ຫ້ອງວ່າການສໍານັກງານນາຍົກລັດຖະມົນຕີ
ແຈ້ງການ ຮຽນ; – ທ່ານ ເຈົ້າຄອງນະຄອນຫຼວງວຽງຈັນ ແລະ ບັນດາທ່ານ ເຈົ້າແຂວງ ທົ່ວປະເທດ ທີ່ນັບຖື.
– ທ່ານ ລັດຖະມົນຕີກະຊວງປ້ອງກັນຄວາມສະຫງົບ.
ເລື່ອງ: ຫ້າມເກັບເງິນຄ່າທໍານຽມຕ່າງໆ ໃນການອອກເອກະສານ ເຂົ້າ-ອອກ ເມືອງ ແລະ ບ້ານ ນໍາປະຊາຊົນ.
– ອີງຕາມຄໍາສັ່ງຂອງທ່ານ ນາຍົກລັດຖະມົນຕີ ສະບັບເລກທີ 06/ນຍ, ລົງວັນທີ 29 ມີນາ 2020 ວ່າດ້ວຍການເພີ່ມທະວີມາດຕະການສະກັດກັ້ນ, ກັນການລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດ COVID-19.
– ອີງຕາມການສະເຫນີ ຂອງກອງປະຊຸມຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ໃນວັນທີ 11 ເມສາ 2020..
– ອີງຕາມການຕົກລົງ ແລະ ຊີ້ນໍາ ຂອງທ່ານ ນາຍົກລັດຖະມົນຕີ ໃນວັນທີ 11 ເມສາ 2020.
ຫ້ອງວ່າການສໍານັກງານນາຍົກລັດຖະມົນຕີ ຂໍຖືເປັນກຽດແຈ້ງການຕົກລົງ ແລະ ຊີ້ນໍາ ຂອງທ່ານ ນາຍົກ ລັດຖະມົນຕີ ມາຍັງທ່ານຊາບ ດັ່ງນີ້:
ຫ້າມບໍ່ໃຫ້ອົງການປົກຄອງທ້ອງຖິ່ນທຸກຂັ້ນ ເກັບເງິນຄ່າທໍານຽມຕ່າງໆ ໃນການໃຫ້ບໍລິການອອກເອກະສານ ຫຼື ບັດເຂົ້າ-ອອກ ເມືອງ ແລະ ບ້ານນໍາປະຊາຊົນ ໃນຊ່ວງໄລຍະຈັດຕັ້ງປະຕິບັດ ຄໍາສັ່ງ ຂອງທ່ານນາຍົກລັດຖະມົນຕີ ສະບັບເລກທີ 06/ນຍ, ລົງວັນທີ 29 ມີນາ 2020 ວ່າດ້ວຍການເພີ່ມທະວີມາດຕະການສະກັດກັ້ນ, ກັນການລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດ COVID-19 ຢ່າງເດັດຂາດ,
ມອບໃຫ້ທ່ານເຈົ້າຄອງນະຄອນຫຼວງວຽງຈັນ ແລະ ບັນດາທ່ານເຈົ້າແຂວງ ທົ່ວປະເທດ ຊີ້ນໍາບັນດາ ທ່ານເຈົ້າເມືອງ ແລະ ນາຍບ້ານ ທີ່ຢູ່ໃນພາຍໃຕ້ການຊີ້ນໍາຂອງຕົນ ຈັດຕັ້ງປະຕິບັດຢ່າງເຂັ້ມງວດ, ຖ້າເມືອງໃດ ຫລື ບ້ານໃດ ໄດ້ຕົກລົງໃຫ້ມີການເກັບເງິນຄ່າອອກກະສານດັ່ງກ່າວ ແມ່ນໃຫ້ລົບລ້າງທັນທີ.
ດັ່ງນັ້ນ, ຈຶ່ງແຈ້ງມາຍັງທ່ານເພື່ອຊາບ ແລະ ປະຕິບັດຕາມເນື້ອໃນແຈ້ງການສະບັບນີ້ດ້ວຍ..
