ຄວາມພະຍາຍາມທີ່ຈະສຶກສາຮ່ຳຮຽນ ສາມາດເກີດຂຶ້ນໄດ້ກັບທຸກຄົນ ເຖິງວ່າບຸກຄົນນັ້ນຈະເຄີຍຮຽນອ່ອນມາກໍຕາມ ຖ້າມີຄວາມຕັ້ງໃຈແລ້ວ ຄວາມສຳເລັດກໍຈະຕາມມາ ເຊັ່ນດຽວກັນກັບ ທ້າວ ຈັນທະຈອນ ວົງຂັນທອງ, ອາຍຸ 18 ປີ ເປັນຄົນ ຊົນເຜົ່າລື້ ອາໄສຢູ່ ເມືອງ ຊຽງຮ່ອນ, ແຂວງ ໄຊຍະບູລີ ເປັນນັກຮຽນທຶນ ຂອງໂຄງການ Child’s dream Scholarship, ປັດຈຸບັນ ເຂົາ ສຶກສາຢູ່ປີ 1 ຄະນະພາສາສາດ, ພາກວິຊາພາສາອັງກິດ, ມະຫາວິທະຍາໄລ ສຸພານຸວົງ, ແຂວງ ຫຼວງພຣະບາງ.
ຈັນທະຈອນ ບອກວ່າ ເຂົາເປັນຄົນໜຶ່ງທີ່ບໍ່ໄດ້ຮຽນເກັ່ງມາແຕ່ນ້ອຍ ເພາະຕອນຮຽນຢູ່ມໍຕົ້ນເຂົາກໍເປັນຄົນທີ່ຮຽນຂ້ອນຂ້າງອ່ອນຫຼາຍເລີຍລະ! ເພາະຕິດໝູ່ຫຼິ້ນ ແລະ ຕິດເກມ ເຮັດໃຫ້ການຮຽນຂອງເຂົາຕົກຕ່ຳຫຼາຍ.
ມາຮອດມື້ໜຶ່ງມີໝູ່ໃນຫ້ອງເວົ້າໃຫ້ວ່າ “ນິດໄສແບບນີ້ຈ້າງກະບໍ່ໄດ້ທີ 1 ນຳເຂົາຈັກເທື່ອດອກ” ເມື່ອໄດ້ຟັງຄຳນີ້ມັນບີບຫົວໃຈນ້ອງທັນທີ ເລີຍເກັບເອົາຄຳເວົ້າດູຖູກນີ້ມາເປັນແຮງຊຸກດັນໃນການຮຽນ ວ່າເຮົາຕ້ອງຮຽນເກັ່ງໃຫ້ໄດ້ ແລະ ເຮັດໃຫ້ເຂົາເຈົ້າເຫັນວ່າຄົນແບບເຮົາກະເຮັດໄດ້.
ຈາກຄວາມບຸກບືນ ບວກກັບຄວາມຕັ້ງໃຈໃນການປ່ຽນແປງຕົວເອງ ເມື່ອຂຶ້ນມໍ 5 ຈັນທະຈອນຕິດ 1 ໃນ 3 ຂອງຫ້ອງ ແລະ ຮັກມາດຕະຖານນີ້ໄວ້ໄດ້ຈົນຮອດມໍ 7 ໂດຍຄະແນນສະເລ່ຍແຕ່ລະວິຊາ ແມ່ນບໍ່ເຄີຍຫຼຸດ 7 ເລີຍ.
ສຳລັບເທັກນິກໃນການຮຽນຂອງ ຈັນທະຈອນ ແມ່ນ:
ອ່ານບົດຮຽນກ່ອນອາຈານໜຶ່ງບົດ ເມື່ອອາຈານເປີດໂອກາດໃຫ້ເອົາຄະແນນເພີ່ມ ເຮົາກໍເອົາບົດຮຽນທີ່ເຮົາໄດ້ອ່ານມາຕອບກ່ອນໝູ່ໂລດ, ຖ້າເປັນວິຊາຈຳພວກຄິດໄລ່ນ້ອງຊອກວິທີແກ້ໂຈດຈາກອິນເຕີເນັດ ແລ້ວນຳມາແກ້ບົດຕົວຢ່າງ ແລະ ບົດເຝິກຫັດກ່ອນອາຈານ ເພາະຫຼາຍໆ ອາຈານເພີ່ນຈະໃຫ້ອອກໄປແກ້ໂຈດຢູ່ກະດານເພື່ອເກັບຄະແນນເພີ່ມບວກໃສ່ກວດກາ ບາງວິຊານ້ອງແທບຈະບໍ່ໄດ້ກວດກາເພາະມີຄະແນນເພີ່ມເກີນ 10 ຄະແນນ.
ຕໍ່ມາແມ່ນຕັ້ງໃຈຮຽນເວລາຢູ່ຫ້ອງຮຽນ ແລະ ຖາມທັນທີເມື່ອມີສີ່ງທີ່ບໍ່ເຂົ້າໃຈ, ເມື່ອເລີກຮຽນນ້ອງກໍຫາກິດຈະກໍາຜ່ອນຄາຍສະໝອງເຮັດຄື: ຫຼີ້ນກີ້ຕ້າ, ຟັງເພງ, ເຮັດວຽກເຮືອນຊ່ວຍແມ່ ຕອນກາງຄືນນ້ອງຈະໃຊ້ເວລາທົບທວນບົດຮຽນເກົ່າຄືນປະມານ 25 ນາທີ ຮຽນບົດຮຽນໃໝ່ 1 ຊົ່ວໂມງ ຈະບໍ່ໃຊ້ເວລາຮຽນດົນເພື່ອບໍ່ເປັນການບັງຄັບສະໝອງຈົນຫຼາຍເກີນໄປ.
ສຳລັບການແບ່ງເວລາຂອງນ້ອງນັ້ນ ວັນຈັນ-ວັນສຸກ ນ້ອງຈະສຸມໃສ່ບົດຮຽນຫຼາຍກວ່າເວລາຫຼີ້ນ, ຫຼຸດເວລາຫຼີ້ນໃຫ້ໜ້ອຍກວ່າການຮຽນ, ວັນເສົາ-ວັນອາທິດ ຈະຜ່ອນຄາຍສະໝອງດ້ວຍການເຮັດວຽກຊ່ວຍຄອບຄົວ ແລະ ຊອກຫຼີ້ນນຳໝູ່ຕາມໄວໜຸ່ມຂອງເຮົາ ໃນລະຫວ່າງສອງມື້ນີ້ນ້ອງຈະບໍ່ຈັບປຶ້ມເລີຍ (ຍົກເວັ້ນຕອນໃກ້ເສັງ)
ຖ້າຖາມນ້ອງວ່າຮຽນແບບໃດໃຫ້ຄະແນນຄົງທີ່ ກໍຄືຈະເປັນການຮຽນທີ່ສະເໝີຕົ້ນສະເໝີປາຍ ການຮຽນກໍເຊັ່ນດຽວກັນ ໝັ່ນທົບທວນບົດຮຽນ, ເຝິກຊ້ອມແກ້ໂຈດ ແລະ ແນະນຳໝູ່ໃນຫ້ອງດຽວກັນເພື່ອເຮັດໃຫ້ເຮົາຈື່ຫຼາຍຂຶ້ນກວ່າເກົ່າ.
Hits: 143
