ຖົ່ວລຽນສາຍພັນພື້ນເມືອງລາວນັ້ນ ມີມາແຕ່ສະໄໝບູຮານ ລຸ້ນປູ່ຍ່າຕາຍາຍເຮົາມາແລ້ວ ໂດຍບໍ່ມີໃຜຮູ້ວ່າຜູ້ໃດນຳເບ້ຍເຂົ້າມາປູກຕັ້ງແຕ່ສະໄໝໃດ ໂດຍປູກຢູ່ຕາມບ້ານແຕ່ສະໄໝບູຮານມາ ເຊິ່ງໄທບ້ານເອີນວ່າສາຍພັນພື້ນເມືອງ
ນາງ ບົວຕັນ ຈັນທະລາດ, ຈາກບ້ານ ບາຈຽງ, ເມືອງ ບາຈຽງຈະເລີນສຸກ, ແຂວງ ຈຳປາສັກ ພະນັກງານ ຮ້ານບາຈຽງຈະເລີນສຸກ ສາຂາ ນະຄອນຫຼວງ ວຽງຈັນ ໄດ້ໃຫ້ຮູ້ວ່າ ຖົ່ວລຽນສາຍພັນບາຈຽງທີ່ຫາກໍນຳມາຂາຍໃນນະຄອນຫຼວງວຽງຈັນນັ້ນ ເປັນພັນທີ່ປູກກັນລຸ້ນຕໍ່ລຸ້ນສືບຕໍ່ກັນມາ ແລະບໍ່ໄດ້ມີການຕັດແຕ່ງພັນໃນເຊິງພານິດ ໂດຍທູກແກ່ນຖົ່ວລຽນ ສາມາດນຳໄປປູກກ້າຄືນໃໝ່ໄດ້ ແຕ່ທັງນີ້ທັງນັ້ນ ຄວນປູກໃນບ່ອນອາກາດບໍ່ຮ້ອນ ແລະ ບໍ່ເຢັນຈົນເກີນໄປ ເພາະຖົ່ວລຽນສາຍພັນນີ້ມັກອາກາດຮ້ອນພໍສົມຄວນ ແຕ່ບໍ່ເຖິງຂັ້ນວ່າຮ້ອນແຮງ.
“ຖົ່ວລຽນລາວ ເປັນພັນທີ່ອ່ອນແອ ເຮົາປູກຕາມທຳມະຊາດໂດຍທີ່ບໍ່ໄດ້ໃຊ້ປຸ໋ຍເຄມີ ຝຸ່ນທີ່ໃຊ້ຈະເປັນຝຸ່ນຄອກເຊັ່ນ: ຂີ້ເປັດ, ຂີ້ໄກ່ ຫຼື ຂີ້ງົວ,ຂີ້ຄວາຍ ເວລາປູກບໍ່ຄວນໃສ່ຝຸ່ນຕອນທີ່ຕົ້ນຍັງນ້ອຍຢູ່ ເພາະຕົ້ນຖົ່ວລຽນເຮົາຈະຕາຍ ສ່ວນໄລຍະການເກັບຜົນຜະລິດຂອງຖົ່ວລຽນ ກໍຈະຢູ່ທີ່ປະມານເດືອນ ມີຖຸນາ – ສີງຫາ ການເກັບຜົນເຮົາຈະບໍ່ໄດ້ຂຶ້ນຕັດເອົາຢູ່ຕົ້ນເລີຍ ມີແຕ່ຖ້າໝາກໃດສຸກແລ້ວມັນຫາກຫຼົ່ນລົງມາເອງ ເຮົາພຽງແຕ່ຖ້າເກັບໜ່ວຍທີ່ຕົກລົງມາຂາຍ ແລະ ກິນໄດ້” ນາງ ບົວຕັນ ກ່າວ.
ດັ່ງນັ້ນ ຂໍ້ຈຳກັດໃນການບໍລິໂພກຖົ່ວລຽນທຳມະຊາດແທ້ ຈຶ່ງແມ່ນຄວາມສຸກທີ່ພໍດີສະເພາະມື້ນັ້ນໆ ຍ້ອນວ່າການເກັບໜ່ວຍຖົ່ວລຽນ ຜູ້ປູກຈະບໍ່ສາມາດຮູ້ໄດ້ເລີຍວ່າໜ່ວຍໃດໃກ້ຈະສຸກແລ້ວ ນອກຈາກວ່າ ຖ້າໃຫ້ໜ່ວຍທີ່ຮອດໄລຍະເວລາສຸກ ຕົກລົງມາເອງ ເຮັດໃຫ້ຖັ່ວລຽນພື້ນບ້ານ ຈາກຮ້ານບາຈຽງ ແມ່ນສຸກແລ້ວທຸກໜ່ວຍ ແລະ ເມື່ອນຳມາຮອດ ນະຄອນຫຼວງ ແລ້ວ ຈະບໍ່ສາມາດເກັບໄວ້ດົນໄດ້ເກີນ 3 ມື້ ເພາະຈະເລະ.
ຢ່າງໃດກໍດີ ສະເໜ່ຂອງຖົ່ວລຽນພັນພື້ນເມືອງບາງຈຽງ ຢູ່ທີ່ຣົດຊາດທີ່ຫອມຫວານ ເຖິງແມ້ວ່າເນື້ອຂອງຖົ່ວລຽນຈະນ້ອຍ ສ່ວນແກ່ນຈະໃຫຍ່ ແລະ ສຸກໄວກວ່າພັນອື່ນໆ ໂດຍພິສູດໄດ້ຈາກຍອດຈຳໜ່າຍໃນແຕ່ລະມື້ໃນຮ້ານ.
“ຖ້າຖາມວ່າໄດ້ຂາຍດີບໍ່? ຕອບໄດ້ເລີຍວ່າໄດ້ຂາຍດີຫຼາຍເພາະພາຍໃນນະຄອນຫຼວງບໍ່ມີຈຳໜ່າຍ ເຮົາຈະເອົາຖົ່ວລຽນໃໝ່ມາທຸກມື້ເລີຍ” ນາງ ບົວຕັນ ກ່າວກັບອິນໄຊລາວໃນຕອນທ້າຍ ຢ່າງພາກພູມໃຈ.