ທ່ານ ບຸນຂວາງ ຄຳບຸນເຮືອງ ຮອງລັດຖະມົນຕີ ກະຊວງກະສິກຳ ແລະ ປ່າໄມ້ ໄດ້ຮຽກຮ້ອງໃຫ້ຊາວກະສິກອນ ແລະ ກຸ່ມຜູ້ຜະລິດພືດ-ຜັກ ສຸມໃສ່ປັບປຸງຄຸນນະພາບການຜະລິດ ທີ່ສາມາດແຂ່ງຂັນທາງດ້ານປະລິມານ ແລະ ຄຸນນະພາບ, ມີຄວາມປອດໄພ ແລະ ສິ່ງສຳຄັນ ແມ່ນລາຄາທີ່ສາ ມາດແຂ່ງຂັນໃນລະດັບສາກົນ.
ເນື່ອງຈາກ ສປປ ລາວ ມີຂໍ້ໄດ້ປຽບຫລາຍດ້ານ ໃນການຜະລິດກະສິກຳສະອາດ ເພາະມີທ່າແຮງທາງດ້ານທຳມະຊາດ ເປັນຕົ້ນແມ່ນ ດິນ, ນໍ້າ ແລະ ສະພາບແວດລ້ອມ ທີ່ຍັງສະອາດ ແລະ ບໍລິສຸດ, ແຕ່ສິ່ງທ້າທ້າຍຂອງພວກເຮົາກໍຄື ເຮັດແນວໃດຈະຮັກສາສິ່ງທີ່ມີຢູ່ນີ້ໃຫ້ມີຄວາມໝັ້ນຄົງ ແລະ ຍືນຍົງ.
ທ່ານ ຮອງລັດຖະມົນຕີ ກະຊວງກະສິກຳ ແລະ ປ່າໄມ້ ກ່າວໃນກອງປະຊຸມປຶກສາຫາລື ແລະ ແລກປ່ຽນບົດຮຽນ ກ່ຽວກັບການພັດທະນາກະສິກຳອິນຊີລາວ ຄັ້ງທີ 7 ພາຍໃຕ້ຫົວຂໍ້ “ການພັດທະນາແບບສີຂຽວ: ຍຸດທະສາດແຫ່ງຊາດ ແລະ ຄວາມສາມາດແຂ່ງຂັນ ໃນລະດັບສາກົນ” ທີ່ນະຄອນຫລວງວຽງຈັນ
ໂດຍການເຂົ້າຮ່ວມຂອງ ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ທ່ານ ນາງ ມິໂຮະ ຊິໂຣໂຕຣິ ຜູ້ຕາງໜ້າຈາກອົງການແອນແທກ, ມີອົງການຈັດຕັ້ງສາກົນ ແລະ ຄູ່ຮ່ວມພັດທະນາ ເຂົ້າຮ່ວມ.
ທ່ານ ບຸນຂວາງ ຄຳບຸນເຮືອງ ໄດ້ຊີ້ໃຫ້ເຫັນວ່າ:
ເຖິງວ່າປະເທດເຮົາມີທ່າແຮງຫລາຍດ້ານ ແຕ່ພື້ນຖານວັດຖຸ-ເຕັກນິກການຜະລິດພັດຍັງອ່ອນນ້ອຍ, ການຜະລິດກະສິກຳຍັງເປັນຂະໜາດນ້ອຍ ແລະ ກະແຈກກະຈາຍ, ບໍ່ສາມາດແຂ່ງຂັນດ້ານປະລິມານ ແລະ ຄຸນນະພາບ ເຮັດໃຫ້ການຜະລິດເປັນສິນຄ້າຂອງລາວ ປະເຊີນໜ້າກັບອຸປະສັກ ແລະ ສິ່ງທ້າທາຍຫລາຍຢ່າງ.
ຢ່າງໃດກໍຕາມໃນສະພາບປັດຈຸບັນ, ຜູ້ບໍລິໂພກຢູ່ພາຍໃນ ແລະ ຕ່າງປະເທດ ໄດ້ມີຄວາມຮຽກຮ້ອງຕ້ອງການຜົນຜະລິດ ທີ່ມີຄຸນນະພາບ, ປອດໄພ ແລະ ການຜະລິດ ທີ່ເປັນມິດກັບສິ່ງແວດລ້ອມ ນັບມື້ນັບສູງຂຶ້ນ. ດັ່ງນັ້ນ, ຈຶ່ງມີຄວາມຈຳເປັນສຳລັບປະເທດເຮົາຕ້ອງໄດ້ຫັນປ່ຽນ ທັດສະນະການຜະລິດກະສິກຳ ໃຫ້ຕອບສະໜອງກັບຄວາມຕ້ອງການ ຂອງຜູ້ບໍລິໂພກ ກໍຄື ຕະຫລາດ
ໂດຍສະເພາະແມ່ນການຫັນຮູບແບບການຜະລິດ ເຂົ້າສູ່ລະບົບມາດຕະຖານ ເພື່ອຮອງຮັບກັບທ່າອ່ຽງຂອງສັງຄົມ, ທັງສາມາດເຊື່ອມໂຍງເຂົ້າກັບສາກົນ ແລະ ພາກພື້ນ. ໄລຍະຜ່ານມາ ສປປ ລາວ ໄດ້ມີການລິເລີ່ມການສົ່ງເສີມການຜະລິດກະສິກຳສະອາດໃນຫລາຍດ້ານ ເປັນຕົ້ນ ແມ່ນດ້ານນິຕິກຳ ແລະ ເຕັກນິກຕ່າງໆລົງສູ່ປະຊາຊົນ, ແຕ່ການພັດທະນາ ແລະ ການສົ່ງເສີມນັ້ນ ແມ່ນຍັງຢູ່ໃນຂອບເຂດຈຳກັດ ບໍ່ຂະຫຍາຍລົງສູ່ລວງກວ້າງ.
ໃນໂອກາດດຳເນີນກອງປະຊຸມຄັ້ງນີ້, ກະຊວງກະສິກຳ ແລະ ປ່າໄມ້ ໄດ້ຈັດງານວາງສະແດງກະ ສິກຳອິນຊີ ຢູ່ ອານຸສອນສະຖານເຈົ້າຟ້າງຸ່ມ, ໂດຍມີກຸ່ມຜູ້ຜະລິດ, ສະມາຄົມ, ສະຫະກອນ, ຜູ້ປະກອບການ, ບໍລິສັດ ແລະ ຜູ້ປະກອບການທັງໝົດ ຈຳນວນ 78 ຫົວໜ່ວຍເຂົ້າຮ່ວມ. ໃນນັ້ນ, ໄດ້ມີການວາງ ສະແດງດ້ານກະສິກຳອິນຊີ ຈຳນວນ 66 ຫົວໜ່ວຍ ແລະ ດ້ານກະສິກຳທີ່ດີ 02 ຫົວໜ່ວຍ, ຊຶ່ງຜົນຜະລິດ ແລະ ຜະລິດຕະພັນທີ່ນໍາມາວາງສະແດງໃນຄັ້ງນີ້ ປະກອບມີ ພືດຜັກ, ໝາກໄມ້, ເຂົ້າ, ຊາ, ກາເຟ ແລະ ຜະລິດຕະພັນປຸງແຕ່ງຈໍານວນໜຶ່ງ.
ແຫຼ່ງຂໍ້ມູນ: ຂ່າວ-ພາບ: ສຸກທະວີ , ສຳນັກຂ່າວສານປະເທດລາວ