ເມື່ອຕົ້ນເດືອນ ມັງກອນ 2022 ທີ່ຜ່ານມາ ກະຊວງສາທາລະນະສຸກຂອງໄທ ໄດ້ປະເມີນສະຖານະການຂອງໂຣກ ໂຄວິດ-19 ພາຍໃນປະເທດວ່າ ເລີ່ມມີຄວາມຊົງຕົວ ພາຍຫຼັງທີ່ມີການຕິດເຊື້ອສູງຂຶ້ນຕັ້ງແຕ່ປີໃໝ່ ແລະ ມີທ່າອ່ຽງທີ່ຈະກາຍເປັນໂຣກປະຈຳຖິ່ນໄດ້ພາຍໃນປີ 2022 ນີ້ ໂດຍພິຈາລະນາຈາກ 3 ປັດໄຈ ຫຼັກຄື:
- ເຊື້ອໂຣກມີຄວາມຮຸນແຮງຫຼຸດລົງ ເຊິ່ງສອດຄ່ອງກັບການແພ່ລະບາດຂອງສາຍພັນ ໂອມິຄຣອນ ໃນຕອນນີ້ ທີ່ເຊື້ອມີຄວາມຮຸນແຮງຫຼຸດລົງ ເຫັນໄດ້ຈາກ ເຖິງຈະມີຜູ້ຕິດເຊື້ອຈຳນວນ ຫຼາຍ ແຕ່ຈຳນວນຜູ້ປ່ວຍອາການໜັກ ທີ່ໃຊ້ເຄື່ອງຊ່ວຍຫາຍໃຈ ແລະ ຜູ້ປ່ວຍເສຍຊີວິດມີທິດທາງຫຼຸດລົງ.
- ປະຊາຊົນ ມີພູມຄຸ້ມກັນຕໍ່ໂຣກຫຼາຍຂຶ້ນ.
- ລະບົບບໍລິຫານຈັດການ ການເບິ່ງແຍງ, ປິ່ນປົວ ທີ່ມີປະສິດທິພາບ ແລະ ຄວບຄຸມການລະບາດໄດ້ດີ.
ທັງນີ້, ການທີ່ໂຣກ ໂຄວິດ-19 ຈະເຂົ້າສູ່ໂຣກປະຈຳຖິ່ນໄດ້ ທຸກຝ່າຍຕ້ອງຮ່ວມມືກັນຢ່າງຕໍ່ເນື່ອງ ໂດຍກະຊວງສາທາລະນະສຸກ ຈະພະຍາຍາມຊະລໍການລະບາດຂອງໂຣກ ພ້ອມກັບການເລັ່ງສັກວັນຊີນປ້ອງກັນ ໂຄວິດ-19 ໃຫ້ກັບປະຊາຊົນທົ່ວປະເທດ, ໂດຍສະເພາະ ແມ່ນການສັກວັກຊີນເຂັມກະຕຸ້ນ ເພື່ອເພີ່ມພູມຄຸ້ມກັນ.
ແຕ່ທີ່ສຳຄັນ ຕ້ອງເຮັດຄວາມເຂົ້າໃຈວ່າ ເມື່ອໂຣກ ໂຄວິດ-19 ປ່ຽນໄປຈາກເດີມ ມີຄວາມຮຸນແຮງຫຼຸດລົງ ຜູ້ຕິດເຊື້ອສ່ວນໃຫຍ່ບໍ່ມີອາການ ຫຼື ມີອາການໜ້ອຍຫຼາຍ, ຮູບແບບການເບິ່ງແຍງປິ່ນປົວ ຈຶ່ງແຕກຕ່າງກັນກັບການແຜ່ລະບາດໃນໄລຍະກ່ອນ ໂດຍມາໃຊ້ການປອິ່ນປົວຢູ່ທີ່ບ້ານ (Home Isolation) ຫຼື ໃນຊຸມຊົນ (Community Isolayion) ເປັນລຳດັບທຳອິດ, ມີຢາ, ເຄື່ອງມືການແພດ, ມີທີມງານບຸກຄະລາກອນສາທາລະນະສຸກ ຕິດຕາມອາການຢ່າງຕໍ່ເນື່ອງ ແລະ ມີການກະກຽມຕຽງໃນໂຮງໝໍໄວ້ຮອງຮັບຫາກອາການຫຼາຍຂຶ້ນ ພ້ອມສົ່ງຕໍ່ທັນທີ ຈຶ່ງວາງໃນໄດ້ວ່າຫາກຕິດເຊື້ຶອກໍຍັງໄດ້ຮັບການເບິ່ງແຍງຕາມມາດຕະຖານໄດ້ຄືເກົ່າ.
ສຳລັບການລະບາດຂອງໂຣກຕິດຕໍ່ມີ 4 ລະດັບຄື:
- ໂຣກປະຈຳຖິ່ນ (Endemic) ຄືໂຣັກທີ່ເກີດຂຶ້ນປະຈຳໃນພື້ນທີ່ ອາດເປັນເມືອງ, ປະເທດ, ກຸ່ມປະເທດ ຫຼື ທະວີບ ມີອັດຕາປ່ວຍຄົງທີ່ ແລະ ຄາດການໄດ້ ເຊັ່ນ: ໄຂ້ຫວັດໄຫຍ່, ໄຂ້ເລືອດອອກ ເປັນຕົ້ນ.
- ການລະບາດ (Outbreak) ຄືເຫດການທີ່ມີຜູ້ປ່ວຍເພີ່ມຂຶ້ນຜິດປົກກະຕິ ທັງກໍລະນີໂຣກປະຈຳຖິ່ນ ທີ່ມີຈຳນວນຜູ້ປ່ວຍຫຼາຍກວ່າທີ່ຄາດການໄວ້ ຫຼື ກໍລະນີທີ່ເກີດໂຣກຂຶ້ນມາໃໝ່.
- ໂຣກລະບາດ (Epidemic) ຄື ມີການແຜ່ກະຈາຍຂອງໂຣກກວ້າງຂຶ້ນ ໃນລັກສະນະພູມສາດຢ່າງໄວ ຈຳນວນຜູ້ຕິດເຊື້ອເກີນກວ່າທີ່ຄາດການເອົາໄວ້.
- ການລະບາດໃຫຍ່ (Pandemic) ຄືລະດັບການແຜ່ລະບາດໄປທົ່ວໂລກ ເຊັ່ນ ການແຜ່ລະບາດຂອງໄຂ້ຫວັດໃຫຍ່ ສາຍພັນໃໝ່ 2009 ແລະ ຫຼ້າສຸດກໍຄື ການລະບາດຂອງໂຣກ ໂຄວິດ-19.
ສຳລັບປະເທດລາວ ຍັງບໍ່ທັນມີການຖະແຫຼງຂ່າວກ່ຽວກັບເລື່ອງນີ້ເທື່ອວ່າ ຈະເອີ້ນໂຣກ ໂຄວິດ-19 ເປັນໂຣກປະຈຳຖິ່ນ ໃນ ລາວ ຫຼື ບໍ່?, ແຕ່ໃນໄລຍະຜ່ານມາ ກໍມີຫຼາຍພາກສ່ວນໄດ້ປຶກສາຫາລື ໃນການຍົກລະດັບການປ້ອງກັນ ແລະ ໄດ້ກະກຽມການຮັບມືກັບຜູ້ປ່ວຍ ໂຄວິດ-19 ຢູ່ເປັນປະຈຳ.
ທີ່ມາ: https://bit.ly/34etQvR
