ປັດຈຸບັນ ມີການຄາດການວ່າ ຈຳນວນຜູ້ປ່ວຍໂຣກອັນໄຊເມີ້ ຫຼື ອາການສະໝອງເສື່ອມ ທົ່ວໂລກ ມີຫຼາຍກວ່າ 50 ລ້ານຄົນ ແລະ ໃນທຸກໆ 68 ວິນາທີ ຈະມີຜູ້ປ່ວຍຄົນໃໝ່ເພີ່ມຂຶ້ນ 1 ຄົນ. ນັກວິທະຍາສາດພົບວ່າ ໂຣກອັນໄຊເມີ້ ເກີດໄດ້ຈາກປັດໄຈຫຼາຍຢ່າງ ທັງຈາກກຳມະພັນ, ຈາກຄວາມຜິດປົກກະຕິທາງຊີວະວິທະຍາໃນສະໝອງ ຊຶ່ງຜູ້ປ່ວຍຈະເກີດຄວາມບົກພ່ອງທາງສະໝອງໃນສ່ວນຂອງສະຕິປັນຍາ ເຊັ່ນ ຄວາມຄິດ, ຄວາມຈື່ຈຳ ແລະ ການຕັດສິນໃຈ ໃນຂະນະທີ່ສະໝອງສ່ວນທີ່ກ່ຽວກັບການເຄື່ອນໄຫວຍັງໃຊ້ການໄດ້ດີ.
ຄວາມສ່ຽງທີ່ຈະເປັນໂຣກອັນໄຊເມີ້ ນັ້ນ ຈະເພີ່ມຂຶ້ນເລື້ອຍໆ ເມື່ອຄົນເຮົາອາຍຸເຂົ້າສູ່ໄວ 65 ປີຂຶ້ນໄປ ໂດຍເລີ່ມຈາກການສູນເສຍຄວາມຈື່ຈຳໄລຍະສັ້ນ ຈົນບໍ່ສາມາດຈື່ສິ່ງໃໝ່ໆໄດ້, ດົນໆໄປ ອາດຈະຈື່ເຫດການໃນອະດີດບໍ່ໄດ້ ຫຼື ອາດຈະຈື່ສິ່ງທີ່ຢູ່ຕໍ່ໜ້າບໍ່ໄດ້ເລີຍ ຄ້າຍກັບຂ່າວທີ່ເຮົາໄດ້ຍິນຢູ່ເລື້ອຍໆ ວ່າ ຜູ້ປ່ວຍອັນໄຊເມີ້ ອອກຈາກເຮືອນແລ້ວຫາຍໂຕໄປເລີຍ ເພາະຊອກທາງກັບບ້ານບໍ່ຖືກ.
ແນວໃດກໍດີ, ປັດຈຸບັນຍັງບໍ່ມີວິທີການປິ່ນປົວໂຣກອັນໄຊເມີ່ ໃຫ້ຫາຍຂາດໄດ້ ແຕ່ສາມາດຖ່ວງຄວາມເສື່ອມຂອງສະໝອງໄດ້ຕັ້ງແຕ່ມື້ເລີ່ມມີອາການດ້ວຍວິທີງ່າຍໆພຽງ 6 ວິທີ ດັ່ງຕໍ່ໄປນີ້:
- ໝັ່ນຮຽນຮູ້ສິ່ງໃໝ່ໆ ຢູ່ສະເໝີ ຄວບຄູ່ໄປກັບການອອກກຳລັງສະໝອງ ເຊັ່ນ ຫຼິ້ນເກມກັບສະໝອງຝຶກຄວາມຈື່ຈຳ, ຝຶກຄຳນວນໂຕເລກ ລວມເຖິງການຫຼິ້ນດົນຕີປະເພດຕ່າງໆ ກໍຊ່ວຍໄດ້.
- ອອກກຳລັງກາຍມີປະໂຫຍດເລື່ອງການຜ່ອນຄາຍຄວາມຕຶງຄຽດ ແລະ ຫຼຸດຄວາມສ່ຽງຂອງການເກີດໂຣກຫຼອດເລືອດ.
- ກິນອາຫານບຳລຸງສະໝອງ ໂດຍສະເພາະອາຫານທີ່ອຸດົມໄປດ້ວຍທາດເຫຼັກ, ວິຕາມິນ B12, A, C, E ແລະ ຊີລີນຽມ.
- ການເຂົ້າສັງຄົມ, ພົບປະຜູ້ຄົນ, ໂອ້ລົມ, ໂຕ້ຕອບບົດສົນທະນາຢ່າງສະໝຳ່ສະເໝີ, ບໍ່ເກັບໂຕງຽບຢູ່ຄົນດຽວ, ສາມາດຊ່ວຍຍືດອາຍຸສະໝອງໄດ້.
- ໝັ່ນກວດສອບຄວາມດັນເລືອດຢູ່ສະເໝີ ເພາະວ່າ ມັນສົ່ງຜົນກະທົບເຖິງສະໝອງໂດຍກົງ ແລະ ໃຫ້ຫຼຸດ ຫຼື ເຊົາກິດຈະກຳຕ່າງໆ ທີ່ສົ່ງຜົນຕໍ່ຄວາມດັນເລືອດໄດ້ ເຊັ່ນ ການດື່ມນຳ້ເມົາ, ການສູບຢາ ແລະ ການໃຊ້ສານເສບຕິດ.
- ນອນຫຼັບພັກຜ່ອນໃຫ້ພຽງພໍ, ບໍ່ຄວນເຂົ້ານອນເກີນ 22-23 ໂມງ ແລະ ຄວນນອນໃຫ້ໄດ້ຢ່າງໜ້ອຍ 7 ຊົ່ວໂມງຕໍ່ວັນ ໃນສະຖານທີ່ງຽບສະຫງົບ ເພື່ອໃຫ້ການນອນມີຄຸນນະພາບຫຼາຍທີ່ສຸດ.
Hits: 7
