ຫ້ອງວ່າການສຳນັກງານນາຍົກລັດຖະມົນຕີ ໄດ້ແຈ້ງເຖິງທິດຊີ້ນຳຂອງກອງປະຊຸມກົມການເມືອງສູນກາງພັກ ຮ່ວມກັບຄະນະເລຂາທິການສູນກາງພັກ ເຫັນດີໃຫ້ເປີດການທ່ອງທ່ຽວສີຂຽວ ຕາມແຜນການທີ່ໄດ້ກະກຽມໄວ້
ມອບໃຫ້ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ 19 ສົມທົບກັບພາກສ່ວນກ່ຽວຂ້ອງ ຄົ້ນຄວ້າຄືນມາດຕະການຕ່າງໆ ທີ່ໄດ້ກໍານົດອອກມານັ້ນ ແລະ ແຜນການຮັບມືໃນການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດ ໄດ້ຢ່າງທັນກາ
ພ້ອມນັ້ນ ກໍຍັງໄດ້ຄົ້ນຄວ້າກ່ຽວກັບມາດຕະການຜ່ອນຜັນ ດັ່ງນີ້:
- ຄົ້ນຄວ້າກ່ຽວກັບການອະນຸມັດໃຫ້ຜູ້ທີ່ຈະເດີນທາງເຂົ້າມາ ສປປ ລາວ ໂດຍສະເພາະແມ່ນນັກທຸລະກິດ, ພະນັກງານຜູ້ປະກອບການ ແລະ ອື່ນໆ ເພື່ອເປັນການດຶງດູດ ແລະ ຊຸກຍູ້ການດຳເນີນທຸລະກິດ ແລະ ການລົງທຶນຕ່າງໆ ໃຫ້ສາມາດດຳເນີນໄດ້ຕາມແຜນການ.
- ຄົ້ນຄວ້າກ່ຽວກັບມາດຕະການຜ່ອນຜັນໃຫ້ກັບກິດຈະການຕ່າງໆ ທີ່ບໍ່ມີຄວາມສ່ຽງ ໂດຍໃຫ້ຄົ້ນຄວ້າ ແລະ ກໍານົດມາດຕະການຜ່ອນຜັນຢ່າງຈະແຈ້ງ, ຮອບຄອບ ແລະ ຮັບປະກັນ ເພື່ອສົ່ງເສີມການທໍາມາຫາກິນພາຍໃນປະເທດເຮົາ ໃຫ້ມີຄວາມຄ່ອງຕົວຫຼາຍຂຶ້ນໃນນັ້ນ
- ເດັດຂາດບໍ່ອະນຸຍາດໃຫ້ຜ່ອນຜັນບັນດາຮ້ານບັນເທິງ, ຮ້ານກິນດື່ມ, ຄາລາໂອເກະ ແລະ ສະຖານທີ່ອື່ນໆ ທີ່ເຫັນວ່າຍັງມີຄວາມສ່ຽງສູງຢູ່ ທີ່ຈະພາໃຫ້ເກີດມີການແຜ່ລະບາດພະຍາດ ເປັນວົງກວ້າງ ແລະ ບໍ່ສາມາດຄວບຄຸມໄດ້ “ກໍລະນີເກີດມີການລະບາດໜັກ ແລະ ແຜ່ກະຈາຍເປັນວົງກວ້າງ ກໍ່ໃຫ້ຮີບຮ້ອນ ດຳເນີນການປະເມີນ ຄວາມສ່ຽງ ແລະ ວາງມາດຕະການຮັບ, ຄວບຄຸມ ແລະ ແກ້ໄຂໃຫ້ທັນການ”.
ໃຫ້ກະຊວງສາທາລະນະສຸກ ເປັນໃຈກາງສົມທົບກັບພາກສ່ວນກ່ຽວຂ້ອງ ຈັດຕັ້ງປະຕິບັດເພີ່ມທະວີການຈັດຕັ້ງປະຕິບັດວຽກງານ ທີ່ມີຄວາມຈຳເປັນໃນໄລຍະນີ້ ເປັນຕົ້ນແມ່ນ: ການປິ່ນປົວ ແລະ ການກວດຫາເຊື້ອ ໂດຍໃຫ້ພາກເອກະຊົນມີສ່ວນຮ່ວມຕື່ມ ທັງໃຫ້ມີການໂຄສະນາ ຮູບແບບຕ່າງໆ ໃຫ້ກວ້າງຂວາງ ແລະ ມີສະຕິລະວັງຕົວສູງຂຶ້ນ ໃນການດຳລົງຊີວິດປົກກະຕິແບບໃໝ່ (New normal).
