ຄວາມຮັກຖືເປັນຄວາມສຸກທີ່ຫອມຫວານນັ້ນແມ່ນຖືເປັນນິຍາມຂອງຄວາມຮັກ ແຕ່ໃນຊີວິດຈິງຄວາມຮັກມັນບໍ່ໄດ້ຫອມຫວານຢ່າງທີ່ໃຜໆ ເຂົາຄິດກັນ ມີທັງສຸກແດ່ ທຸກແດ່ປະປົນກັນໄປ ແຕ່ຖ້າເຈົ້າຢາກມີຄວາມຮັກແບບໃດໃຫ້ມີຄວາມສຸກ ແລະບໍ່ເປັນທຸກກັບຄວາມຮັກ ຄຳແນະນຳທີ່ດີທີ່ສຸດຄື ຄວນຮັກໃຫ້ເປັນ, ຄວນເອົາໃຈເຂົາມາໃສ່ໃຈເຮົາ ຢ່າຄິດເອົາແຕ່ໃຈຕົນເອງ ຄວາມຮັກຂອງເຈົ້າກໍຈະຍືນຍາວແນ່ນອນ.
- ມີຄວາມສຸກໄດ້ດ້ວຍຕົນເອງ: ເພາະຄົນອື່ນເປັນພຽງລາງວັນທີ່ເພີ່ມເຂົ້າມາ.
- ຍອມຮັບຄວາມແຕກຕ່າງຂອງຜູ້ອື່ນ: ເພາະຖ້າຄວາມຄິດບໍ່ຄືກັນ ນັ້ນຖືເປັນເລື່ອງທຳມະຊາດ ຫາກເຂົ້າໃຈ ແລະ ຍອມຮັບໄດ້ແລ້ວ ເມື່ອເຫັນເຂົາເຮັດຕົວບໍ່ຖືກໃຈ, ບໍ່ໜ້າຮັກ, ຂີ້ຈົ່ມ, ໃຈຮ້ອນ ເຮົາກໍຈະປັບຕົວໃຫ້ເຂົ້າກັບເຂົາ ແລະ ມອບຄວາມຮັກໃຫ້ໄດ້ງ່າຍຂຶ້ນ.
- ສະແດງອອກເຖິງຄວາມຮັກ: ຖ້າຮັກແລ້ວບໍ່ສະແດງອອກອີກຝ່າຍກໍຄົງບໍ່ຮູ້ເພາະເຂົາອາດບໍ່ແມ່ນຄົນເຈົ້າສັງເກດ ສ່ວນຄວາມຕ້ອງການຂອງເຮົາ ກໍຄວນບອກເຂົາກົງໆ ບໍ່ແມ່ນຄາດຫວັງໃຫ້ຄູ່ຂອງເຮົາເປັນໝໍດູຄອຍເດົາໃຈເອົາເອງ.
- ຫຼຸດຄວາມຄາດຫວັງລົງແດ່: ຄວນຄາດຫວັງຈາກອີກຝ່າຍໃຫ້ນ້ອງລົງ ໂອກາດທີ່ເຮົາຈະສົມຫວັງກໍຫຼາຍຍິ່ງຂຶ້ນ.
- ຄວນປາຖະໜາໃຫ້ຜູ້ອື່ນເກີດຄວາມສຸກນຳ: ບໍ່ແມ່ນຄິດຮອດແຕ່ຄວາມສຸກຂອງຕົນເອງເຊັ່ນ: ເມື່ອຄົນທີ່ເຮົາຮັກບໍ່ຮັກເຮົາ ແຕ່ເຂົາມີຄວາມສຸກຂອງເຂົາ ເຖິງວ່າເຮົາຈະເສົ້າກໍຍັງຄິດໄດ້ວ່າ ຢ່າງນ້ອຍກໍໄດ້ເຫັນຄົນທີ່ເຮົາຮັກມີຄວາມສຸກ.
- ຮູ້ຈັກຍອມຮັບຄວາມປ່ຽນແປງຕ່າງໆ: ຄວາມຮັກຈຶ່ງຈະຍືນຍາວ ຫາກຄວາມຮັກທີ່ເຄີຍຫວານກັບຈືດຈາງ ກໍໝັ່ນເຕີມເຕັມຮັກກັນແດ່ ຫາກມີຫຍັງທີ່ປ່ຽນໄປຕາມການເວລາ ກໍພຽງປັບຕົວໄປນຳພ້ອມເຮັດຄວາມເຂົ້າໃຈຂອງເຫດຜົນວ່າ ເຮັດແນວໃດຮັກຈຶ່ງຈະຢູ່ລອດ.
- ບໍ່ຄວນເຮັດແຕ່ສິ່ງທີ່ຕົນເອງມັກ ຫຼື ສິ່ງທີ່ຕົນຄິດວ່າດີໃຫ້ຄົນອື່ນພຽງຢ່າງດຽວ: ແຕ່ຈະຕ້ອງເບິ່ງເຖິງຄວາມຕ້ອງການຂອງເຂົານຳຈະໄດ້ບໍ່ຕ້ອງມານ້ອຍໃຈວ່າ ເຮົາອົດສາຫວັງດີ ອິດເມື່ອຍເຮັດເພື່ອເຂົາ ແຕ່ເຂົາຊ້ຳພັດບໍ່ເຫັນຄຸນຄ່າ.
- ຄວາມເກງອົກເກງໃຈນັ້ນ ເປັນສິ່ງສຳຄັນ: ຄວນເອົາໃຈເຂົາມາໃສ່ໃຈເຮົາ ເພາະຄົນທີ່ໃກ້ຊິດສະນິດກັນມັກຄິດວ່າຈະສາມາດ ສ້າງຄວາມເຂົ້າໃຈຕົວເອງໄດ້ເກືອບທຸກເລື່ອງຈົນລືມຄິດຮອດຄວາມຮູ້ສຶກຂອງອີກຄົນໄປ.
- ເວົ້າຈາຊື່ນຊົມໃນສິ່ງດີຂອງກັນ ແລະ ກັນ: ເປັນວິທີມອບຄວາມຮັກທີ່ຄວນທຳບາງຄົນລະເລີຍວ່າຢູ່ນຳກັນມາດົນແລ້ວ ເລື່ອງດີເຂົາຄົງຮູ້ຢູ່ແລ້ວບໍ່ຕ້ອງຊົມ ຈຶ່ງເອົາແຕ່ເວົ້າຮອດສິ່ງບໍ່ດີຫຼືຢາກໃຫ້ອີກຝ່າຍປ່ຽນແປງເອົາແຕ່ຈົ່ມໂດຍທີ່ບໍ່ເຄີຍຊົມຄົນຟັງກະທໍ້ໃຈຄືກັນ.
