ໃນທຸກໆມື້, ຜູ້ຄົນໃຊ້ Facebook ເພື່ອແບ່ງປັນປະສົບການຂອງຕົວເອງ, ເຊື່ອມຕໍ່ກັບໝູ່ເພື່ອນ ແລະ ຄອບຄົວ ລວມທັງສ້າງຊຸມຊົນ. ພວກເຮົາເປັນບໍລິການທີ່ໃຫ້ຜູ້ຄົນຫຼາຍກວ່າສາມຕື້ຄົນ ໄດ້ສະແດງຕົວຕົົນຂອງເຂົາເຈົ້າຢ່າງອິດສະຫຼະ ຢູ່ລະຫວ່າງຫຼາຍໆປະເທດ, ວັດທະນະທຳ ແລະ ພາສາ.
ເພື່ອຮັບປະກັນວ່າແພັດຟອມຂອງພວກເຮົາເປັນສະຖານທີ່ທີ່ຜູ້ຄົນຮູ້ສຶກໝັ້ນໃຈໃນການສື່ສານແລະປ້ອງກັນການນໍາໃຊ້ທີ່ຜິດຫຼືການລ່ວງລະເມີດເທິງການບໍລິການຂອງພວກເຮົາ ເພື່ອສ້າງຊຸມຊົນທີ່ປອດໄພແລະໃຫ້ກຽດເຊິ່ງກັນແລະກັນສຳລັບທຸກຄົນ, Facebook ໄດ້ ພັດທະນາມາດຕະຖານຊຸມຊົນ ຂຶ້ນມາເຊິ່ງກຳນົດເນື້ອຫາທີ່ອະນຸຍາດ ແລະ ບໍ່ອະນຸຍາດໃນ Facebook.
5 ສິ່ງທີ່ທ່ານຄວນຮູ້ກ່ຽວກັບມາດຕະຖານຊຸມຊົນຂອງ Facebook ທີ່ຈະຊ່ວຍເພີ່ມຄວາມເຂົ້າໃຈໃຫ້ທ່ານກ່ຽວກັບນະໂຍບາຍຂອງ Facebook ແລະມີການເຊື່ອມຕໍ່ທີ່ປອດໄພແລະມີຄວາມໝາຍເທິງແພັດຟອມຂອງພວກເຮົາ.
- ມາດຕະຖານຊຸມຊົນແມ່ນຫຍັງ ແລະ ເຮົາສາມາດຮຽນຮູ້ເພີ່ມຕື່ມກ່ຽວກັບມັນໄດ້ແນວໃດ?
ເປົ້າໝາຍຂອງມາດຕະຖານຊຸມຊົນແມ່ນເພື່ອ ສ້າງສະຖານທີ່ສຳລັບການສະແດງອອກແລະເຮັດໃຫ້ສຽງຂອງທຸກຄົນມີຄວາມໝາຍ. ການສ້າງຊຸມຊົນແລະເຮັດໃຫ້ທົ່ວໂລກໄດ້ໃກ້ຊິດກັນຍິ່ງຂຶ້ນແມ່ນຂຶ້ນກັບຄວາມສາມາດຂອງທຸກຄົນໃນການແບ່ງປັນມຸມມອງທີ່ຫຼາກຫຼາຍ, ປະສົບການ, ຄວາມຄິດ, ແລະຂໍ້ມູນ. ເພື່ອສ້າງເງື່ອນໄຂທີ່ທຸກຄົນຮູ້ສຶກສະບາຍໃຈໃນການສະແດງອອກຢ່າງອິດສະຫຼະ, ພວກເຮົາຕ້ອງຮັກສາຊຸມຊົນທີ່ມີຄວາມປອດໄພ, ຄວາມເປັນສ່ວນຕົວ, ກຽດສັກສີ, ແລະ ຄວາມຖືກຕ້ອງເປັນຈິງ.
ມາດຕະຖານຊຸມຊົນຂອງ Facebook ແມ່ນໝວດໝູ່ນະໂຍບາຍທີ່ກໍານົດສິ່ງທີ່ອະນຸຍາດແລະບໍ່ອະນຸຍາດໃນ Facebook, ເຊິ່ງນະໂຍບາຍດັ່ງກ່າວມີຜົນນໍາໃຊ້ກັບທຸກໆຜະລິດຕະພັນແລະການບໍລິການຂອງ Facebook ລວມມີ Facebook, Messenger, WhatsApp, Instagram, ແລະອື່ນໆ.
ທ່ານສາມາດຮຽນຮູ້ເພີ່ມຕື່ມກ່ຽວກັບມາດຕະຖານຊຸມຊົນໄດ້ທີ່ https://www.facebook.com/communitystandards/
- ຂົງເຂດນະໂຍບາຍທີ່ມາດຕະຖານຊຸມຊົນກວມເອົາມີຫຍັງແດ່?
ມາດຕະຖານຊຸມຊົນຂອງພວກເຮົາກວມເອົາຂົງເຂດນະໂຍບາຍທີ່ກວ້າງເພື່ອກຳຈັດທຸກໆເນື້ອຫາທີ່ເປັນອັນຕະລາຍ – ຈາກການດູຖູກ, ການຄຸກຄາມ ແລະ ຄຳເວົ້າທີ່ກຽດຊັງ, ຈົນເຖິງຮູບພາບທີ່ຮຸນແຮງ ແລະ ໄພຂົ່ມຂູ່ທີ່ໜ້າເຊື່ອຖື ລວມໄປເຖິງ ບັນຊີປອມ, ການສໍ້ໂກງ, ແລະ ການແອບອ້າງ.
ນະໂຍບາຍຂອງພວກເຮົາແມ່ນອີງໃສ່ຄວາມຄິດເຫັນຈາກຊຸມຊົນຂອງພວກເຮົາ ແລະ ຄຳແນະນຳຂອງບັນດາຜູ້ຊ່ຽວຊານໃນຂະແໜງການຕ່າງໆເຊັ່ນ ເຕັກໂນໂລຊີ, ຄວາມປອດໄພສາທາລະນະ ແລະ ສິດທິມະນຸດ. ເພື່ອຮັບປະກັນວ່າສຽງຂອງທຸກຄົນມີຄຸນຄ່າ, ພວກເຮົາຈິ່ງເອົາໃຈໃສ່ເປັນຢ່າງຍິ່ງໃນການຮ່າງນະໂຍບາຍທີ່ປະກອບໄປດ້ວຍຄວາມຄິດເຫັນ ແລະ ຄວາມເຊື່ອທີ່ຫຼາກຫຼາຍ, ໂດຍສະເພາະຄວາມຄິດເຫັນແລະຄວາມເຊື່ອຂອງຜູ້ຄົນແລະ ຊຸມຊົນທີ່ອາດຈະຖືກເບິ່ງຂ້າມ ຫຼື ດ້ອຍໂອກາດ.
- ມາດຕະຖານຊຸມຊົນບັງຄັບໃຊ້ເທິງແພັດຟອມແນວໃດ?
ນະໂຍບາຍຂອງພວກເຮົາມີປະສິດທິຜົນເຊັ່ນດຽວກັບການບັງຄັບໃຊ້ຂອງພວກເຮົາ; ເຊິ່ງພວກເຮົານຳໃຊ້ຮູບການແບບປະສົມປະສານທີ່ປະກອບດ້ວຍ ການລາຍງານຈາກຊຸມຊົນຂອງພວກເຮົາ, ການກວດສອບໂດຍມະນຸດ ແລະ ເຕັກໂນໂລຊີ ເພື່ອລະບຸ ແລະ ກອດສອບເນື້ອຫາອີງຕາມມາດຕະຖານຂອງພວກເຮົາ. ທຸກສິ່ງທຸກຢ່າງເທິງ Facebook ແມ່ນສາມາດຖືກລາຍງານໄດ້ເຊັ່ນ: ເພດຈ, ປະຫວັດສ່ວນບຸກຄົນ, ໂພດສ, ຮູບພາບ, ຄຳຄິດເຫັນ – ແລະ ທຸກຄົນສາມາດລາຍງານເນື້ອຫາໃຫ້ແກ່ພວກເຮົາໄດ້ ຖ້າພວກເຂົາຄິດວ່າມັນລະເມີດມາດຕະຖານຂອງພວກເຮົາ.
ນອກຈາກການກວດສອບໂດຍມະນຸດທີ່ມີຄວາມສຳຄັນຢ່າງຍິ່ງໃນການບັງຄັບໃຊ້ມາດຕະຖານຂອງພວກເຮົາ ເຊິ່ງພາບໂດຍລວມທີ່ຢູ່ເບື້ອງຫຼັງຂອງເນື້ອຫາຕ່າງໆແມ່ນມີຄວາມສຳຄັນ (ຕົວຢ່າງ: ຄຳເວົ້າທີ່ກຽດຊັງ), ພວກເຮົາຍັງນໍາໃຊ້ປັນຍາປະດິດ ເພື່ອກວດຈັບເນື້ອຫາທີ່ມີການລະເມີດເທິງ Facebook ແລະ Instagram, ແລະພວກເຮົາມີຄວາມໝັ້ນໃຈພຽງພໍວ່າເຕັກໂນໂລຊີຂອງພວກເຮົາສາມາດລຶບເນື້ອຫາທີ່ລະເມີດມາດຕະຖານໄດ້ໂດຍອັດຕະໂນມັດ. 95% ຂອງເນື້ອຫາທີ່ກ່ຽວກັບການສ້າງຄວາມກຽດຊັງຢ່າງເປັນລະບົບ, ອາວຸດປືນ, ຮູບພາບໂປ້ເປືອຍຂອງຜູ້ໃຫຍ່ ແລະ ກິດຈະກຳທາງເພດ, ການຄ້າຂາຍຢາເສບຕິດ, ການຂ້າຕົວຕາຍ ແລະ ການທຳຮ້າຍຕົວເອງ, ບັນຊີປອມ, ການໂຄສະນາການກໍ່ການຮ້າຍ, ຮູບພາບໂປ້ເປືອຍຂອງເດັກ ແລະ ການສະແຫວງຫາຜົນປະໂຫຍດຈາກພວກເຂົາ ລວມໄປເຖິງເນື້ອຫາຮຸນແຮງທາງຮູບພາບວິດີໂອ ທີ່ພວກເຮົາລຶບອອກຈາກ Facebook ແມ່ນຖືກພົບເຫັນແບບຈິງຈັງໂດຍການນຳໃຊ້ເຕັກໂນໂລຊີ.
- Facebook ສາມາດກວດສອບເນື້ອຫາທີ່ເປັນພາສາລາວໄດ້ບໍ?
ພວກເຮົາມີພະນັກງານຫຼາຍກວ່າ 35,000 ຄົນ ຮັບຜິດຊອບໜ້າທີ່ດ້ານຄວາມປອດໄພ ແລະ ຄວາມໝັ້ນຄົງຢູ່ທີ່ Facebook, ເຊິ່ງໃນຈຳນວນດັ່ງກ່າວ ມີປະມານ 15,000 ຄົນ ຮັບຜິດຊອບໜ້າທີ່ດ້ານກວດສອບເນື້ອຫາ. ທີມຂອງພວກເຮົາເຮັດວຽກ 24ຊົ່ວໂມງຕໍ່ມື້ໃນຫຼາຍກວ່າ 50ພາສາ ເພື່ອກວດສອບເນື້ອຫາທີ່ຂັດແຍ່ງກັບນະໂຍບາຍຂອງພວກເຮົາ ເຊິ່ງກວມເອົາພາສາທີ່ໃຊ້ຢ່າງກວ້າງຂວາງໃນຊຸມຊົນ, ພວກເຮົາຍັງສາມາດກວດສອບເນື້ອຫາທີ່ເປັນພາສາລາວໄດ້ອີກດ້ວຍ. ນອກຈາກນີ້, ພວກເຮົາຍັງເຮັດວຽກຮ່ວມກັບຫຼາຍຄູ່ຮ່ວມງານໃນທົ່ວໂລກເພື່ອແປ ແລະ ຂະຫຍາຍຄວາມສາມາດດ້ານພາສາໃນແຕ່ລະທ້ອງຖິ່ນ, ແລະສິ່ງສຳຄັນແມ່ນເນື້ອຫາທີ່ຖືກລາຍງານຈໍານວນຫຼາຍກໍບໍ່ຈໍາເປັນອາໄສພາສາໃນການກວດສອບ, ຕົວຢ່າງ: ການໂປ້ເປືອຍ, ກິດຈະກຳທາງເພດ, ແລະ ບັນຊີປອມ.
- ເປັນຫຍັງເນື້ອຫາທີ່ເຮົາລາຍງານຈຶ່ງບໍ່ຖືກລຶບອອກ?
ສິ່ງທີ່ສຳຄັນທີ່ສຸດທີ່ເຮົາສາມາດເຮັດໄດ້ເມື່ອພົບເຫັນເນື້ອຫາເທິງ Facebook ທີ່ລະເມີດມາດຕະຖານຊຸມຊົນຂອງພວກເຮົາແມ່ນການລາຍງານໂດຍນໍາໃຊ້ເຄື່ອງໝາຍ ສາມຈໍ້າ ທີ່ຢູ່ດ້ານຂວາຂອງໂພສ ແລະ ກົດເຂົ້າໄປທີ່ “ຄົ້ນຫາການສະໜັບສະໜູນ ຫຼື ລາຍງານໂພສ”. ພຽງແຕ່ລາຍງານດຽວກໍ່ພຽງພໍແລ້ວ ສຳລັບພວກເຮົາທີ່ຈະລຶບເນື້ອຫາອອກຖ້າຫາກມີການລະເມີດນະໂຍບາຍຂອງພວກເຮົາ – ພວກເຮົາບໍ່ໄດ້ລຶບເນື້ອຫາ ພຽງແຕ່ວ່າເນື້ອຫາດັ່ງກ່າວຖືກລາຍງານຈຳນວນຫຼາຍຄັ້ງ.
ບໍ່ແມ່ນວ່າທຸກເນື້ອຫາທີ່ຜູ້ຄົນຄິດວ່າບໍ່ເໝາະສົມ ຫຼື ເຮັດໃຫ້ບໍ່ພໍໃຈ ຈະລະເມີດນະໂຍບາຍຂອງພວກເຮົາ. ດັ່ງນັ້ນ, ພວກເຮົາຈຶ່ງນຳສະເໜີແນວທາງແກ່ຜູ້ຄົນໃຫ້ສາມາດປັບແຕ່ງ ແລະ ຄວບຄຸມສິ່ງທີ່ພວກເຂົາເຫັນໄດ້ໂດຍການຍົກເລີກຕິດຕາມ, ການປິດກັ້ນ ແລະ ການງົດຮັບຂ່າວສານຈາກຜູ້ຄົນຊົ່ວຄາວ ລວມໄປເຖິງການເຊື່ອງບໍ່ໃຫ້ເຫັນໂພດສ, ບຸກຄົນ ແລະ ເພຈ.