ປຶ້ມ “ພິທີກອນໜ້າເວທີ MC by ME” ທີ່ຫາກໍເປີດໂຕໄປໃນວັນທີ 24 ມີນາ 2022 ຖືວ່າເປັນຜົນງານເຫຼັ້ມທີ 2 ຂອງ ສຸນິຕ້າ ພິມມະສອນ ຫຼື ຕ່າຕ້າ ຜູ້ປະກາດຂ່າວ, ພິທີກອນ ຈາກໂທລະພາບແຫ່ງຊາດລາວ, ພາຍຫຼັງທີ່ປະສົບຜົນສຳເລັດໃນການຂຽນປຶ້ມເຫຼັ້ມທຳອິດ “ອາຊີບຂອງຂ້ອຍ” ໃນປີ 2019 ທີ່ຜ່ານມາ.
ໂດຍປຶ້ມ MC by ME ແມ່ນໄດ້ຮວບຮວມເອົາປະສົບການຕົວຈິງທີ່ ຕ່າຕ້າ ໃນການເປັນພິທີກອນທີ່ເຂົາໄດ້ສຳພັດມາຕັ້ງແຕ່ຍັງນ້ອຍ ຈາກຄວາມມັກ, ຮັກ ແລະ ມີຄວາມຕັ້ງໃຈ ຈົນປະສົບຜົນສຳເລັດກ້າວຂຶ້ນມາເປັນພິທີກອນລະດັບຊາດໄດ້.
ຕ່າຕ້າ ກ່າວວ່າ ປຶ້ມເຫຼັ້ມນີ້ເຂົາໃຊ້ເວລາໃນການຂຽນ 1 ປີ ຈາກເວລາຫວ່າງ ເຊິ່ງມີທັງໝົດຢູ່ 158 ໜ້າ ປະກອບໄປດ້ວຍຄວາມສຳຄັນ ແລະ ໜ້າທີ່ຂອງການເປັນພິທີກອນ, ການກຽມໂຕກ່ອນຂຶ້ນເວທີ, ການສ້າງຄວາມໝັ້ນໃຈໃນການເວົ້າ, ການຂຽນສະຄຣິບ, ການຮຽນຮູ້ຕ່າງໆ ລວມໄປເຖິງການແກ້ໄຂສະຖານະການສະເພາະໜ້າ.
ຕ່າຕ້າ ຖືວ່າເປມັນທັງຜູ້ປະກາດຂ່າວ ແລະ ເປັນພິທີກອນ ຂອງ ໂທລະພາບແຫ່ງຊາດລາວ ທີ່ມີຄວາມພະຍາຍາມບັນທຶກທຸກອະລິຍະບົດ ທີ່ສຳຄັນຂອງການເປັນພິທີກອນເທິງໜ້າເວທີໄດ້ຢ່າງບັນຈົງ, ເຂົາຂຽນປຶ້ມເຫຼັ້ມນີ້ຂຶ້ນມາ ເພື່ອເປັນແນວທາງໃຫ້ກັບຜູ້ທີ່ຕ້ອງໄດ້ຈັບໄມຂຶ້ນເວທີເພື່ອເຮັດໜ້າທີ່ເປັນຄົກສົກ, ພິທີກອນດຳເນີນງານໃຫ້ມີຜົນສຳເລັດ ແລະ ເປັນທີ່ປະທັບໃຈ.
ນອກຈາກນີ້, ເຂົາຍັງໄດ້ເນັ້ນໃສ່ການສ້າງລຸ້ນສືບທອດໃນການເວົ້າ, ການເປັນໂຄສົກພິທີກອນ ກໍຄືການປູພື້ນຖານໃຫ້ກັບໄວໜຸ່ມ, ຊາວໜຸ່ມ,ນັກຮຽນ-ນັກສຶກສາ ຜູ້ທີ່ມີຄວາມສົນໃຈໄດ້ສຶກສາຮຽນຮູ້ ແລະ ຝຶກຝົນໂຕເອງໂດຍຜ່ານປຶ້ມ “MC by ME”.
ຕ່າຕ້າ ບອກວ່າ: ປຶ້ມເຫຼັ້ມນີ້ ແມ່ນມີປະໂຫຍດຢ່າງຫຼວງຫຼາຍສຳລັບຜູ້ທີ່ຈະກ້າວເຂົ້າມາເປັນ “ພິທີກອນໜ້າເວທີ” ເພາະວຽກນີ້ມີຄວາມສຳຄັນ ຍ້ອນມັນຖືກນຳໃຊ້ຢ່າງກວ້າງຂວາງ ບໍ່ວ່າຈະເປັນສະຖາບັນການສຶກສາ, ບ່ອນສາທາລະນະ, ສຳນັກງານຫ້ອງການ, ຊຸມຊົນ, ເວທີ ນ້ອຍ-ໃຫຍ່ ຈົນຮອດເວທີລະດັບຊາດ ຫຼື ເວທີສາກົນກໍນຳໃຊ້ພິທີກອນໜ້າເວທີເຊັ່ນກັນ.