ເພື່ອເພີ່ມທະວີການກະກຽມຄວາມພ້ອມດ້ານຕ່າງໆໃຫ້ການປະເມີນ ສປປ ລາວ ເພື່ອອອກຈາກສະຖານະພາບປະເທດດ້ອຍພັດທະນາ ໂດຍຄະນະກຳມະການນະໂຍບາຍເພື່ອການພັດທະນາຂອງອົງການ ສປຊ ໃນປີ 2021
ທັງເປັນການກຳນົດນະໂຍບາຍ ແລະ ປຶກສາຫາລືວິທີທາງໃນການແກ້ໄຂຂໍ້ຄົງຄ້າງ ສິ່ງທ້າທາຍຕ່າງໆໃນການກ້າວສູ່ໄລຍະຂ້າມຜ່ານ ໄລຍະພາຍຫຼັງການຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ແນໃສ່ເພີ່ມທະວີຄວາມຮັບຮູ້ ຄວາມເຂົ້າໃຈ ແລະ ການປະກອບສ່ວນຢ່າງຫ້າວຫັນຂອງບັນດາຂະແໜງການ ນອກນີ້ ຍັງຈະໄດ້ປຶກສາຫາລືແນວທາງໃນການກຳນົດຍຸດທະສາດການຮ່ວມມືກັບອົງ ການ ສປຊ ຄູ່ຮ່ວມພັດທະນາ ແລະ ສາກົນ ເພື່ອເຮັດໃຫ້ການຫຼຸດພົ້ນອອກຈາກສະຖານະພາບດ້ອຍພັດທະນາ ຂອງ ສປປ ລາວ ມີຄວາມຍືນຍົງ ແລະ ຮັບປະກັນບໍ່ໃຫ້ກັບມາຕົກຢູ່ໃນສະຖານະດ້ອຍພັດທະນາອີກ.
ກະຊວງການຕ່າງປະເທດ ຈັດກອງປະຊຸມຄະນະຊີ້ນຳລະດັບຊາດ ເພື່ອການຈັດຕັ້ງປະຕິບັດແຜນດຳເນີນງານສະຫະປະຊາຊາດ (ສປຊ) ສຳລັບປະເທດດ້ອຍພັດທະນາ ເພື່ອກະກຽມໃຫ້ການຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ຂຶ້ນວັນທີ 16 ມີນາ 2020 ຢູ່ສູນການຮ່ວມມືສາກົນ ແລະ ເຝິກອົບຮົມ ໂດຍເປັນປະທານຂອງທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ຮອງປະທານຜູ້ປະຈຳການຄະນະຊີ້ນຳລະດັບຊາດ ມີຜູ້ຕາງໜ້າຈາກບັນດາກະຊວງ ແລະ ຂະແໜງການອ້ອມຂ້າງສູນກາງ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ກອງປະຊຸມຄັ້ງນີ້ ໄດ້ຮັບຟັງການລາຍງານກ່ຽວກັບກົນໄກຂະບວນການ ທົບທວນການຫຼຸດພົ້ນອອກຈາກ ສະຖານະພາບປະເທດດ້ອຍພັດທະນາຂອງຄະນະກຳມະການນະໂຍບາຍດ້ານການພັດທະນາ ສປຊ ຄວາມພ້ອມ ແລະ ການກະກຽມຂອງ ສປປ ລາວ ສຳລັບຂະບວນການທົບທວນ ຄັ້ງທີ II ກ່ຽວກັບການຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ໃນປີ 2021 ສະພາບລວມດ້ານສະຖິຕິຂອງ 3 ເງື່ອນໄຂ ໃນການປະເມີນເພື່ອຫຼຸດພົ້ນອອກຈາກສະຖານະພາບ ປະເທດດ້ອຍພັດທະນາ ຄື:
ດັດຊະນີຍອດລວມລາຍຮັບແຫ່ງຊາດຕໍ່ຫົວຄົນ ດັດຊະນີຊັບສິນມະນຸດ ແລະ ດັດຊະນີຄວາມບອບບາງດ້ານເສດຖະກິດ ພ້ອມນີ້ຍັງຈະໄດ້ແລກປ່ຽນຄຳຄິດເຫັນ ແລະ ປຶກສາຫາລືກ່ຽວກັບສິ່ງທ້າທາຍດ້ານນະໂຍບາຍ ແລະ ການຈັດຕັ້ງປະຕິບັດ ທີ່ລາວໄດ້ປະເຊີນໃນການກຽມພ້ອມສຳລັບການຫຼຸດພົ້ນອອກຈາກສະຖານະພາບດ້ອຍພັດທະນາ ເປັນຕົ້ນ ການສ້າງຄວາມເຂັ້ມແຂງໃຫ້ຂະແໜງກະສິກຳ ສຶກສາ ສາທາລະນະສຸກ ແລະ ການຄ້າ ເພື່ອການເຕີບໃຫຍ່ຂະຫຍາຍຕົວຢ່າງຍືນຍົງ ແລະ ທົ່ວເຖິງ
ພາຍຫຼັງຈາກການຫຼຸດພົ້ນ ການສົນທະນາກ່ຽວກັບຜົນປະໂຫຍດ ແລະ ຜົນເສຍຂອງການຫຼຸດພົ້ນອອກຈາກສະຖານະພາບດ້ອຍພັດທະນາ ນະໂຍບາຍ ແລະ ຍຸດທະສາດທີ່ຈຳເປັນເພື່ອສ້າງຜົນປະໂຫຍດສູງສຸດ ຄວາມເຂົ້າໃຈຕໍ່ສະພາບແວດລ້ອມ ພາຍຫຼັງການຫຼຸດພົ້ນອອກຈາກສະຖານະພາບດ້ອຍພັດທະນາ ແລະ ມາດຕະການສະໜັບສະໜູນທີ່ຈຳເປັນຈາກພາຍໃນ ແລະ ສາກົນ ລວມທັງແຜນ ການໃນຕໍ່ໜ້າ ທີ່ຂະແໜງການກ່ຽວຂ້ອງ ຕ້ອງນຳໄປຈັດຕັ້ງປະຕິບັດ.
ລັດຖະບານລາວ ມີຄວາມໝາຍໝັ້ນທີ່ຈະເລັ່ງໃສ່ການແກ້ໄຂຄວາມທຸກຍາກ ແລະ ສ້າງເງື່ອນໄຂໃຫ້ການຫຼຸດພົ້ນອອກຈາກສະຖານະພາບດ້ອຍພັດທະນາໃນອະນາຄົດ ໃນປີ 2018 ລາວສາມາດບັນລຸດັດຊະນີຊັບສິນມະນຸດ ແລະ ດັດຊະນີຍອດລວມລາຍຮັບແຫ່ງຊາດຕໍ່ຫົວຄົນ ແຕ່ຍັງບໍ່ສາມາດບັນລຸເງື່ອນໄຂດັດຊະນີຄວາມບອບບາງດ້ານເສດຖະກິດ ແລະ ຈະຖືກປະເມີນອີກເປັນຮອບທີ 2 ໃນປີ 2021 ຖ້າ ສປປ ລາວ ສາມາດຜ່ານການປະເມີນຢ່າງໜ້ອຍ 2 ໃນ 3 ເງື່ອນໄຂອີກຄັ້ງ ກໍຈະກ້າວເຂົ້າສູ່ໄລຍະຂ້າມຜ່ານອີກ 3 ປີ ຈົນເຖິງປີ 2024 ຈຶ່ງຈະສາມາດຫຼຸດພົ້ນອອກຈາກສະຖານະພາບປະເທດດ້ອຍພັດທະນາເປັນທາງການ.
ແຫຼ່ງຂໍ້ມູນ: ວຽງຈັນໃໝ່