ປີ 2022 ຍັງບໍ່ຮອດ 4 ເດືອນ ຕົວເລກຜູ້ເສຍຊີວິດຈາກພະຍາດ ໂຄວິດ-19 ມີສູງເຖິງ 361 ຄົນ, ນັບຕັ້ງແຕ່ມີການລະບາດຂອງພະຍາດໂຄວິດ-19. ສປປ ລາວ ຖືເປັນອີກປະເທດໜຶ່ງ ທີ່ຍັງມີການລະບາດມາຈົນເຖິງປັດຈຸບັນ, ສປປ ລາວ ມີຜູ້ເສຍຊີວິດຄົນທຳອິດຈາກພະຍາດດັ່ງກ່າວໃນວັນທີ 9 ພຶດສະພາ ປີ 2021 ເຊິ່ງຍອດຜູ້ເສຍຊີວິດຍັງບໍ່ຄ່ອຍສູງຫຼາຍ ສືບຕໍ່ເນື່ອງມາຈົນຮອດທ້າຍເດືອນ ກັນຍາ ຍອດຜູ້ເສຍຊີວິດຢູ່ທີ່ 18 ຄົນ.
ຕັ້ງແຕ່ ເດືອນ ຕຸລາ ເປັນຕົ້ນມາ ເລີ່ມມີຜູ້ເສຍຊີວິດເພີ່ມຂຶ້ນຢ່າງຕໍ່ເນື່ອງໃນທຸກໆມື້ ບາງມື້ກໍມີຄົນໜຶ່ງ ບາງມື້ກໍມີສອງຄົນ ແລະ ບາງມື້ກໍມີຜູ້ເສຍຊີວິດສູງເຖິງ 10 ຄົນ, ເຊິ່ງຍັງເພີ່ມຂຶ້ນແບບນັ້ນໃນທຸກໆມື້ ຈົນປາກົດວ່າມີການເສຍຊີວິດຈາກພະຍາດ ໂຄວິດ-19 ຢ່າງຕໍ່ເນື່ອງໃນທຸກໆມື້ສະສົມ ເຮັດໃຫ້ທ້າຍປີ 2021 ມີຍອດລວມຜູ້ເສຍຊີວິດເຖິງ 372 ຄົນ.
ສຳລັບ ໃນເດືອນທຳອິດຂອງປີ 2022 ທັງຜູ້ຕິດເຊື້ອໃໝ່ ແລະ ຜູ້ເສຍຊີວິດໃໝ່ກໍຍັງສືບຕໍ່ເພີ່ມຂຶ້ນຢ່າງຕໍ່ເນື່ອງ ເຮັດໃຫ້ເດືອນທຳອິດນັ້ນມີຜູ້ເສຍຊີວິດຈາກພະຍາດ ໂຄວິດ-19 ໄປແລ້ວກວ່າ 175 ຄົນ, ຫຼັງຈາກນັ້ນໃນ ເດືອນ ກຸມພາ ຜູ້ຕິດເຊື້ອໃໝ່ກໍເລີ່ມຫຼຸດລົງຈາກມື້ລະປະມານ 1 ພັນຄົນ ຫາ 2 ພັນຄົນ ເຫຼືອມື້ລະປະມານ 5 ຮ້ອຍຄົນ ຫາ 4 ຮ້ອຍຄົນ ເຊິ່ງເຮັດໃຫ້ເດືອນກຸມພາ ມີຍອດຜູ້ເສຍຊີວິດຫຼຸດລົງ.
ໃນເດືອນ ມີນາ ແລະ ເດືອນ ເມສາ ຜູ້ຕິດເຊື້ອໃໝ່ກໍເລີ່ມເພີ່ມສູງຂຶ້ນອີກຄັ້ງ ສະເລ່ຍແລ້ວສູງເຖິງ 1 – 2 ພັນຄົນຕໍ່ມື້ ເຮັດໃຫ້ຍອດຜູ້ເສຍຊີວິດ ກໍກັບມາເພີ່ມຂຶ້ນຢ່າງຕໍ່ເນື່ອງໃນທຸກໆມື້ເຊັ່ນກັນ ເຊິ່ງຖ້າເຮົານັບມາຕັ້ງແຕ່ຕົ້ນປີ 2022 ຈົນເຖິງ ວັນທີ 23 ເມສາ 2022 ແລ້ວຍອດຜູ້ເສຍຊີວິດລວມຢູ່ທີ່ 361 ຄົນ.
ເຖິງຜູ້ຕິດເຊື້ອໃໝ່ຈະຍັງຂຶ້ນໆ ລົງໆ ບາງມື້ມີໜ້ອຍ ແລະ ບາງມື້ມີຫຼາຍ ກໍບໍ່ຄວນປະມາດ, ເພາະວ່າ ຍອດຜູ້ເສຍຊີວິດ ຍັງເພີ່ມຂຶ້ນໃນທຸກໆມື້ ສະນັ້ນເຮົາບໍ່ຄວນເບິ່ງຂ້າມເລື່ອງນີ້ ແລະ ສືບຕໍ່ມາດຕະການປ້ອງກັນໃຫ້ດີຢູ່ຕະຫຼອດ.