ຊ່ວງທີ່ສະພາບອາກາດຮ້ອນ ແລະ ມີຝົນຕົກແບບນີ້! ເຮັດໃຫ້ຫຼາຍພື້ນທີ່ມີນໍ້າຂັງ ຈົນກາຍເປັນແຫຼ່ງເພາະພັນຍຸງລາຍ ເຮັດໃຫ້ຈໍານວນຜູ້ຕິດເຊື້ອສູງຂຶ້ນໃນທຸກໆມື້ ແລະ ນອກຈາກໄຂ້ເລືອດອອກແລ້ວ ກໍຍັງມີ ໂຄວິດ-19 ທີ່ຍັງມີການລະບາດຢ່າງຕໍ່ເນື່ອງເຊັ່ນກັນ, ເຊິ່ງເຮົາບໍ່ຄວນຖືເບົາເພາະທັງສອງພະຍາດນີ້ລ້ວນແຕ່ມີຜົນກະທົບຕໍ່ສຸຂະພາບຂອງເຮົາ.
ເຖິງວ່າພະຍາດທັງສອງຢ່າງ ຈະມີອາການທີ່ຄ້າຍຄືກັນໃນເບື້ອງຕົ້ນ ແຕ່ເຮົາກໍຍັງສາມາດຮູ້ໃນເບື່ອງຕົ້ນໄດ້, ແຕ່ເພື່ອບໍ່ເປັນການໃຫ້ສັບສົນກັນ ເຮົາມາຮູ້ຈັກກັບທັງສອງພະຍາດ ທັງໄຂ້ເລືອດອອກ ແລະ ໂຄວິດ-19 ນໍາກັນວ່າມີຄວາມຕ່າງກັນແນວໃດ?
ສຳລັບອາການຂອງ ໄຂ້ເລືອດອອກ ແລະ ໂຄວິດ-19 ມີຄວາມແຕກຕ່າງກັນຄື:
ໄຂ້ເລືອດອອກ: ໄຂ້ມັກສູງຢູ່ປະມານ 2-7 ວັນ, ມີອຸນຫະພູມຫຼາຍກວ່າ 38,5 ອົງສາ, ໜ້າແດງ, ປວດຫົວ, ເມື່ອຍ, ເບື່ອອາຫານ, ມີອາການປວດຮາກ ຖ້າວ່າຮຸນແຮງກໍອາດຈະຖ່າຍໜັກເປັນສີດຳ ຫຼື ເປັນເລືອດໄດ້ ແລະ ອາດຈະເເປັນຈຸດແດງໆ ຕາມຜິວໜັງ ສ່ວນຫຼາຍບໍ່ພົບນໍ້າມູກໄຫຼ, ແຕ່ຫາຍໃຈລໍາບາກ ຫຼື ປອດອັກເສບ.
ໂຄວິດ-19: ໄຂ້ຕໍ່າ ເຖິງສູງ ຫຼາຍກວ່າ 37,5 ອົງສາ ມີອາການປວດເມື່ອຍຕົວຕົນຕາມໂຕ, ເຈັບຄໍ, ໄອແຫ້ງ ຫຼື ມີເສມຫະ, ມີນໍ້າມູກ, ຫອບເມື່ອຍຫາຍໃຈລໍາບາກ ຖ້າໃນກໍລະນີທີ່ຮຸນແຮງກໍອາດຈະເປັນປອດອັກເສບ ລວມໄປເຖິງມີອາການຖອກທ້ອງໃນບາງກໍລະນີ.
ສຳລັບວິທີການປ້ອງກັນໃຫ້ຫ່າງໄກຈາກ ໄຂ້ເລືອດອອກ ສາມາດປ້ອງກັນໄດ້ດ້ວຍການທຳລາຍແຫຼ່ງເພາະພັນຍຸງລາຍ (ພາຊະນະທີ່ອາດມີນໍ້າຂັງ) ແລະ ປ້ອງກັນບໍ່ໃຫ້ຍຸງລາຍມາກັດເຮົາເຊັ່ນ ຕ້ອງນອນໃນມຸ້ງ ຫຼື ທາໂລຊັນກັນຍຸງ.
ສຳລັບວິທີການປ້ອງກັນ ໂຄວິດ-19 ທາງດີທີ່ສຸດແມ່ນການສັກວັກຊີນປ້ອງກັນ ແລະ ປະຕິບັດຕາມມາດຕະການທີ່ທາງຄະນະສະເພາະກິດວາງອອກເຊັ່ນ: ໝັ່ນລ້າງມືດ້ວຍນໍ້າ ແລະ ໃສ່ສະບູ ຫຼື ເຈວແອວກໍຮໍ, ຮັກສາໄລຍະຫ່າງ 1-2 ແມັດ, ຮັກສາຄວາມສະອາດຢູ່ເລື່ອຍໆ, ຫຼີກລ້ຽງສະຖານທີ່ແອອັດ ແລະ ໃສ່ຜ້າອັດປາກທຸກຄັ້ງເມື່ອອອກໄປຂ້າງນອກ.
ຈາກທີ່ກ່າວມາຂ້າງເທິງຈະເຫັນວ່າ ອາການເບື້ອງຕົ້ນຂອງທັງສອງໂຣກ ແມ່ນມີສ່ວນທີ່ຄ້າຍຄືກັນຢູ່ ແຕ່ວ່າ ໂຄວິດ-19 ນອກຈາກມີໄຂ້, ໄອ ແລ້ວ ຜູ້ປ່ວຍຍັງຮູ້ສຶກປວດເມື່ອຍຕາມຕົນຕາມໂຕ ມີອາການຫອບຫາຍໃຈລໍາບາກ ເຊິ່ງຫາກວ່າມີອາການເຫຼົ່ານີ້ກໍຄວນໄປພົບແພດເພື່ອກວດເບິ່ງໂຣກ ແລະ ຮັກສາ.