ໃກ້ຈະຮອດເທດສະການ ວັນແຫ່ງຄວາມຮັກ ກັນແລ້ວ ພໍ່ຄ້າ-ແມ່ຄ້າ ພາຍໃນ ນະຄອນຫຼວງ ວຽງຈັນ ຕ່າງກໍພາກັນກະກຽມເອົາດອກໄມ້ຊະນິດຕ່າງອອກມາວາງຈຳໜ່າຍ ໂດຍສະເພາະແມ່ນຢູ່ໃນເຂດເສັ້ນທາງບ້ານ ດົງປ່າລານ ຫາ ບ້ານ ໂພນສີນວນ ຈະຄຶກຄື້ນເປັນພິເສດ ເພາະເປັນບ່ອນທີ່ຂາຍດອກໄມ້ປະຈຳຢູ່ແລ້ວ ແລະ ໃຜທີ່ກາຍໄປກາຍມາເຂດນີ້ ກໍຄົງຈະເຫັນວ່າມີດອກໄມ້ຫຼາກຫຼາຍຊະນິດວາງຂາຍຕາມແຄມທາງຢ່າງສວຍງາມ ເພື່ອຕ້ອນຮັບວັນ 14 ກຸມພາ ທີ່ຫຼາຍໆ ຄົນໃຫ້ຄວາມສຳຄັນ ແລະ ໃຊ້ເປັນມື້ພິເສດໃນການມອບຄວາມຮັກໃຫ້ ກັນ ແລະ ກັນ.
ແມ່ມາຍ ເຈົ້າຂອງ ຮ້ານຂາຍດອກໄມ້ my Flowers ໄດ້ໃຫ້ສໍາພາດກັບທີມຂ່າວ ອິນໄຊລາວ ວ່າ:ເພິ່ນເປີດ ຮ້ານຂາຍດອກໄມ້ ມາຫຼາຍປີແລ້ວ ຂາຍທຸກມື້ ທຸກໆ ເທດສະການ ບໍ່ສະເພາະເເຕ່ ວັນແຫ່ງຄວາມຮັກ ເທົ່ານັ້ນ, ເຊິ່ງການຂາຍດອກໄມ້ໃນ ວັນແຫ່ງຄວາມຮັກ ແຕ່ລະປີກໍຈະໄດ້ຂາຍດີຢູ່ເເລ້ວ ເພາະເປັນມື້ສໍາຄັນຂອງຄວາມຮັກ ຫຼາຍຄົນກໍມາຊື້ໃຫ້ແຟນ ເຖິງວ່າປີນີ້ ຈະມີການແຜ່ລະບາດຂອງພະຍາດ ໂຄວິດ-19 ແຕ່ບັນຍາກາດການຂາຍດອກໄມ້ໃນຊ່ວງກ່ອນ ວັນແຫ່ງຄວາມຮັກ ກໍຍັງຄົງຄຶກຄັກຄືກັບປີຜ່ານໆມາ ແລະ ເຫັນຫຼາຍໆ ຮ້ານກໍຖືວ່າໄດ້ຂາຍດີພໍສົມຄວນ ຖ້າທຽບໃສ່ຕອນຍັງບໍ່ມີ ໂຄວິດ.
ແມ່ມາຍ ບອກວ່າ: ຖ້າທຽບໃສ່ກັບປີຜ່ານມາ ກ່ອນທີ່ ໂຄວິດ ຍັງບໍລະບາດຫຼາຍ ຖືວ່າປີນີ້ທາງຮ້ານກໍໄດ້ນຳເອົາດອກໄມ້ມາຂາຍຫຼາຍພໍສົມຄວນ ແຕ່ການຂົນສົ່ງຂ້ອນຂ້າງຈະຊ້າກວ່າທຸກໆປີ ເລີຍໄດ້ສັ່ງມາເພື່ອໄວ້ຫຼາຍ, ໃນແຕ່ລະປີເຮົາຈະສັ່ງ 2-3 ມື້ກໍມາຮອດແລ້ວ ແລະ ຕອນນີ້ກໍເລີ່ມມີຄົນມາຊື້ດອກໄມ້ເເດ່ແລ້ວ ສ່ວນຫຼາຍແມ່ນລູກຄ້າຈະໂທມາສັ່ງ ໃຫ້ທາງຮ້ານຈັດໄວ້ໃຫ້ ແລ້ວຈຶ່ງມາຮັບເອົາ ຕອນນີ້ກໍມີປະມານ 100 ກວ່າອໍເດີແລ້ວ ເຊິ່ງທາງຮ້ານເຮົາກໍຈະຂາຍຍ່ອຍ-ຂາຍສົ່ງນໍາ ບາງຄົນກໍຊື້ໄປຂາຍຕໍ່, ບາງຄົນກໍມາຊື້ເປັນດອກເຮົາກໍຂາຍ.
ສຳລັບດອກໄມ້ທີ່ຂາຍ ກໍຈະມີປະເພດ ດອກກຸຫຼາບຂາວ, ແດງ, ເຫຼືອງ, ບົວອ່ອນໆ, ດອກໄຮເດັນເຢຍ, ເດຊີ້, ທານຕາວັນ, ລີເຊັນທ໋ອນ, ສະເປຍ, ສະເເຕຕິລ, ບັດເທີຄຣັບ, ຍິບໂຊ, ລິ້ນລີ້, ທິວລີບ, ຄາເນຊັ້ນເເດງ ແລະ ດອກຄັດເຕີ້. ແຕ່ດອກໄມ້ທີ່ໄດ້ຮັບຄວາມນິຍົມທີ່ສຸດແມ່ນດອກກຸຫຼາບ ເພາະທຸກໆ ປີແມ່ນ ດອກກຸຫຼາບ ຈະໄດ້ຂາຍດີກວ່າໝູ່.
ເຖິງສະພາບການແຜ່ລະບາດຂອງພະຍາດ ໂຄວິດ-19 ຈະມີທ່າອ່ຽງທີ່ຫຼຸດລົງກໍຕາມ ທາງຮ້ານຍັງໄດ້ເອົາໃຈໃສ່ໃນການຮັກສາມາດຕະການປ້ອງກັນໂຄວິດ-19 ຢ່າງເຂັມງວດ ເປັນຕົ້ນແມ່ນການໃສ່ຜ້າອັດປາກ-ອັດດັງ, ລ້າງມືດ້ວຍເຈວແອວກໍຮໍ ແລະ ອື່ນໆ ເພື່ອຊ່ວຍກັນເຮັດໃຫ້ພະຍາດຮ້າຍນີ້ຫາຍໄປໄວໆ ພວກເຮົາຈະໄດ້ກັບມາໃຊ້ຊີວິດແບບປົກກະຕິອີກຄັ້ງ.
Hits: 0
