ສະເດັດເຈົ້າ ສຸພານຸວົງ ໄດ້ໂດຍສານຂະບວນລົດໄຟດ່ວນ ຈາກ ໄຊງ່ອນ Saigon ມາລົງ ສະຖານີ ເມືອງ ຍາຈາງ (ນະຕຣັງ) Nha Trang ໃນວັນເກີດຄົບຮອບ 28 ປີ ຂອງຕົນພໍດີ.
ວິສະວະກອນລາວຄົນທຳອິດ ທີ່ສຳເລັດການສຶກສາຈາກເມືອງຝຣັ່ງສ໌ ໃນຊຸດສາກົນສີຂາວທີ່ສະຫງ່າອົງອາດ ເດີນຂ້າມຈະຕຸລັດ ສະຖານີລົດໄຟ ເມືອງຍາຈາງ ແລະ ກ້າວເຂົ້າໃນໂຮງແຮມ ”ບອນ ແອຣ໌” Bon Air ດ້ວຍບາດກ້າວອັນຫນັກແຫນ້ນ.
ໃນຫ້ອງຮັບແຂກຂອງໂຮງແຮມ ສະເດັດເຈົ້າ ສຸພານຸວົງ ໄດ້ທັກທາຍ ເປັນພາສາຝຣັ່ງສ໌ ກັບ ນາງສາວອ່ອນຊ້ອຍ ຄົນຫນຶ່ງ ທີ່ມີຮູບໂສມສວຍສົດງົດງາມ ມີທ່າທາງສະຫງ່າໜ້າປະທັບໃຈ ແຕ່ງກາຍຕາມແບບຢຸໂຣບ ໃນຊຸດກະໂປ່ງຍາວ ສີຂາວບໍລິສຸດ ເຊິ່ງຫາຍາກທີ່ຈະໄດ້ພົບເຫັນໃນຫມູ່ສະຕຣີຫວຽດນາມສະໄຫມນັ້ນ.
ນາງໄດ້ກ່າວຕ້ອນຮັບ ສະເດັດເຈົ້າ ສຸພານຸວົງ ເປັນພາສາຝຣັ່ງສ໌ ດ້ວຍສຳນຽງຝຣັ່ງບໍ່ຜິດພ້ຽນແມ່ນແຕ່ນ້ອຍ.
ນັບແຕ່ວັນນັ້ນ ພາສາຝຣັ່ງສ໌ ໄດ້ກາຍເປັນສື່ແຫ່ງຄວາມຮັກ ລະຫວ່າງຄູ່ຮັກຕະຫລອດມາ.
ສະເດັດເຈົ້າສຸພານຸວົງ ໄດ້ຮັບຊາບ າມທີ່ຫລັງວ່າ ນາງ ຊື່ ມາຣີ – ກີນາມ Marie – Kỳ Nam ອະດີດນັກສຶກສາ ວິທະຍາໄລ ສະຕຣີ ດົງແຄັງ ນະຄອນເວ້ ( Trường nữ học Đồng Khánh, Huế ) ມາຢູ່ນຳພໍ່ແມ່ ເຊິ່ງເປັນເຈົ້າຂອງໂຮງແຮມ “ບອນ ແອຣ໌” ( Bon Air ) ນັ້ນເອງ (ໂດຍປົກກະຕິແລ້ວ ນາງບໍ່ໄດ້ອອກມາຮັບແຂກ ຂອງໂຮງແຮມດ້ວຍຕົວເອງ).
ຈັ່ງແມ່ນບັງເອີນແທ້ໆ ທີ່ ສະເດັດເຈົ້າ ສຸພານຸວົງ ໄດ້ມາພົບພໍ້ນາງສາວຄົນນິ້ ເຊິ່ງເປັນນາງງາມຂອງແຄ້ວນ ອານນາມ Annam ທີ່ມີຊື່ສຽງ ທັງສະຫລາດ ທັງສະຫງ່າງາມ ໂດ່ງດັງ ໃນທົ່ວແຄ້ວນ ເຊິ່ງຈັກກະພັດບາວໄດ Hoàng đế Bảo Đại ຂອງ ອານນາມ ກໍຫມາຍຕາໄວ້ ເປັນຈັກກະພັດດິນີຂອງຕົນ ວ່າຊັ້ນ!!!
ແຕ່ນາງຊໍ້າພັດ ໄດ້ບັງເກີດຄວາມຮັກ ຄວາມພັກດີ ຕໍ່ ເຈົ້າຊາຍລາວ ຜູ່ຮັກຊາດ ຮັກປະຊາຊົນ ຜູ່ຖືກກົດຂີ່ຂົ່ມເຫັງ ຈົນນາງ ຍອມອຸທິດຊີວິດທັງຊີວິດຂອງຕົນເອງ ພັດພາກຈາກບ້ານເກີດເມືອງນອນ ສະຫລະທຸກຢ່າງ ເພື່ອໄດ້ຢືນຢັດຢູ່ຄຽງຂ້າງ ແລະ ສະຫນັບສະຫນູນ ໃນທຸກໆພາລະກິດ ແລະ ຄວາມລິເລີ່ມຂອງເຈົ້າຊາຍ ຂອງຕົນ ຈົນຕາບສິ້ນລົມຫາຍໃຈ!
ສະເດັດເຈົ້າ ສຸພານຸວົງ ໄດ້ຕອບຮັບຄວາມຮັກ ອັນບໍລິສຸດຜຸດຜ່ອງຂອງນາງຢ່າງເຕັມໃຈ ລູກທະນູ ແຫ່ງ ກາມະເທບ ໄດ້ເຊື່ອມຕິດ ຫົວໃຈໄວຫນຸ່ມສາວສອງດວງເຂົ້າກັນເປັນຫນຶ່ງດຽວ ຢ່າງສາຍຟ້າແລບ ທັນທີທີ່ສາຍຕາທັງສອງຄູ່ໄດ້ພົບເຫັນກັນ…
ເຊິ່ງໄດ້ເປັນພື້ນຖານອັນຫມັ້ນແກ່ນ ໃຫ້ແກ່ ການຈັດພິທີສົມຣົສ ລະຫວ່າງ ສະເດັດເຈົ້າ ສຸພານຸວົງ ແລະ ນາງ ຫງຽວນ ຖິກີນາມ ຂຶ້ນ ໃນວັນທີ່ 19 ມັງກອນ 1938 ທີ່ສາລາກາງ ນະຄອນຍາຈາງ ໂດຍຊ້ອງຫນ້າ ຮອງຜູ່ວ່າຣາຊະການອານນາມ ທ່ານ ອະງົສຕິນິ Agostini ແລະ ຫົວຫນ້າ ສຳນັກງານ ກິດຈະກຳພົນລະເຮືອນ ທ່ານ ເລວະດຸ ( Levadoux , Eugène, Administrateur des Services Civils, Résident de France à Phan Thiêt (Annam) ).
ຫລັງພິທີແລ້ວ ໄດ້ມີງານລ້ຽງຮັບຮອງທີ່ໂຮງແຮມ “ກຣັງ ໂອແຕັລ ເດິ ລະ ປລັຈ” ຂອງ ວັນ ບຣອຍເຊເງັມ ( Grand hôtel de la Plage de Breuseghem ) ຢູ່ ຍາຈາງ Nha Trang (Đại khách sạn Nha Trang).
ສະເດັດເຈົ້າ ສຸພານຸວົງ ແລະ ນາງ ຫງຽວນ ຖິກີນາມ ( ຕໍ່ມາໃສ່ຊື່ລາວ ຫມ່ອມເຈົ້າວຽງຄຳ ສຸພານຸວົງ ) ມີບຸດດ້ວຍກັນ 10 ອົງ: ຊາຍ 8, ຍິງ 2.
? ຫມ່ອມເຈົ້າ ວຽງຄຳ (ຊື່ເດີມ ຫງວຽນຖິກີນາມ Nguyễn Thị Kỳ Nam)
ປະສູດ ວັນທີ່ 3 ທັນວາ 1921
ຢູ່ຕົວເມືອງ ຍາຈາງ (ນະຕຣັງ) ປະເທດຫວຽດນາມ Nha Trang Việt Nam
ເປັນລູກຄົນດຽວ ຂອງ ທ່ານ ຫງຽວນວັນສູງ
Nguyễn Văn Sung ແລະ ນາງ ເລຖິແງ້ Lê Thị Nghé
ຕັ້ງແຕ່ຍັງບໍ່ໄດ້ປະນົມແມ່ເທື່ອ ຫມ່ອມເຈົ້າ ວຽງຄຳ
ກໍໄດ້ຮັບການລ້ຽງດູ ໂດຍນາງ ເຈິນຖິຢະ Trần Thị Giã
ເຊິ່ງຫມ່ອມເຈົ້າວຽງຄຳ ນັບຖືປຽບສະເຫມືອນ
ເປັນແມ່ບັງເກີດເກົ້າມາໂດຍຕະຫລອດ
ຫມ່ອມເຈົ້າ ວຽງຄຳ ເປັນລູກສາວອຸປະຖຳ
ຂອງ ດຣ. ຊັອງ ເຊໂນ ( Dr. Jean Chesneau )
ຈິ່ງມີຊື່ນ້ອຍວ່າ ມາຣີ Marie ແຕ່ບໍ່ໄດ້ເຂົ້າ ສາສນາຄຣິສຕ໌.
ທ່ານ ຫງຽວນວັນສູງ ເປັນນັກກະວີ ທີ່ມີຊື່ສຽງ ຂອງຍາຈາງ
ບົດກະວີຄູ່ ທີ່ທ່ານແຕ່ງ ບົດຫນຶ່ງ
ໄດ້ກາຍເປັນ ຄຳຂັວນປະຈຳຕະກຸນ:
“Hòa khí nhất gia lạc
Đồng tâm vạn sự thành”
ເຊິ່ງແປເປັນພາສາລາວວ່າ:
“ສາມັກຄີກັນແຫນ້ນ ຄອບຄົວຍ່ອມເປັນສຸກ
ເອກະສັນຈິດໃຈ ຫມື່ນງານກໍຄົງແລ້ວ”
ຫລັງຈົບການສຶກສາ ວິທະຍາໄລສະຕຣີ ດົງແຄັງ ທີ່ ນະຄອນ ເວ້
( Trường nữ sinh Đồng Khánh Huế )
ໄດ້ສຶກສາວາລະສານສາຕຣ໌ ທາງໄປສະນີ ຈົນສຳເລັດຫລັກສູຕ
ໄດ້ຮັບປະກາສະນີຍະບັດ ສາຂາ ບັນນາທິການ.
ຫມ່ອມເຈົ້າ ວຽງຄຳ ເຄີຍຂຽນບົດຄວາມລົງຫນັງສືພິມ ແລະ ວາລະສານຕ່າງໆ ໃນໄຊງ່ອນ
ແລະ “ ລາ ປແຣັສ ແອັງໂດຈິນົວເຊິ ” ( La presse indochinoise )
ໂດຍໃຊ້ ນາມປາກກາ ມາຣີ ກ.ນ. ( Marie K.N. )
ພາຍຫລັງການປະກາດເອກະລາດຂອງລາວ ຈາກລ່າເມືອງຂຶ້ນຝຣັ່ງສ໌ 12 ຕຸລາ 1945 ຫມ່ອມເຈົ້າວຽງຄຳ ໄດ້ນຳພາຂະບວນການ ຍຸວະນາຣີ ຢູ່ທ່າແຂກ ເຊິ່ງແມ່ນ ຂະບວນການສະຕຣີທີ່ຮັກຊາດ ທີ່ສູ້ຮົບຕ້ານການກັບຄືນມາ ຢຶດຄອງລາວຂອງລ່າເມືອງຝຣັ່ງ.
ວັນທີ່ 21 ມີນາ 1946 ໄດ້ພ້ອມພຽງຮຽງຫນ້າກັບ ຍຸວະນາຣີ ເມືອງທ່າແຂກ ສູ້ຮົບ ຄຽງບ່າຄຽງໄຫລ່ ກັບປະຊາຊົນທ່າແຂກ ຜູ່ພິລະອາດຫານ ແລະ ສະເດັດເຈົ້າສຸພານຸວົງ ຕ້ານກອງທັບລ່າເມືອງຂຶ້ນຝຣັ່ງ ແລະ ພວກຂາຍຊາດຈົນເຖິງນາທີສຸດທ້າຍ ຈິ່ງອົບພະຍົບໄປໄທ.
1946-1949 ສືບຕໍ່ນຳພາຍຸວະນາຣີ ໃນຂະບວນການລາວອິສຣະພັດຖິ່ນ
1950 ພ້ອມດ້ວຍ ລູກນ້ອຍ 4 ອົງ (ໃນນັ້ນອົງນ້ອຍຍັງບໍ່ປະນົມແມ່ເທື່ອ) ໄດ້ເດີນທາງອອກຈາກບາງກອກ ປະເທດໄທຍ ໄປຮົງກົງ ປະເທດຈີນ ທາງທະເລ ແລ້ວຈິ່ງເຂົ້າຫວຽດນາມ ແລະ ເດີນທາງ ຕໍ່ໄປພົບກັບສະເດັດເຈົ້າ ສຸພານຸວົງ ຢູ່ເຂດທີ່ຫມັ້ນ.
1959-1960 ເປັນອຳນວຍການໃຫຍ່ ລັດວິສາຫະກິດ “ລາວເດີນອາກາດ” ປັດຈຸບັນແມ່ນ “ການບິນລາວ”.
1961-1963 ຫມ່ອມເຈົ້າ ວຽງຄຳ ໄດ້ສຶກສາ ຂັ້ນປະຣິນຍາເອກເສດຖະສາດ ທີ່ ມະຫາວິທະຍາໄລ ແຫ່ງລັດ ໂລໂມໂນສົຟ ຢູ່ນະຄອນຫລວງ ມົສກວາ (ສສສ ໂຊວຽດ).
ຈົນສຳເລັດ ຫລັກສູດ ພ້ອມທັງ ໄດ້ຮັບນາມະຍົດ ສາສຕຣາຈານເສດຖະສາຕຣ໌ ດ້ວຍ.
Московский Государственный Университет имени Ломоносова (ພາສາອັງກິດ: Lomonosov Moscow State University).
ຫມ່ອມເຈົ້າ ວຽງຄຳ ເປັນ ສະຕຣີລາວ ທຳອິດ ຈົບຂັ້ນປະຣິນຍາເອກ ແລະ ໄດ້ຮັບນາມະຍົສ ສາສຕຣາຈານ ໃນປະຫວັດສາດເມືອງລາວ.
ຕົ້ນທົດສະວັດ 1980 ຫມ່ອມເຈົ້າ ວຽງຄຳ ໄດ້ສຳເລັດການສຶກສາ ທິດສະດີການເມືອງຊັ້ນສູງ ທີ່ ຮ່າໂນຍ ປະເທດຫວຽດນາມ Hà Nội Việt Nam.
ຫມ່ອມເຈົ້າວຽງຄຳ ໄດ້ເຂົ້າຮ່ວມການຕໍ່ສູ້ກູ້ຊາດ ຂອງປະຊາຊົນລາວຄຽງຂ້າງ ສະເດັດເຈົ້າ ສຸພານຸວົງ ດ້ວຍຄວາມຈົງຮັກພັກດີ ບໍລິສຸດຜຸດຜ່ອງ ມາໂດຍຕະຫລອດ ໃນຖານະເປັນພະນັກງານທີ່ເດັດດ່ຽວ ເປັນແມ່ລູກ 10 ທີ່ແສນດີ ເປັນພັນລະຍາທີ່ຊື່ສັດ ຮັກດຽວໃຈດຽວ ບໍ່ມີວັນຈາງຫາຍ.
ຫມ່ອມເຈົ້າ ວຽງຄຳ ໄດ້ປະຕິບັດຫນ້າທີ່ວຽກງານຕ່າງໆ ທາງດ້ານອົງການຈັດຕັ້ງມະຫາຊົນ, ເປັນນັກຄົ້ນຄ້ວາສະຕຣີ ທຳອິດ ໃນຄະນະຕໍ່ສູ້ການເມືອງ, ເປັນຮອງຫົວຫນ້າຄະນະກຳມະການຄົ້ນຄ້ວາ ຮຽບຮຽງ ແລະ ແປ ເອກະ ສານ ທິດສະດີ ມາກ-ເລນິນ.
ຫມ່ອມເຈົ້າ ວຽງຄຳ ຈາກໄປ ຢ່າງບໍ່ມີວັນຫວນກັບ ໃນວັນສຸກ ວັນທີ່ 1 ກັນຍາ 2006 ເວລາ 21 ໂມງ 30 ນາທີ ທີ່ ນະຄອນຫລວງວຽງຈັນ.
ແຫຼ່ງຂໍ້ມູນ: ເພຈເຟສບຸກ: Prince Souphanouvong
