ການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (COVID-19)ໃນປະຈຸບັນແມ່ນ ຍັງສຶບຕໍ່ແຜ່ຂະຫຍາຍເປັນວົງກ້ວາງ ເຮັດໃຫ້ອັດຕາການຕິດເຊື້ອ ແລະ ເສຍຊີວິດ ເພີ້ມຂຶ້ນຢ່າງໄວວາ
ສປປ ລາວ ກໍເປັນປະເທດໜຶ່ງທີ່ກຳລັງປະເຊີນກັບສະພາບການລະບາດຂອງພະຍາດ COVID-19 ເຊິ່ງເຮັດໃຫ້ມີຜົນກະທົບ ຕໍ່ສຸຂະພາບ ແລະ ການດຳລົງຊີວິດຂອງປະຊາຊົນລາວບັນດາເຜົ່າສົ່ງຜົນສະທ້ອນຕໍ່ການພັດທະນາ ເສດຖະກິດ ສັງຄົມຂອງຊາດ ຢ່າງຮ້າຍແຮງຕໍ່ບັນຫາດັ່ງກ່າວ ພັກ ແລະ ລັດຖະບານ ໄດ້ກຳນົດ ແລະ ວາງມາດຕະການໃນການຮັບມື ເພື່ອ ປ້ອງກັນ, ຄວບຄຸມ ແລະ ແກ້ໄຂບັນຫາການແຜ່ລະບາດຂອງພະຍາດ ບໍ່ວ່າຈະເປັນມາດຕະການດ້ານສາທາລະນະສຸກ ແລະ ສັງຄົມ ແຕ່ເຖິງຢ່າງໃດກໍ່ຕາມ, ອີງໃສ່ການພັດທະນາຂອງພະຍາດ ແລະ ຄວາມຮ້າຍແຮງໃນການແຜ່ກະຈາຍເຊື້ອເຮັດໃຫ້ຈໍານວນຜູ້ຕິດເຊື້ອເພີ່ມຂຶ້ນຢ່າງຮຸນແຮງ ທັງຈາກກໍລະນີນຳເຂົ້າ ແລະ ການຕິດເຊື້ອໃນຊຸມຊົນ, ດັ່ງນັ້ນ, ຕໍ່ກັບການຮັບມື ການລະບາດເຫັນໄດ້ວ່າບໍ່ແມ່ນພຽງແຕ່ຄວາມຮັບຜິດຊອບທາງດ້ານວິຊາການ ແຕ່ຄວາມເປັນເຈົ້າການຂອງທຸກພາກສ່ວນ ອົງການປົກຄອງທ້ອງຖິ່ນທຸກຂັ້ນ ຈິ່ງມີຄວາມສໍາຄັນຫຼາຍເພື່ອຕິດຕາມ, ກວດກາ ແລະ ປະສານງານຢ່າງໄກ້ຊິດ ແລະ ທັນການ.
ໃນຂະນະທີ່ລັດຖະບານພວມສືບຕໍ່ພັດທະນາຂີດຄວາມສາມາດ ເພື່ອຮອງຮັບຜູ້ຕິດເຊື້ອພະຍາດ COVID-19 ຢູ່ ໃນບັນດາໂຮງໝໍ ແລະ ສະຖານທີ່ແຍກປ່ຽວ ເພື່ອຕິດຕາມ ແລະ ໃຫ້ການປິ່ນປົວ, ແຕ່ຖ້າຈຳນວນຜູ້ຕິດເຊື້ອຍັງຈະສືບຕໍ່ເພີ່ມຂຶ້ນ ອາດເປັນສິ່ງທ້າທາຍຕໍ່ສະຖານທີ່ບໍລິການປິ່ນປົວເຫຼົ່ານັ້ນ ແລະ ມີຄວາມຈໍາເປັນຕ້ອງໄດ້ພິຈາລະນາຮູບແບບການຕິດຕາມ ສຸຂະພາບຜູ້ຕິດເຊື້ອຢູ່ເຮືອນ ໂດຍອີງໃສ່ສະພາບຂອງຜູ້ຕິດເຊື້ອ ແລະ ເງື່ອນໄຂຂອງສະຖານທີ່ທີ່ຕິດຕາມຢ່າງເໝາະສົມ
ຄູ່ມືແນະນໍາສໍາລັບການຕິດຕາມສຸຂະພາບຕົນເອງຢູ່ເຮືອນ ແລະ ຊຸມຊົນສໍາລັບຜູ້ຕິດເຊື້ອພະຍາດ COVID-19 ທີ່ບໍ່ມີອາການ ຫຼື ມີອາການເບົາບາງ ໄດ້ສ້າງຂຶ້ນເພື່ອເປັນບ່ອນອີງ ໃຫ້ບັນດາແຂວງ ແລະ ເມືອງ ໃນການຈັດຕັ້ງປະຕິບັດການຮອງຮັບໃນກໍລະນີຜູ້ຕິດເຊື້ອພະຍາດ COVID-19 ຫຼາຍເກີນຂີດຄວາມສາມາດໃນການຮອງຮັບຢູ່ໃນສະຖານທີ່ບໍລິການ ປິ່ນປົວ ເຊິ່ງມີຈຸດປະສົງ ໃຫ້ຜູ້ໃຫ້ບໍລິການ ດ້ານສາທາລະນະສຸກ, ຜູ້ຊ່ຽວຊານດ້ານອື່ນໆ, ອາສາສະໝັກ, ສະມາຊິກຄອບຄົວ ທີ່ຕ້ອງການຕິດຕາມສຸຂະພາບຜູ້ຕິດເຊື້ອພະຍາດ COVID-19 ຢູ່ເຮືອນ. ເນື້ອໃນຄູ່ມືແມ່ນໄດ້ແນະນຳກ່ຽວກັບ:
- ຜູ້ທີ່ສາມາດຕິດຕາມສຸຂະພາບຕົນເອງຢູ່ເຮືອນ ແລະ ການຈັດບຸລິມະສິດ ຜູ້ທີ່ຄວນໄດ້ຮັບການຕິດຕາມ ແລະ ປິ່ນປົວຢູ່ໃນໂຮງໝໍ ແລະ ໂຮງໝໍພາກສະໜາມ
- ວິທີຕິດຕາມສຸຂະພາບຮ່າງກາຍ ແລະ ຈິດໃຈຂອງຜູ້ຕິດເຊື້ອ
- ວິທີປ້ອງກັນສະມາຊິກໃນຄອບຄົວ ເພື່ອບໍ່ໃຫ້ມີການຕິດເຊື້ອພະຍາດເພີ່ມ
- ເວລາ ໃດທີ່ຄວນຕິດຕໍ່ຫາສະຖານທີ່ປິ່ນປົວ ໃນການນໍາສົ່ງຜູ້ຕິດເຊື້ອເພື່ອປ້ອງກັນການຊັກຊ້າໃນການຊ່ວຍເຫຼືອ
ພວກເຮົາເຊື່ອວ່າການມີຂໍ້ມູນທີ່ຖືກຕ້ອງກ່ຽວກັບການຕິດຕາມສຸຂະພາບຜູ້ຕິດເຊື້ອ ຈະປະກອບສ່ວນຊ່ວຍປ້ອງ ກັນການຈຳແນກລັງກຽດ ຜູ້ທີ່ຕິດເຊື້ອ. ດັ່ງນັ້ນ, ພວກເຮົາຫວັງວ່າຄູ່ມືນີ້ ຈະກະຕຸ້ນຊຸມຊົນໃຫ້ການສະໜັບສະໜູນ ທາງດ້ານ ຈິດໃຈແກ່ຜູ້ຕິດເຊື້ອ ແລະ ຄອບຄົວ ໂດຍຜ່ານຄວາມຮັບຮູ້ທີ່ຖືກຕ້ອງ ແລະ ບໍ່ມີການຈໍາແນກລັງກຽດເຊີ່ງກັນ ແລະ ກັນໃນ ສັງຄົມ
