ນັກວິສາວະກອນ ຈາກສູນເກັບກູ້ລະເບີດສາກົນ, ກອງກຳລັງປະກອບອາວຸດ ແຫ່ງ ສ.ຣັດເຊຍ ຮ່ວມກັບເພື່ອນຮ່ວມງານ ຈາກກອງທັບປະຊາຊົນລາວ ໄດ້ສຳເລັດການເກັບກູ້ລະເບີດ ຢູ່ບໍລິເວນສະໜາມບິນທົ່ງໄຫຫີນ ໃນແຂວງຊຽງຂວາງ.
ນັບແຕ່ ເດືອນຕຸລາ 2019 ເຖິງ ເດືອນມີນາ 2020 ຊ່ຽວຊານຣັດເຊຍ ສາມາດທຳລາຍລູກລະເບີດໄດ້ຫຼາຍກ່ວາ 830 ໜ່ວຍ ໃນດິນແດນຂອງ ສປປ ລາວ.
ໃນໂອກາດສຳເລັດການເກັບກູ້ລະເບີດ ໄດ້ຈັດພິທີແບບພິເສດຂຶ້ນ ເພື່ອເປັນນິມິດຫມາຍແຫ່ງຜົນສຳເລັດໃນຄັ້ງນີ້, ໂດຍເປັນກຽດເຂົ້າຮ່ວມຂອງ ທ່ານ ພົນຕີ ອ່ອນສີ ແສນສຸກ, ຮອງລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ.
ທ່ານ ພົນຕີ ອ່ອນສີ ແສນສຸກ ໄດ້ສະແດງຄວາມຂອບໃຈຕໍ່ຊ່ຽວຊານຣັດເຊຍ ແລະ ມອບຫລຽນໄຊມິດຕະພາບໃຫ້ແກ່ກົມກອງຂອງພວກເຂົາ.
ກ່ອນໜ້ານີ້ ຢູ່ບໍລິເວນສະຖານທີ່ຂຸດຄົ້ນດັ່ງກ່າວ ແມ່ນໄດ້ມີສູນຝຶກອົບຮົມທາງດ້ານທິດສະດີກ່ຽວກັບການຂຸດຄົ້ນ, ໃນນັ້ນ ມີທະຫານຂອງ ສປປ ລາວ ຈຳນວນ 20 ຄົນ ໄດ້ເຂົ້າຝຶກອົບຮົມທິດສະດີໃນການປ້ອງກັນຕົວ ແລະ ຮຽນຮູ້ກ່ຽວກັບວິທີຂຸດຄົ້ນລູກລະເບີດຂອງຊາວຣັດເຊຍ.
ພວກເຂົາ ແມ່ນມີຄວາມຊໍານານໃນການປະຕິບັດຫນ້າທີ່ວຽກງານເທິງຫນ້າດິນ. ການເກັບກູ້ລະເບີດຄັ້ງນີ້ ເປັນຄັ້ງທີສອງ ທີ່ປະສົບຜົນສຳເລັດຂອງຊ່ຽວຊານຣັດເຊຍ ໃນດິນແດນ ສປປ ລາວ.
ດັ່ງທີ່ກະຊວງປ້ອງກັນປະເທດແຫ່ງ ສ. ຣັດເຊຍ ໄດ້ເນັ້ນຫນັກວ່າ, ມົດສະກູ ມີແຜນສືບຕໍ່ຊ່ວຍເຫຼືອ ນະຄອນ ຫຼວງວຽງຈັນຕື່ມອີກ ໃນການຂຸດຄົ້ນ ແລະ ເກັບກູ້ລະເບີດທີ່ຍັງບໍ່ທັນແຕກ.
ແຫຼ່ງຂໍ້ມູນ: Посольство России в Лаосе Russian Embassy in Laos