ກະຊວງການເງິນ ຮ່ວມກັບ ກະຊວງແຜນການ ແລະ ການລົງທຶນ ປຶກສາຫາລືວຽກງານແຜນການ – ການເງິນ ປະຈໍາປີ 2019 ແລະ ປະກອບຄຳເຫັນໃສ່ຮ່າງແຜນປີ 2020 ກ່ອນຈະນໍາສະເໜີໃນກອງປະຊຸມລັດຖະບານເປີດກວ້າງທ້າຍປີນີ້ ເພື່ອປັບປຸງວຽກງານການລົງທຶນໃຫ້ມີການຫັນປ່ຽນຢ່າງມີຈຸດສຸມດ້ວຍຄຸນນະພາບໃໝ່ ພ້ອມທັງກ້າວສູ່ລະບົບການຄຸ້ມຄອງການເງິນແຫ່ງລັດຢ່າງເຂັ້ມແຂງ.
ດ້ານຮອງນາຍົກສະເໜີໃຫ້ຮ່ວມກັນແກ້ໄຂບັນດາໜີ້ສິນ ແລະ ການຊໍາລະໜີ້ໂຄງການລົງທຶນໃຫ້ໄປຕາມແຜນທີ່ສະພາຮັບຮອງ.
ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ ກ່າວບາງຕອນສໍາຄັນວ່າ:
ເຖິງວ່າເສດຖະກິດຈະເຕີບໂຕແຕ່ຍັງບໍ່ເປັນໄປຕາມແຜນທີ່ຕັ້ງໄວ້ ເນື່ອງຈາກໂຄງປະກອບເສດຖະກິດຫັນປ່ຽນຊ້າ, ການສົ່ງເສີມການຜະລິດຍັງບໍ່ທັນເຂັ້ມແຂງ ແລະ ສະມັດຖະພາບທາງການຜະລິດຍັງຕໍ່າ, ການສ້າງແຜນພັດທະນາຍັງບໍ່ທັນເຂົ້າສູ່ລວງເລິກ, ສະພາບ ຄວາມຝືດເຄືອງທາງດ້ານງົບປະມານທີ່ສະສົມມາຫຼາຍປີ; ສິ່ງສໍາຄັນໄປ ກວ່ານັ້ນແມ່ນການແກ້ໄຂບັນຫາໜີ້ສິນການລົງທຶນຂອງລັດຍັງມີຄວາມຊັກຊ້າ ບໍ່ທັນຕອບສະໜອງໄດ້ຕາມຄວາມຕ້ອງການຕົວຈິງຍ້ອນມີໜີ້ສິນສະສົມຫຼາຍ ແລະ ງົບປະມານຍັງຈໍາກັດ.
ທ່ານກ່າວຕື່ມວ່າ: ສໍາລັບໃນປີ 2020 ລັດຖະບານຈະຕ້ອງສູ້ຊົນເຮັດໃຫ້ ຈີດີພີ ຂະຫຍາຍຕົວ 6,5% ຂຶ້ນໄປ, ສ່ວນແຜນງົບປະມານປີ 2020 ແມ່ນຈະໄດ້ສືບຕໍ່ສູ້ຊົນເກັບລາຍຮັບໃຫ້ໄດ້ 28.997 ຕື້ກີບ ເທົ່າກັບ 16,13% ຂອງຈີດີພີ, ປະຕິບັດລາຍຈ່າຍທັງໝົດ 35.693 ຕື້ກີບ ເທົ່າກັບ 20,08% ຂອງຈີດີພີ, ການຂາດດຸນງົບປະມານ 3,77% ຂອງຈີດີພີ.
ສະນັ້ນ, ຂະແໜງແຜນການ ແລະ ການເງິນ ຈະຕ້ອງໄດ້ພ້ອມກັນປັບປຸງແກ້ໄຂໃຫ້ດີຂຶ້ນກວ່າເກົ່າ ເຊັ່ນ: ປັບປຸງກົນໄກ, ຂອດຂັ້ນ ແລະ ລະບຽບການທາງດ້ານການເງິນໃຫ້ຮັດກຸມກວ່າເກົ່າ ຈຶ່ງຈະສາມາດຟື້ນຕົວ ແລະ ເຂົ້າສູ່ສະພາບປົກກະຕິ; ການປັບປຸງຄວາມຍາກ – ງ່າຍໃນການດໍາເນີນທຸລະກິດ ແລະ ການລົງທຶນຍັງມີຄວາມຊັກຊ້າ ເຮັດໃຫ້ບໍ່ສາມາດດຶງດູດການລົງທຶນຂອງພາກເອກະຊົນທີ່ມີຄຸນນະພາບໄດ້ຕາມທ່າແຮງຕົວຈິງຂອງປະເທດ; ເລັ່ງແກ້ໄຂໜີ້ສິນໂຄງການລົງທຶນຂອງລັດຍັງມີ ຄວາມຊັກຊ້າ ແລະ ບໍ່ຕອບສະໜອງໄດ້ກັບຄວາມຕ້ອງການຕົວຈິງຍ້ອນມີໜີ້ສະສົມຫຼາຍ ແລະ ງົບປະມານຍັງຈໍາກັດ; ການພັດທະນາຊັບພະຍາກອນມະນຸດຍັງບໍ່ທັນຕອບສະໜອງກັບຄວາມຕ້ອງການຂອງໂຄງການໃຫຍ່ທີ່ມີສີມືແຮງງານຈຳເປັນຕ້ອງນໍາໃຊ້ແຮງງານຕ່າງປະເທດ.
ໂອກາດນີ້, ທ່ານ ກິແກ້ວ ຈັນທະບູຣີ ຮອງລັດຖະມົນຕີ ກະຊວງແຜນການ ແລະ ການລົງທຶນ ໄດ້ຂຶ້ນລາຍງານວ່າ: ລັດຖະບານໄດ້ກຳນົດຂອບການລົງທຶນລວມທັງໝົດປີ 2019 ປະມານ 26,80% ຂອງຈີດີພີ ຫຼື ປະມານ 44.347,30 ຕື້ກີບ; ຜ່ານການຈັດຕັ້ງປະຕິບັດສາມາດສັງລວມໄດ້ ດັ່ງນີ້:
ການລົງທຶນຂອງລັດ:
ມາຮອດຕົ້ນເດືອນພະຈິກ 2019 ການຊໍາລະຕົວຈິງ ປະມານ 2.214,72 ຕື້ກີບ ເທົ່າກັບ 50,80% ຂອງແຜນການປີ.
ທຶນຊ່ວຍເຫຼືອເພື່ອການພັດທະນາ ( ODA ):
ໃນໄລຍະ 9 ເດືອນຕົ້ນປີ 2019 ສາມາດປະຕິບັດໄດ້ 5.452,84 ຕື້ກີບ ລວມທັງໂຄງການສະເໜີໃໝ່ ແລະ ສືບຕໍ່ ເທົ່າກັບ 77% ຂອງແຜນການປີ.
ການລົງທຶນຂອງພາກເອກະຊົນພາຍໃນ ແລະ ຕ່າງປະເທດ:
ມີທັງໝົດຈໍານວນ 1.266 ໂຄງການ ມູນຄ່າ 2.307,91 ລ້ານໂດລາ ຫຼື ປະມານ 20.304,99 ຕື້ກີບເທົ່າກັບ 88,02% ( ມະຕິສະພາ 23.086,13 ຕື້ກີບ ).
ກອງປະຊຸມຄັ້ງນີ້ມີຂຶ້ນໃນວັນທີ 17 ທັນວາ 2019 ໂດຍການເປັນປະທານຮ່ວມຂອງ ທານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ; ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ.
ແຫຼ່ງຂໍ້ມູນ: ຂ່າວ: ສົມສະຫວິນ;ຮູບ: ສອນໄຊ, ເສດຖະກິດ-ການຄ້າ