ຍ້ອນຄວາມສ່ຽງໃນການລະບາດຂອງພະຍາດ Covid-19 ຫ້ອງວ່າການສຳນັກງານນາຍົກລັດຖະມົນຕີຈື່ງອອກແຈ້ງການເລກທີ 507/ຫສນຍ, ລົງວັນທີ 24 ເມສາ 2020.
ເລື່ອງການກະກຽມສູນກັກກັນຕົວຜູ້ຈະເດີນທາງເຂົ້າມາ ສປປ ລາວ ຈາກຕ່າງປະເທດຢູ່ນະຄອນຫຼວງວຽງຈັນ ແລະ ບັນດາແຂວງທົ່ວປະເທດ.ແຈ້ງການມີທັງໝົດ 4 ຂໍ້ຄື:
1. ໃຫ້ນະຄອນຫຼວງວຽງຈັນ ແລະ ບັນດາແຂວງຮີບຮ້ອນກະກຽມສະຖານທີ່ກັກກັນຕົວຜູ້ທີ່ເດີນທາງມາຈາກຕ່າງປະເທດ ແລະ ຜູ້ສຳຜັດໃກ້ຊິດກັບຜູ້ຕິດເຊື້ອ ໂດຍສອດຄ່ອງກັບເງື່ອນໄຂ ແລະ ມາດຕະຖານຂອງສະຖານທີ່ກັກກັນຕົວທີ່ຄະນະສະເພາະກິດວາງອອກ.
ສໍາລັບງົບປະມານໃຊ້ຈ່າຍໃນການກະກຽມສະຖານທີ່ ແລະ ຮັບຮອງຜູ້ທີ່ຖືກກັກກັນ (ກິນ, ຢູ່, ພັກ-ເຊົາ ) ແມ່ນໃຫ້ນະຄອນຫຼວງວຽງຈັນ ແລະ ບັນດາແຂວງເປັນຜູ້ຮັບຜິດຊອບ.
2. ສຳລັບສະຖານທີ່ກັກກັນຕົວຢູ່ນະຄອນຫຼວງວຽງຈັນ ແລະ ແຂວງຈຳປາສັກ ຖືກກຳນົດໃຫ້ເປັນບ່ອນທີ່ຮັບເອົາຜູ້ໄດ້ຮັບອະນຸຍາດເດີນທາງມາຈາກຕ່າງປະເທດ ເພື່ອກວດຫາເຊື້ອພະຍາດກ່ອນ.
ຖ້າຜົນບວກ (ມີເຊື້ອພະຍາດ) ໃຫ້ສົ່ງເຂົ້າໂຮງໝໍ ເພື່ອຮັບການປີ່ນປົວ. ຖ້າຜົນກວດເປັນລົບ (ບໍ່ມີເຊື້ອພະຍາດ) ໃຫ້ສືບຕໍ່ກັກກັນຕົວ ແລະ ຕິດຕາມອາການຈົນຄົບ 14 ວັນ.
ສໍາລັບຢູ່ນະຄອນຫຼວງວຽງຈັນ ແລະ ແຂວງຈຳປາສັກ. ສ່ວນຜູ້ທີ່ຢູ່ແຂວງອື່ນໃຫ້ຈັດສົ່ງໄປສືບຕໍ່ກັກກັນຕົວ 14 ວັນ ຢູ່ສະຖານທີ່ກັກກັນຕົວຢູ່ແຂວງທີ່ກ່ຽວຂ້ອງ; ຫ້າມເດັດຂາດບໍ່ໃຫ້ກັກກັນຕົວຢູ່ເຮືອນ.
3. ໃຫ້ຄະນະສະເພາະກິດຮີບຮ້ອນກຳນົດເງື່ອນໄຂ ແລະ ມາດຕະຖານ ຂອງສະຖານທີ່ກັກກັນຕົວ ແລະ ລົງໄປແນະນຳໃຫ້ນະຄອນຫຼວງວຽງຈັນ ແລະ ບັນດາແຂວງຈັດຕັ້ງປະຕິບັດໃຫ້ເປັນເອກະພາບ.
4. ໃຫ້ຄະນະສະເພາະກິດ ສົມທົບກັບທ້ອງຖີ່ນກ່ຽວຂ້ອງ ຄົ້ນຄ້ວາກຳນົດໂຮງແຮມທີ່ຈະເປັນບ່ອນກັກກັນຕົວ ແລະ ຕິດຕາມອາການສຳລັບຊ່ຽວຊານ ຫຼື ຄົນຕ່າງປະເທດທີ່ຈະເຂົ້າມາ ສປປ ລາວ ໂດຍຄ່າໃຊ້ຈ່າຍໃນການກັກຕົວດັ່ງກ່າວແມ່ນເຂົາເຈົ້າເປັນຜູ້ຮັບຜິດຊອບ.
ນັ້ນແມ່ນ 4 ກົດເຫຼັກຂອງປະຕູບ້ານ-ປະຕູເມືອງ ເພື່ອສະກັດກັ້ນການແຜ່ລະບາດຂອງພະຍາດ Covid-19 ຂໍໃຫ້ທຸກພາກສ່ວນກ່ຽວຂ້ອງຈັດຕັ້ງປະຕິບັດຢ່າງເຂັ້ມງວດ ໃຫ້ກາຍເປັນກົດເຫຼັກຢ່າງແທ້ຈິງ.
ແຫຼ່ງຂໍ້ມູນ: Media Laos
