ປັດຈຸບັນ ການເພີ່ມຂຶ້ນ ຂອງລາຄາຊີ້ນໝູຢູ່ບ້ານເຮົາ ກຳລັງເປັນກະແສສັງຄົມບໍ່ໜ້ອຍ ເຮັດໃຫ້ຜູ້ບໍລິໂພກໝູ ບາງສ່ວນ ຕ້ອງໄດ້ປ່ຽນເມນູອາຫານທີ່ເຮັດ ຈາກໝູ ໄປບໍລິໂພກອາຫານປະເພດອື່ນແທນ ເນື່ອງຈາກລາຄາໝູທີ່ສູງຂຶ້ນ.
ຜູ້ບໍລິໂພກຊີ້ນໝູທ່ານໜຶ່ງ ໄດ້ໃຫ້ເຫດຜົນກ່ຽວກັບ ການປັບຂຶ້ນຂອງລາຄາຊີ້ນໝູ ວ່າ: ເພິ່ນເປັນຄົນໜຶ່ງທີ່ບໍລິໂພກຊີ້ໝູເປັນປະຈຳ ແຕ່ຖ້າຊີ້ໝູແພງຂຶ້ນຫຼາຍ ກໍຈະຫັນໄປບໍລິໂພກອາຫານຢ່າງອື່ນແທນ ເຊັ່ນ ປາ, ຜັກ ຫຼື ຫຼຸດປະລິມານການຊື້ໝູລົງ ຈາກທີ່ເຄີຍຊື້ຫຼາຍ ເປັນຊື້ໜ້ອຍລົງ, ແຕ່ແນວໃດ ກໍເຫັນໃຈທັງສອງຝ່າຍ ທັງຜູ້ຊື້ ແລະ ຜູ້ຂາຍ, ໃນນາມທີ່ເປັນຜູ້ຊື້ ຜູ້ຂາຍ ຖ້າຂາຍແພງຫຼາຍ ຄົນກໍບໍ່ໍຢາກຊື້, ສ່ວນຜູ້ຂາຍເອງ ຖ້າຂາຍຖືກຫຼາຍກໍບໍ່ມີກຳໄລ ເພາະການກຳນົດລາຄາຂາຍແມ່ນປັບໄປຕາມຕົ້ນທຶນ ແຕ່ທາງທີ່ດີແມ່ນຢາກໃຫ້ພາກສ່ວນທີ່ກ່ຽວຂ້ອງມາຄວມຄຸມລາຄາ ບໍ່ຢາກໃຫ້ພໍ່ຄ້າ-ແມ່ຄ້າປັບຂຶ້ນເອົາເອງ.
ໃນສ່ວນຂອງແມ່ຄ້າ ຈາກການໃຫ້ຂໍ້ມູນຂອງ ແມ່ຄ້າຂາຍຊີ້ນໝູ ທ່ານໜຶ່ງທີ່ ຕະຫຼາດໂນນຄໍ້, ເມືອງ ໄຊເສດຖາ, ນະຄອນຫຼວງ ວຽງຈັນ ໃຫ້ຮູ້ວ່າ: ໃນໄລຍະປີໃໝ່ ຫຼື ມີເທດສະການທີ່ສຳຄັນ ຂອງແຕ່ລະປີ ລາຄາຊີ້ນໝູ ແມ່ນຈະມີການເພີ່ມຂຶ້ນ ເນື່ອງຈາກນາຍຮ້ອຍທີ່ສົ່ງໝູໜ້າຂຽງ ໄດ້ປັບລາຄາສົ່ງໝູຂຶ້ນ ເຮັດໃຫ້ແມ່ຄ້າຈຳເປັນຕ້ອງໄດ້ປັບລາຄາຂາຍຂຶ້ນໄປນຳ ເຊິ່ງຈະມີລາຄາຂາຍຊີ້ນໝູປະເພດ 1 ຢູ່ທີ່ປະມານ 48.000 – 50.000 ກີບຕໍ່ກິໂລ ແລະ ຊີ້ນໝູປະເພດ 2 ຈະມີລາຄາຂາຍຢູ່ທີ່ປະມານ 43.000 – 45.000 ກີບຕໍ່ກິໂລ.
ອີງຕາມແຈ້ງການ ຈາກ ພະແນກ ອຸດສາຫະກຳ ແລະ ການຄ້າ, ນະຄອນຫຼວງ ວຽງຈັນ ທີ່ໄດ້ອອກຂໍ້ກຳນົດກ່ຽວກັບລາຄາຊີ້ນໝູ ໃນປີທີ່ຜ່ານມາ ວ່າ: ການກຳນົດລາຄາຂາຍຊີ້ນໝູ ແມ່ນໄດ້ກຳນົດລາຄາຂາຍເປັນ 2 ປະເພດ ຄື:
- ຊີ້ນໝູປະເພດ 1 ຂາຍລາຄາ ສູງສຸດບໍ່ໃຫ້ເກີນ 48.000 ກີບ ຕໍ່ກິໂລ.
- ຊີ້ນໝູປະເພດ 2 ຂາຍລາຄາ ສູງສຸດບໍ່ໃຫ້ເກີນ 44.000 ກີບ ຕໍ່ກິໂລ.
ສຳລັບລາຄາໝູໜ້າຟາມ ກຳນົດໃຫ້ມີລາຄາ ຊື້-ຂາຍ ບໍ່ໃຫ້ເກີນ 28.500 ກີບ ຕໍ່ກິໂລ, ສ່ວນລາຄາຂາຍຍົກໝູໝົດໂຕ ທີ່ໄດ້ຂ້າ, ຄົວ ຫຼື ແຍກເປັນຊີ້ນລວມ, ນາຍຮ້ອຍສົ່ງ ເຖິງລູກຂຽງຮອດຕະຫຼາດ ກຳນົດລາຄາ ຂາຍສູງສຸດບໍໃຫ້ເກີນ 34.000 ກີບ ຕໍ່ກິໂລ.
ເຖິງຢ່າງໃດກໍຕາມ ໃນປີ 2022 ນີ້ ຍັງບໍ່ມີແຈ້ງການໃໝ່ອອກມາຕື່ມ ກ່ຽວກັບການກຳນົດລາຄາຊີ້ນໝູເທື່ອ. ແຕ່ສະພາບຄວາມເປັນຈິງແລ້ວ ລາຄາຊີ້ນໝູຕາມທ້ອງຕະຫຼາດແມ່ນສູງກວ່າລາຄາທີ່ກຳນົດໄວ້.
