວຮັບກຽດເປັນເຈົ້າພາບ ແລະ ຈະຈັດຢູ່ທີ່ນະຄອນຫຼວງວຽງ ຈັນ ສປປ ລາວ. ເຊິ່ງຜ່ານການປຶກສາຫາລືໃນຄັ້ງນີ້ພື້ນຖານ ສອງຝ່າຍເຫັນດີເປັນເອກະພາບ ຮ່າງເນື້ອໃນເພື່ອນຳໄປສະເໜີໃຫ້ ຂັ້ນເທິງຂອງຕົນຮັບຮອງ.
ປະທານທັງສອງຝ່າຍຍັງໄດ້ ເຊັນບົດບັນທຶກກອງປະຊຸມຮັບ ຮອງເອົາເນື້ອໃນຄວາມເຂົ້າໃຈ ໃນບັນດາໜ້າວຽກຕ່າງໆ ພ້ອມ ນຳໄປຜັນຂະຫຍາຍ ແລະ ປະຕິບັດ ໃຫ້ມີໝາກຜົນ.
ໂດຍ: ຈິດ ເພັດພູທອງ Lao people’s Army News