ເຂົ້າຕົ້ມໃສ້ໝູ ຫວຽດນາມ ຄວາມແຊບທີ່ສົ່ງຕໍ່ຈາກຮຸ່ນສູ່ຮຸ່ນ ຖືໄດ້ວ່າເປັນອາຫານມຸງຄຸນທີ່ນິຍົມນຳເອົາມາໄຫວ້ບັນພະບຸລຸດ ສິ່ງສັກສິດ ແລະ ມອບເປັນຂອງຂວັນໃນຊ່ວງບຸນປີໃໝ່ຫວຽດນາມ ບຸນປີໃໝ່ຈີນ
ເຂົ້າຕົ້ມໃສ້ໝູ ທີ່ເຮັດເປັນຮູບຊົງ 4 ຫຼຽມ ແລະ ຊົງກະບອກ ໄດ້ບອກເລົ່າເລື່ອງລາວຂອງຊາວຫວຽດນາມທີ່ອົບພະຍົບມາຕັ້ງຖິ່ນຖານທີ່ປະເທດລາວ ຕັ້ງແຕ່ສະໄໝສົງຄາມ. ເຊິ່ງນິຍົມຫໍ່ ແລະ ຕົ້ມດ້ວຍຟືນເຕົາຖ່ານໃນແບບສະບັບບູຮານ.
ໃນເຂົ້າຕົ້ມຈະປະກອບໄປດ້ວຍ ເຂົ້າໜຽວ, ຖົ່ວຂຽວໜື້ງສຸກ, ຊີ້ນໝູທີ່ໝັກດ້ວຍເກືອ,ພິກໄທ ແລະ ຫອມແດງ. ຫໍ່ດ້ວຍໃບຕອງໃຫ້ແໜ້ນ ມັດດ້ວຍຕອກໄມ້ໄຜ່ ເພື່ອບໍ່ໃຫ້ນໍ້າເຂົ້າໄປໃນຫໍ່ເຂົ້າຕົ້ມ. ຫຼັງຈາກນັ້ນເອົາໄປຕົ້ມໃນໝໍ້ ໃຊ້ເວລາໃນການຕົ້ມປະມານ 6 ຊົ່ວໂມງ. ໄລຍະເວລາໃນການເກັບຮັກສາແມ່ນ 1 ອາທິດ ແລະ ຖ້າເອົາແຊ່ຕູ້ເຢັນໄວ້ ແມ່ນໄດ້ເປັນເດືອນ.
ໂດຍຊາວລາວເຊື້ອສາຍຫວຽດນາມ ແລະ ຊາວລາວເຊື້ອສາຍຈີນຈະນຳເອົາເຂົ້າຕົ້ມໄປໄຫວ້ບັນພະບຸລຸດ ແລະ ເປັນຂອງຝາກໃຫ້ພີ່ນ້ອງ ເພື່ອນມິດສະຫາຍ ທີ່ໄດ້ມາຢ້ຽມຍາມໃນຊ່ວງເທດສະການນີ້.
ທັງນີ້, ຄົນລາວເຊື້ອສາຍຫວຽດນາມ-ຈີນ ສະໄໝກ່ອນຍັງມີຄວາມເຊື່ອວ່າ: ການຫໍ່ເຂົ້າເອງ ໃນຊ່ວງເທດສະການປີໃໝ່ ແມ່ນການສ້າງກິດຈະກໍາພາຍໃນຄອບຄົວ ຍາດພີ່ນ້ອງໃຫ້ມີຄວາມສາມັກຄີກັນ ຮັກແພງເຊິ່ງກັນແລະກັນ ໜຽວແໜ້ນຄືກັບເຂົ້າຕົ້ມມັດດ້ວຍຕອກໄມ້ໄຜ່
Hits: 37
