ໃນປັດຈຸບັນ ຫຼາຍຄົນມັກຈະເວົ້າວ່າ ໃນຍຸກເສດຖະກິດແບບນີ້ ຖ້າຢາກຫຼຸດລາຍຈ່າຍປະຈຳວັນລົງກໍຕ້ອງໄດ້ປະຢັດ ແລ້ວເຮົາຈະປະຢັດແນວໃດ? ອັນນີ້ກໍຂຶ້ນຢູ່ກັບວ່າ ການປະຢັດຂອງແຕ່ລະຄົນ, ແຕ່ລະຄອບຄົວມີວິທີການແນວໃດ ແຕ່ກໍເຊື່ອວ່າທຸກຄົນມີເປົ້າໝາຍອັນດຽວກັນ ຄື ຫຼຸດລາຍຈ່າຍພາຍໃນຄອບຄົວລົງ ແລະ ໃຫ້ມີເງິນເກັບຫຼາຍຂຶ້ນ, ບໍ່ສະເພາະແຕ່ການເກັບອອມ ແຕ່ລວມໄປເຖິງການຄວບຄຸມຄ່າໃຊ້ຈ່າຍຕ່າງໆ, ຫາວຽກເຮັດເສີມ ແລະ ເຮັດກະສິກຳແບບພໍພຽງໄປນຳ.
ພໍ່ຄຳໄລ ບ້ານ ໂພນແກ້ວ, ເມືອງ ນາຊາຍທອງ, ນະຄອນຫຼວງ ວຽງຈັນ ບອກວ່າ ເນື່ອງຈາກເພິ່ນເອງມີພື້ນທີ່ດິນທີ່ສາມາດປູກພືດຜັກສວນຄົວໄດ້ ຈຶ່ງໄດ້ປຽບຜູ້ທີ່ບໍ່ມີ ເຊິ່ງມັນກໍເປັນອີກວິທີໜຶ່ງທີ່ເຮັດໃຫ້ເພິ່ນ ສາມາດຫຼຸດຄ່າໃຊ້ຈ່າຍພາຍໃນຄອບຄົວໄດ້ເປັນຢ່າງດີ ເພາະບໍ່ຕ້ອງອອກຕະຫຼາດ, ນອກຈາກນີ້ ການເຮັດສວນ ຍັງສາມາດນຳຜົນຜະລິດທີ່ປູກເຫຼືອກິນ ໄປຂາຍຕາມເຂດບ້ານພໍໄດ້ເງິນເກັບ ມື້ລະ 10.000 – 20.000 ກີບ.
ນອກຈາກນີ້ ເພິ່ນກໍຍັງລ້ຽງເປັດ-ລ້ຽງໄກ່ ໄວ້ກິນເອງ ເພື່ອຫຼຸດການຊື້ອາຫານຈາກຕະຫຼາດ, ຊອກຫາຢູ່ຫາກິນຕາມທຳມະຊາດ ເຊັ່ນ: ຫາໜໍ່ໄມ້ມາໄວ້ຕົ້ມ, ແກງ, ຊຸບ ແລະ ເຮັດໜໍ່ຖົງເກັບໄວ້ກິນໄດ້ດົນນຳອີກ, ແຕ່ຖ້າຈຳເປັນຕ້ອງໄດ້ອອກຕະຫຼາດແທ້ໆ ກໍຈະຊື້ແຕ່ແນວທີ່ຈຳເປັນ, ງົດການອອກເຮືອນ ເພື່ອຫຼຸດສີ່ງທີ່ລໍ້ຕາລໍ້ໃຈ ແລ້ວເຮັດໃຫ້ເສຍເງິນ.
ສ່ວນຄອບຄົວຂອງ ນາງ ຫຼ້າ ຢູ່ບ້ານ ຊຳເກດ, ເມືອງ ໄຊທານີ ກໍເປັນອີກຄອບຄົວ ໜຶ່ງທີ່ມີວິທີປະຍັດ ໂດຍການເລືອກເຄື່ອງທີ່ຈະຊື້ໃຫ້ດີໆກ່ອນ ຈຶ່ງຊື້, ຕ້ອງສົມທຽບລາຄາຂອງແຕ່ລະບ່ອນ ເຊັ່ນ ການຈະຊື້ເຄື່ອງໃຊ້ໃນຄົວເຮືອນແຕ່ລະອັນ ກໍຕ້ອງຄິດໄລ່ຄວາມຄຸ້ມຄ້າຂອງສິ່ງນັ້ນວ່າ ຈະໄດ້ໃຊ້ຢ່າງຄຸ້ມຄ່າ ຫຼື ບໍ່ຈຶ່ງຕັດສິນໃຈຊື້. ສຳລັບໃນຊ່ວງທີ່ເພິ່ນແປງເຮືອນໃໝ່ ການເຈາະນ້ຳບາດານໃຊ້ ກໍເປັນອີກວິທີໜຶ່ງທີ່ບໍ່ຕ້ອງເສຍເງິນຄ່ານ້ຳປະປາເພີ່ມ.
ອີກວິທີໜຶ່ງ ແມ່ນການຊື້ວັດຖຸດິບອາຫານມາແຕ່ງກິນເອງພາຍໃນຄອບຄົວ ເຊິ່ງມັນກໍສາມາດປະຍັດຄ່າໃຊ້ຈ່າຍໄດ້ຫຼາຍກວ່າຊື້ແນວກິນສຸກມາກິນ ໂດຍສະເພາະຄອບຄົວໃຫຍ່ທີ່ມີຫຼາຍຄົນ ແລະ ສຳລັບຄົນເຮັດວຽກທີ່ເຄີຍຊື້ເຂົ້າກິນທຸກມື້ ລອງມາແຕ່ງອາຫານໄປກິນເອງຢູ່ບ່ອນເຮັດວຽກ ຫຼື ຫ້ອງການ ກໍຈະສາມາດເຮັດໃຫ້ເຮົາປະຍັດເງິນໄດ້ຫຼາຍກວ່າ.
ສ່ວນການຈົດບັນທຶກລາຍຈ່າຍຂອງແຕ່ລະເດືອນ ກໍເປັນອີກວິທີໜຶ່ງທີ່ຕິດຕາມການໃຊ້ຈ່າຍຂອງເຮົາ ແລະ ຄົນໃນຄອບຄົວ ວ່າແຕ່ລະເດືອນເຮົາຊື້ເຄື່ອງໄປຄຸ້ມຄ່າບໍ່ ຫຼື ເກີນເປົ້າໝາຍ ແລ້ວຈຶ່ງມາຕັດສິ່ງທີ່ບໍ່ຈຳເປັນອອກໃນເດືອນຕໍ່ໄປ.
ສິ່ງຕ່າງໆທີ່ກ່າວມາຂ້າງເທິງນີ້ ອາດເປັນວິທີການປະຢັດຂອງແຕ່ລະຄົນ ແຕ່ລະຄອບຄົວ ແລ້ວທ່ານເດ! ມີວິທີການປະຍັດແບບໃດ? ເພື່ອໃຫ້ເສດຖະກິດໃນຄອບຄົວດີຂຶ້ນ ເອົາມາແຊຣ໌ກັນເບິ່ງແດ່ເດີ້!!!.