ຫຼັງຈາກລັດຖະບານໄດ້ອອກປະກາດຫ້າມບໍ່ໃຫ້ມີການກັກຕຸນສິນຄ້າ ແລະ ອຸປະກອນການແພດທີ່ກ່ຽວຂ້ອງກັບການປ້ອງກັນໄວຣັສໂຄໂຣນາສາຍພັນໃໝ່ ມື້ນີ້ທີມງານອິນໄຊລາວຈຶ່ງໄດ້ລົງສໍາຫຼວດຮ້ານຂາຍຢາລາຍໃຫ່ຍຢູ່ນະຄອນຫຼວງວຽງຈັນ, ຄືຮ້ານຂາຍຢາໜູເຜືອກ ຂ້າງໂຮງໝໍມະໂຫສົດ ແລະ ຮ້ານຂາຍຢາໃສສະອາດ ບໍລິເວນໂຮງໝໍ 103, ໂດຍພະນັກງານຂາຍໄດ້ບອກເປັນສຽງດຽວກັນວ່າ ສິນຄ້າແມ່ນຂາດຕະຫຼາດມາໄດ້ປະມານ 2 ອາທິດແລ້ວ ແລະ ຍັງບໍ່ຮູ້ວ່າສິນຄ້າງວດໃໝ່ຈະເຂົ້າມາມື້ໃດ
ທັງນີ້, ກ່ອນສິນຄ້າຈະຂາດຕະຫຼາດ ຍັງບໍ່ມີການຂຶ້ນລາຄາແຕ່ຢ່າງໃດ ໂດຍສາເຫດທີ່ສິນຄ້າຂາດຕະຫຼາດແມ່ນ ເນື່ອງຈາກວ່າປະຊາຊົນຜູ້ຊື້ໜ້າກາກອະນາໄມ ທັງຄົນລາວ ແລະ ຄົນຕ່າງປະເທດ ສ່ວນຫຼາຍແມ່ນຊື້ກັບໄປເປັນຈໍານວນຫຼາຍ ເພື່ອໃຊ້ໄລຍະຍາວ
ຈາກການສອບຖາມປະຊາຊົນໃນນະຄອນຫຼວງວຽງຈັນ ບາງສ່ວນໃຫ້ສໍາພາດວ່າ: ຈໍາເປັນຕ້ອງໃສ່ໜ້າກາກອະນາໄມເມື່ອອອກໄປນອກບ້ານ ໂດຍສະເພາະບ່ອນທີ່ເປັນຊຸມຊົນ ແລະ ຄົນຫຼາຍ
ໃນຂະນະດຽວກັນ ປະຊາຊົນທີ່ບໍ່ໃສ່ໜ້າກາກອະນາໄມ ໄດ້ບອກວ່າ ຕອນທໍາອິດທີ່ມີຂ່າວອອກມາກໍ່ຍັງຮູ້ສຶກສະບາຍໄດ້ຢູ່ວ່າ ພະຍາດນີ້ຈະຍັງບໍ່ລະບາດໃນບ້ານເຮົາ ແຕ່ມາຫຼັງໆທີ່ມີຂ່າວຄົນຈີນທີ່ມາທ່ຽວລາວ ແລ້ວກວດພົບວ່າເປັນພະຍາດໄວຣັສໂຄໂຣນາ ກໍ່ຮູ້ສຶກຢ້ານທັນທີ ແຕ່ຕອນນີ້ ໜ້າກາກອະນາໄມແມ່ນຫາຊື້ບໍ່ມີແລ້ວ.
ທັງນີ້, ໜ້າກາກອະນາໄມທີ່ມີຄວາມສາມາດປ້ອງກັນໄວຮັສທີ່ຖືກຕ້ອງ ຕ້ອງເປັນແບບ Surgical Mask ທີ່ເບື້ອງໜຶ່ງເປັນສີຂຽວ ຫຼື ຟ້າ ກັນນໍ້າໄດ້ ຈະຊ່ວຍປ້ອງກັນການແຜ່ ຫຼື ຮັບເຊື້ອຕ່າງໆຈາກໄວຣັສ ທີ່ມາກັບລະອອງນໍ້າ ຫຼື ນໍ້າມູກທີ່ກະຈາຍມາໃນລັດສະໝີກວ້າງເວລາໄອ ຫຼື ຈາມ
ແນວໃດກໍ່ຕາມ ອິນໄຊລາວຂໍສະແດງຄວາມເປັນຫ່ວງເປັນໃຍຕໍ່ປະຊາຊົນລາວທົ່ວປະເທດ ແລະ ໃຫ້ພາກັນຮັກສາສຸຂະພາບ ລ້າງມື້ຊໍ້າທຸກຄັ້ງ ເມື່ອອອກຈາກເຂດຊຸມຊົນ ຫຼື ເມື່ອກັບຮອດເຮືອນ. ພ້ອມກັນນີ້, ຊ່ວຍກັນເປັນຫູເປັນຕາ ແລະ ແລກປ່ຽນຂໍ້ມູນຂ່າວສານເຊິ່ງກັນແລະກັນ ໃນເລື່ອງຂອງລາຄາສິນຄ້າທີ່ກ່ຽວຂ້ອງ ຫາກພົບເຫັນຮ້ານໃດທີ່ຂາຍໜ້າກາກອະນາໄມ ແລະ ອຸປະກອນທີ່ກ່ຽວຂ້ອງ ໃນລາຄາທີ່ບໍ່ເໝາະສົມໃຫ້ເຕືອນກັນ ຫຼື ໂທສາຍດ່ວນ 1510 ພະແນກປົກປ້ອງຜູ້ຊົມໃຊ້
Hits: 7
