ລັດຖະບານອົດສະຕຣາລີ ໄດ້ມອບເຄື່ອງຟອກໝາກໄຂ່ຫຼັງ ໃຫ້ ສປປ ລາວ ເຊິ່ງມີເຄື່ອງຟອກໝາກໄຂ່ຫຼັງທັງໝົດຈຳນວນ 4 ໜ່ວຍ, ມຸນຄ່າ 1 ຕື້ກີບ ເຊິ່ງໄດ້ຮັບຈາກ ລັດຖະບານອົດສະຕຣາລີ ເພື່ອທີ່ຈະສາມາດປິ່ນປົວຄົນເຈັບຈາກພະຍາດ ໝາກໄຂ່ຫຼັງ ແລະ ເບົາຫວານ ໄດ້ຫຼາຍພັນຄົນ.
ທ່ານ ແດນ ເຮວເດິນ, ຮອງເອກອັກຄະລັດຖະທູດອົດສະຕຣາລີປະຈຳ ສປປ ລາວ, ແລະ ທ່ານ ນາງ ໂລ ຢິງ ຣູ ແຈັກເກີລີນ, ຜູ້ຕາງໜ້າ ອົງການອະນາໄມໂລກ ໄດ້ມອບເຄື່ອງຟອກໝາກໄຂ່ຫຼັງໃຫ້ແກ່ ສປປ ລາວ, ຊຶ່ງຮັບໂດຍ ດຣ. ບຸນແຝງ ພູມະໄລສິດ ລັດຖະມົນຕີກະຊວງສາທາລະນະສຸກເປັນຜູ້ຮັບ ແລະ ເຄື່ອງຟອກໝາກໄຂ່ຫຼັງ ທີ່ໄດ້ຮັບໃນຄັ້ງນີ້ ຈະສົ່ງຕໍ່ໃຫ້ ໂຮງໝໍແຂວງ ຄຳມ່ວນ, ສາລະວັນ ແລະ ຈຳປາສັກ.
ການຊ່ວຍເຫຼືອໃນຄັ້ງນີ້ແມ່ນສ່ວນໜຶ່ງຂອງເງິນຊ່ວຍເຫຼືອຈຳນວນ 2 ລ້ານ ໂດລາສະຫະລັດ ທີ່ລັດຖະບານ ອົດສະຕຣາລີ ໄດ້ຊ່ວຍເຫຼືອຜ່ານອົງການອະນາໄມໂລກປະຈຳ ສປປ ລາວ ເພື່ອປັບປຸງແກ້ໄຂວຽກງານປ້ອງກັນ ແລະ ປິ່ນປົວພະຍາດ ໂຄວິດ-19, ວັກຊີນກັນພະຍາດໂຄວິດ-19 ແລະ ພະຍາດອື່ນໆ, ແລະ ບັນຫາທາງດ້ານສາທາ ລະນະສຸກອື່ນໆ ໃນທົ່ວປະເທດ.
ໃນໂອກາດດັ່ງກ່າວ, ດຣ. ບຸນແຝງ ພູມະໄລສິດ, ລັດຖະມົນຕີກະຊວງສາທາລະນະສຸກ ຍັງໄດ້ກ່າວສະແດງຄວາມຂອບໃຈຕໍ່ກັບ ລັດຖະບານ ອົດສະຕຣາລີ ທີ່ໃຫ້ການຊ່ວຍເຫຼືອ ສປປ ລາວ ແລະ ການຊ່ວຍເຫຼືອຄັ້ງນີ້ ຈະຊ່ວຍຮັກສາໄດ້ຫຼາຍຊີວິດໃນຫຼາຍຊຸມຊົນທັງໃນປະຈຸບັນ ແລະ ໃນອະນາຄົດ.
ຂໍ້ມູນຈາກ: Lao National Radio
