Hiroahi Lockheimer ຜູ້ບໍລິຫານລະດັບສູງທີ່ຮັບຜິດຊອບລະບົບ Android, Chrome ແລະ Chrome OS ແລະ ຍັງເປັນໜຶ່ງໃນສະມາຊິກຮຸ້ນກໍ່ຕັ້ງຂອງທີມ Android ໄດ້ຢືນຢັນວ່າ ໃນອະນາຄົດ ລະບົບປະຕິບັດການ Android 14 ທີ່ກຳລັງຈະມາໃນເດືອນ ສິງຫາ ປີ 2023 ຈະຮອງຮັບການສື່ສານຜ່ານດາວທຽມແນ່ນອນ.
ນອກຈາກນັ້ນ, ຜູ້ໃຫ້ບໍລິການເຄືອຂ່າຍລາຍໃຫຍ່ ທີໂມບາຍ (T-Mobile) ໄດ້ປະກາດຄວາມຮ່ວມມືກັບສະເປສເອັກ (SpaceX) ຂອງ Elon musk ເພື່ອໃຫ້ບໍລິການໃນດ້ານການສື່ສານ ແລະ ການສົ່ງຂໍ້ຄວາມ ຜ່ານດາວທຽມ ໃນກໍລະນີເກີດເຫດສຸກເສີນທີ່ບໍ່ມີສັນຍານໂທລະສັບ ຫຼື ຕົກຢູ່ໃນໄພພິບັດ.
ປະຈຸບັນ, ຍັງບໍ່ມີການກຳນົດອັດຕາຄ່າບໍລິການເຄືອຂ່າຍດັ່ງກ່າວ ລວມໄປເຖິງຍັງບໍ່ມີກຳນົດແຜນວ່າຈະຄິດໄລ່ຄ່າບໍລິການແນວໃດ, ເຊິ່ງທັງສອງບໍລິສັດກຳລັງວາງແຜນຮ່ວມມືໃນເປີດການທົດສອບແບບເບຕ້າ (Beta) ໃນຊ່ວງທ້າຍປີ 2023.
ຂໍ້ມູນຈາກ: Android Central