ຄະນະສະເພາະກິດ ໄດ້ຖະແຫຼງຂ່າວຕໍ່ສັງຄົມ ໃນຕອນບ່າຍ ວັນທີ 24/4/2020 ໂດຍ ຮສ.ດຣ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ຜູ້ປະຈຳການຄະນະສະເພາະກິດວ່າ:
ໃນ ສປປ ລາວ ຍັງເຫັນວ່າ 12 ມື້ທີ່ບໍ່ມີຜູ້ຕິດເຊື້ອໃຫມ່. ໃນຈໍານວນຜູ້ຕິດເຊື້ອ 19 ຄົນກໍ່ໄດ້ອອກໂຮງຫມໍແລ້ວ 04 ຄົນ ແລະ ຍັງເຫຼືອ 15 ຄົນ ທີ່ຈະໄດ້ສືບຕໍ່ຕິດຕາມ ປິ່ນປົວຕາມອາການຢ່າງໃກ້ຊິດ.
ສະພາບການລະບາດຄົງທີ່ຄືແນວນີ້ ກໍ່ຍ້ອນວ່າ ປະຊາຊົນບັນດາເຜົ່າ ໄດ້ ເປັນເຈົ້າການ ຮ່ວມໄມ້ຮ່ວມມື ໃນການຈັດຕັ້ງປະຕິບັດ ຄໍາສັ່ງ ເລກທີ 06/ນຍ, ແຕ່ພວກເຮົາ ຈະບໍ່ໄດ້ລົດລະມາດຕະການເຝົ້າລະວັງ ຕິດຕາມຄົ້ນຫາ ຜູ້ສົງໄສທີ່ຈະຕິດເຊື້ອ.
ໂດຍສະເພາະຜູ້ທີ່ ຍັງຈໍາກັດບໍລິເວນຕົນເອງຢູ່ສູນ ແລະ ຢູ່ເຮືອນ ລວມທັງຜູ້ເດີນທາງຜ່ານຊາຍແດນເຂົ້າມາໃຫມ່ ເພື່ອມາກວດວິເຄາະຢັ້ງຢືນພະຍາດໃຫ້ໄດ້ໄວ ແລະ ປິ່ນປົວຢ່າງທັນການ, ສະກັດກັ້ນ ບໍ່ໃຫ້ມີ ການລະບາດຄືນຄັ້ງທີ 2.
ເພື່ອເປັນການສືບຕໍ່ເຝົ້າລະວັງຢ່າງເຂັ້ມງວດຕໍ່ຜູ້ທີ່ຈະເດີນທາງເຂົ້າມາ ສປປ ລາວ ຈາກ ຕ່າງປະເທດລວມທັງແຮງງານລາວທີ່ຈະມາຈາກປະເທດໄທ ຫ້ອງວ່າການສໍານັກງານ ນາຍົກລັດຖະມົນຕີຈິ່ງມີແຈ້ງການ ເລກທີ 507/ຫສນຍ ວັນທີ 24 ເມສາ 2020 ເຖິງເຈົ້າຄອງ ນະຄອນຫຼວງ ແລະ ບັນດາແຂວງທົ່ວປະເທດ ໃຫ້ ກະກຽມສະຖານທີ່ ຈໍາກັດບໍລິເວນ ຜູ້ເດີນທາງມາຈາກຕ່າງປະເທດ ແລະ ຜູ້ສໍາພັດໃກ້ຊິດກັບຜູ້ຕິດເຊື້ອ ສອດຄ່ອງກັບເງື່ອນໄຂ ແລະ ມາດຕະຖານ ທີ່ຄະນະສະເພາະກິດວາງອອກ ເພື່ອຮອງຮັບການຜ່ອນຜັນມາດຕະການຄໍາສັ່ງ ເລກທີ 06/ນຍ ໃນຕໍ່ຫນ້າ.
ໃນວັນທີ 24 ເມສາ 2020, ໄດ້ມີ ຖະແຫຼງຂ່າວກ່ຽວກັບ ກອງປະຊຸມລັດຖະບານ ສະໄຫມສາມັນ ປະຈໍາເດືອນ ເມສາ 2020.
ໂດຍໄດ້ເນັ້ນໃຫ້ ຄະນະສະເພາະກິດ ບັນດາຂະແຫນງການທີ່ ກ່ຽວຂ້ອງ ທ້ອງຖິ່ນ ແລະ ທົ່ວສັງຄົມ ເອົາໃຈໃສ່ການຈັດຕັ້ງປະຕິບັດ ຄໍາສັ່ງເລກທີ 06/ນຍ ແລະແຈ້ງການ ຫຼື ຄໍາແນະນໍາ ຂອງ ຄະນະສະເພາະກິດ, ຂະແຫນງການທີ່ກ່ຽວຂ້ອງຢ່າງເຂັ້ມງວດ ຈົນຮອດວັນທີ 3 ພຶດສະພາ 2020
• ສະນັ້ນ ຈຶ່ງຮຽກຮ້ອງໃຫ້ພໍ່ແມ່ປະຊາຊົນບັນດາເຜົ່າ, ອົງການຈັດຕັ້ງທຸກພາກສ່ວນ ຈົ່ງສືບຕໍ່ຮ່ວມ ໄມ້ຮ່ວມມື ເປັນເຈົ້າການສືບຕໍ່ ຈັດຕັ້ງປະຕິບັດຄໍາສັ່ງ ເລກທີ 06/ນຍ ແລະ ບັນດາຂໍ້ແນະນໍາຕ່າງໆ.
