ໃນ ສ ປປ ລາວ 08 ມື້ ທີ່ບໍ່ມີຜູ້ຕິດເຊື້ອໃຫມ່, ໃນຈໍານວນຜູ້ຕິດເຊື້ອ 19 ຄົນ ກໍ່ໄດ້ອອກໂຮງຫມໍແລ້ວ 2 ຄົນ ຍັງເຫຼືອ 17 ຄົນທີ່ຈະໄດ້ສືບຕໍ່ຕິດຕາມປິ່ນປົວຢ່າງໃກ້ຊິດ.
ສະພາບການລະບາດຄົງທີຄືແນວນີ້ ກໍ່ຍ້ອນວ່າ ປະຊາຊົນບັນດາເຜົ່າ ໄດ້ເປັນເຈົ້າການຮ່ວມໄມ້ຮ່ວມມື ໃນການຈັດຕັ້ງປະຕິບັດຄໍາສັ່ງ 06/ນຍ, ຍ້ອນມີການຊີ້ນໍາຈາກອໍານາດການປົກຄອງທຸກຂັ້ນ, ມີການສະຫນັບສະຫນູນຊ່ວຍເຫຼືອຈາກອົງການຈັດຕັ້ງສາກົນ ປະເທດເພື່ອນມິດ ແລະ ອົງການຈັດຕັ້ງສັງຄົມທຸກພາກສ່ວນ.
ຂໍສະແດງຄວາມຍ້ອງຍໍຊົມເຊີມມານະໂອກາດນີ້ດ້ວຍ.
ສະນັ້ນ, ເພື່ອສືບຕໍ່ໃຫ້ສະພາບການລະບາດຂອງພະຍາດໂຄວິດຜ່ອນຄາຍລົງໄປເລື້ອຍໆ ເຮັດ ໃຫ້ພວກເຮົາສາມາດກັບມາດໍາລົງຊີວິດຕາມປົກກະຕິໄດ້.
ໃນຕໍ່ຫນ້ານີ້ ຈີ່ງຮຽກຮ້ອງໃຫ້ພໍ່ແມ່ ປະຊາຊົນບັນດາເຜົ່າ, ອົງການຈັດຕັ້ງທຸກພາກສ່ວນ ຈົ່ງສືບຕໍ່ຮ່ວມໄມ້ຮ່ວມມື ເປັນເຈົ້າການ ຈັດຕັ້ງປະຕິບັດຄໍາສັ່ງ ເລກທີ 06/ນຍ ແລະ ບັນດາຂໍ້ແນະນໍາຕ່າງໆຢ່າງເຂັ້ມງວດ.
ສະເພາະມື້ນີ້ ສັງເກດເຫັນວ່າ ໃນນະຄອນຫຼວງວຽງຈັນ ມີການສັນຈອນ ຂອງລົດລາງພາຫະນະເປັນ ຈໍານວນຫຼາຍ ຈຶ່ງຂໍໃຫ້ພໍ່ແມ່ປະຊາຊົນ ສືບຕໍ່ຈໍາກັດຕົນເອງຢູ່ເຮືອນ ແລະ ກໍ່ຂໍໃຫ້ ຄະນະເຈົ້າຫນ້າທີ່ກວດກາຄວາມເປັນ ລະບຽບຮຽບຮ້ອຍ ຄືໄລຍະຜ່ານມາ ຍ້ອນວ່າ ຄໍາສັ່ງ 06/ນຍ ຍັງສືບຕໍ່ ປະຕິບັດ ອີກ 14 ວັນ ຈົນຮອດວັນທີ 03 ພຶດສະພາ.
ຂໍໃຫ້ບັນດາທ່ານຈົ່ງພ້ອມກັນປ້ອງກັນຕົນເອງ, ປ້ອງກັນຄອບຄົວ ແລະ ຜູ້ທີ່ຮັກແພງ ໃກ້ຊິດກັບບັນດາທ່ານຈາກການຕິດເຊື້ອພະຍາດ ໂຄວິດ 19 ຖືວ່າແມ່ນພັນທະ ແລະ ຄວາມຮັບຜິດຊອບ ຂອງບັນດາທ່ານ ແລະ ເປັນການປະກອບສ່ວນອັນສໍາຄັນໃຫ້ແກ່ປະເທດຊາດເພື່ອຜ່ານວິກິດຂອງ ການລະບາດພະຍາດໂຄວິດ 19.
ກ່າວໂດຍ ໂດຍທ່ານ ຮສ.ດຣ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ຜູ້ປະຈຳການຄະນະສະເພາະກິດ ຖະແຫຼງເມື່ອ ເວລາ 14:30 ໂມງ ຂອງວັນທີ່ 20 ເມສາ 2020.