ໂອກາດທີ່ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ ພ້ອມຄະນະ ລົງຊຸກຍູ້ວຽກງານສະກັດກັ້ນ ແລະ ຄວບຄຸມການລະບາດຂອງພະຍາດໂຄວິດ-19 ໃນວັນທີ 26 ເມສາ 2020 ທີ່ໂຮງແຮມແລນມາກ ແມ່ຂອງຣີເວີໄຊ ນະຄອນຫຼວງວຽງຈັນ.
ໂດຍມີທ່ານ ສີຫຸນ ສິດທິລືໄຊ ຮອງເຈົ້າຄອງ ນວ ທ່ານຮອງລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ກະຊວງແຮງງານ-ສະຫວັດດີການສັງຄົມ ຫົວໜ້າພະແນກ ຖວທ ນວ ປະທານສະມາຄົມ ພ້ອມຮ້ານອາຫານລາວ ແລະ ພາກສ່ວນກ່ຽວຂ້ອງເຂົ້າຮ່ວມ.
ການພົບປະຄັ້ງນີ້ ຜູ້ປະກອບການທຸລະກິດໂຮງແຮມ ແລະ ຮ້ານອາຫານ ໄດ້ນຳສະເໜີຫຼາຍບັນຫາຕໍ່ທ່ານຮອງນາຍົກລັດຖະມົນຕີ ໂດຍສະເພາະ ທ່ານ ປະກາສິດ ຈັນທະປັນຍາ ປະທານສະມາຄົມ ແລະ ຮ້ານອາຫານລາວ ໄດ້ນຳສະເໜີບັນຫາມາດຕະການໃນການປະຕິບັດຄຳສັ່ງແນະນຳ ເລກທີ 06/ນຍ ຂອງທ່ານນາຍົກລັດຖະມົນຕີ ການຫາທາງອອກໃຫ້ກັບບັນດາໂຮງແຮມ ແລະ ການບໍລິການຮ້ານອາຫານ ເຖິງແມ່ນວ່າການລະບາດຂອງພະຍາດໂຄວິດ-19 ຈະສີ້ນສຸດລົງ
ແຕ່ຫຼາຍບັນຫາທີ່ຈະຕາມມາ ສະພາບການຟື້ນຕົວຂອງການບໍລິການ ແມ່ນຈະໃຊ້ໄລຍະເວລາດົນສົມຄວນ ລວມທັງການປະຕິບັດນະໂຍບາຍຕ່າງໆຕໍ່ກັບພະນັກງານ ການຈ້າງງານ ບັນຫາການຫວ່າງງານທີ່ຈະຕາມມາ ແລະ ອີກຫຼາຍບັນຫາທີ່ໄດ້ຍົກຂຶ້ນມາເພື່ອນຳສະເໜີຕໍ່ທ່ານຮອງນາຍົກ.
ໂອກາດດຽວກັນ ທ່ານຮອງນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍຕໍ່ບັນດາຫ້າງຮ້ານ ຜູ້ປະກອບການທີ່ພ້ອມກັນເອົາໃຈໃສ່ຈັດຕັ້ງຜັນຂະຫຍາຍຄຳສັ່ງແນະນຳ ເລກທີ 06/ນຍ ຂອງທ່ານນາຍົກຢ່າງເປັນຮູບປະທຳ ໂດຍສະເພາະຕໍ່ກັບການເປັນເຈົ້າການປະກອບສ່ວນຊຸກຍູ້ວຽກງານສະກັດກັ້ນ ແລະ ຄວບຄຸມການລະບາດຂອງພະຍາດໂຄວິດ-19 ຄັ້ງນີ້ ເປັນຕົ້ນ ໂຮງແຮມແລນມາກ ທີ່ໃຫ້ການປະກອບສ່ວນໃຫ້ທີ່ພັກແກ່ຄະນະແພດຊ່ຽວຊານ ສປ ຈີນ ທີ່ເດີນທາງມາປະຕິບັດໜ້າທີ່ຊ່ວຍເຫຼືອ ສປປ ລາວ ໃນຄັ້ງຜ່ານມາ
ຕໍ່ກັບຫຼາຍບັນຫາທີ່ທາງສະມາຄົມສະເໜີມານັ້ນ ເປັນບັນຫາສຳຄັນ ແລະ ຮີບດ່ວນ ທ່ານຮອງນາຍົກໄດ້ເນັ້ນໃຫ້ທາງສະມາຄົມໃຫ້ຮີບດ່ວນສຳຫຼວດ ຂຶ້ນບັນຊີເປົ້າໝາຍເພື່ອປະສານສົມທົບກັບຂະແໜງການກ່ຽວຂ້ອງ ເຊັ່ນ:
ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ກະຊວງແຮງງານ-ສະຫວັດດີການສັງຄົມ ແລະ ບັນດາຂະແໜງການຕ່າງໆທີ່ກ່ຽວຂ້ອງ ນຳໃຊ້ສື່ສານທີ່ທັນສະໄໝ ເພື່ອຄວາມວ່ອງໄວໃນແກ້ໄຂບັນຫາໃຫ້ຖືກຈຸດ ສ່ວນອີກຫຼາຍບັນຫາທີ່ນຳສະເໜີມານັ້ນ ຈະໄດ້ນຳສະເໜີຕໍ່ທ່ານນາຍົກລັດຖະມົນຕີ ເພື່ອຈັດກອງປະຊຸມປຶກສາຫາລື ຊອກຫາຊ່ອງທາງແກ້ໄຂໃຫ້ທ່ວງທັນກັບສະພາບ ສາມາດແກ້ໄຂບັນຫາເຫຼົ່ານັ້ນໃຫ້ເໝາະສົມ ແລະ ທັນເວລາ.