“ເຂົ້າຟືນ” ຫຼື “ເຂົ້າແຫຼ່ງຟືນ” ເປັນອີກອາຫານປະເພດໜຶ່ງ ທີ່ຄົນ ຫຼວງນ້ຳທາ ນິຍົມກິນກັນ ແລະ ກໍຖືວ່າເປັນອາຫານທ້ອງຖິ່ນປະຈຳແຂວງ ຫຼວງນ້ຳທາ ເລີຍກໍວ່າໄດ້, ມື້ນີ້ເຮົາຈະມາບອກວິທີເຮັດ ເຂົ້າແຫຼ່ງຟືນ ແບບຫຼວງນ້ຳທາ ໄວ້ກິນເອງຢູ່ເຮືອນດ້ວຍວິທີງ່າຍໆ ດັ່ງນີ້.
- ອຸປະກອນໃນການເຮັດ: ເຄື່ອງບົດເຂົ້າ ຫຼື ເຄື່ອງປັ່ນໝາກໄມ້.
- ວັດຖຸດິບ: ເຂົ້າຈ້າວແຂງ (ເຂົ້າສານ), ນ້ຳປູນໃສ.
ວິທີເຮັດ:
- ນຳເຂົ້າຈ້າວ ໄປແຊ່ນ້ຳປະໄວ້ປະມານ 1-2 ຊົ່ວໂມງໃຫ້ເຂົ້າອ່ອນ ຫຼື ນຳບ່ວງແຊ່ໃສ່ນຳຈະເຮັດໃຫ້ເຂົ້າອ່ອນໄວຂຶ້ນ.
- ຫຼັງຈາກນັ້ນນຳມາໃສ່ເຄື່ອງບົດເຂົ້າ ຫຼື ເຄື່ອງປັ່ນໝາກໄມ້ ບົດໃຫ້ລະອຽດແລ້ວນຳມາຕອງໃຫ້ເປັນນ້ຳຂາວໃສ ແລ້ວຖອກໃສໝໍ້ຕັ້ງໄຟອ່ອນໆ ເອົານ້ຳປູນໃສ່ ½ ບ່ວງແກງ.
- ຫຼັງຈາກນັ້ນກໍຄົນຕະຫຼອດຈົນເຂົ້າສຸກຂຸ້ນ, ຈາກນັ້ນກໍເທໃສ່ອ່າງໃຫ້ເປັນກ້ອນ ແຕ່ຖ້າຈະເຮັດເປັນເສັ້ນຕ້ອງມີເຄື່ອງບີບເສັ້ນ ຫຼື ຈະໃສ່ກະຕ່າໃຫ້ເປັນລອດຊ່ອງກໍໄດ້ ແລ້ວແຕ່ຄົນມັກ.
ວິທີເຮັດແຈ່ວ ເຂົ້າແຫຼ່ງຟືນ:
- ສ່ວນປະສົມປະກອບມີ: ໝາກເຜັດດິບ ຫຼື ໝາກເຜັດແຫ້ງ, ຖົ່ວເນົ່າ, ກະທຽມ, ຂິງ, ເກືອ, ແປ້ງນົວ.
- ວິທີເຮັດ: ນໍາເອົາໝາກເຜັດດິບ, ຂິງ, ກະທຽມ ແລະ ຖົ່ວເນົ່າໄປຈີ່ ເພື່ອໃຫ້ກິ່ນຫອມ, ສ່ວນໝາກເຜັດແຫ້ງ ນຳໄປຕົ້ມໃຫ້ສຸກແລ້ວມາຟັກໃຫ້ມຸ່ນ ເພື່ອເພີ່ມສີສັນໃຫ້ແຈ່ວ ຫຼັງຈາກນັ້ນນຳມາຕຳໃຫ້ເຂົ້າກັນ.
ສຳລັບ ນ້ຳສົ້ມ ທີ່ຈະນຳມາຜະສົມກັບແຈ່ວ ເຂົ້າແຫຼ່ງຟືນ ນັ້ນ ແມ່ນແລ້ວແຕ່ເຮົາມັກເລີຍວ່າຈະໃຊ້ສົ້ມຫຍັງເຮັດ ບໍ່ວ່າຈະເປັນ ນ້ຳຕົ້ມໝາກຂາມປຽກ, ສົ້ມພໍດີ, ໝາກກອກ ແລະ ອື່ນໆ.
ກ່ອນຈະກິນ ນຳເອົານ້ຳສົ້ມມາຜະສົມກັບແຈ່ວເຂົ້າແຫຼ່ງຟືນປຸງຣົດຊາດຕາມໃຈມັກ ແລ້ວເອົາເຂົ້າແຫຼ່ງຟືນລົງໃສ່ ພ້ອມກິນໄດ້ເລີຍ ແຕ່ຖ້າຈະໃຫ້ແຊບຕື່ມອີກຄວນກິນຄູ່ກັບເຂົ້າໂຄບ ຫຼື ໄຂ່ຕົ້ມ ຈະຄົບສູດການກິນ ເຂົ້າແຫຼ່ງຟືນ.
Hits: 12
