ເພື່ອເປັນການ ຊຸກຍູ້ສົ່ງເສີມຜະລິດຕະພັນຂອງຄົນລາວ ບໍລິສັດ ວີເທັກແຄ ໄດ້ຮ່ວມກັບ ຄະນະຈັດສັນ ເມືອງ ຈັນທະບູລີ, ນະຄອນຫຼວງ ວຽງຈັນ ໄດ້ມີນະໂຍບາຍຊຸກຍູ້ສົ່ງເສີມ ເປີດໂອກາດໃຫ້ຜູ້ປະກອບການດ້ານຫັດຖະກຳ ແລະ ຜະລິດຕະພັນພື້ນເມືອງລາວ ນຳເອົາສິນຄ້າຂອງຕົນມາວາງສະແດງ ແລະ ຈຳໜ່າຍ ຢູ່ຖະໜົນວັດທະນະທຳແຫ່ງບຸນ ໂດຍບໍ່ມີຄ່າໃຊ້ຈ່າຍ
ທັງນີ້, ເພື່ອຊຸກຍູ້ສົ່ງເສີມຜະລິດຕະພັນລາວ, ສີໄມ້ລາຍມືຂອງຄົນລາວ, ຜະລິດໂດຍຄົນລາວທີ່ເປັນເອກະລັກ ໃຫ້ເປັນທີ່ຮູ້ຈັກໄປທົ່ວໂລກ ກໍຄື ຊຸກຍູ້ສົ່ງເສີມຜູ້ປະກອບການໃຫ້ມີລາຍຮັບ, ມີວຽກເຮັດງານທຳທີ່ໝັ້ນຄົງ, ທັງເປັນການປະກອບສ່ວນຟື້ນຟູກິ່ນອາຍ ແຫ່ງຄວາມມີສະເໜ່ຂອງວິຖີຊີວິດວັດທະນະທຳ ຂອງຄົນໃນຊຸມຊົນ ທີ່ມີຊີວິດຊີວາ.
ສະມາພັນແມ່ຍິງດ້ອຍໂອກາດ ແລະ ສະມາຄົມຄົນພິການ ນຳເອົາສິນຄ້າຂອງຕົນ ມາວາງສະແດງ ແລະ ຈຳໜ່າຍ ຕື່ມອີກ ເຊິ່ງຖະໜົນແຫ່ງບຸນດັ່ງກ່າວ ແມ່ນນັບແຕ່ 4 ແຍກເຊັນເຕີພ້ອຍສີຫອມ ໄປຫາ ຫໍວັດທະນະທຳແຫ່ງຊາດ, ຕິດກັບຕະຫລາດວັນວານ, ຂຶ້ນບ້ານຫາຍໂສກ-ອານຸ-ມີໄຊ ເມືອງຈັນທະບູລີ ນະຄອນຫລວງວຽງຈັນ.
ຖະໜົນວັດທະນະທຳແຫ່ງບຸນ ມີຄວາມໂດດເດັ່ນທາງດ້ານອາຫານ ເຊິ່ງໄດ້ຮວບຮວມເອົາທັງອາຫານພື້ນເມືອງລາວ, ອາຫານນານາຊາດ ເຂົ້າມາຮວມໂຕກັນຢູ່ໃນພື້ນທີ່ນີ້ ເພື່ອເປັນທາງເລືອກໃຫ້ແກ່ລູກຄ້າທີ່ມີຄວາມຕ້ອງການອາຫານການກິນທີ່ຫລາກຫລາຍ ໂດຍມີຮ້ານອາຫານຫລາກຫລາຍປະ ເພດບໍ່ຊໍ້າກັນ, ມີທັງອາຫານລາວ ແລະ ອາຫານ ນາໆຊາດ ທີ່ຮັບປະກັນໄດ້ທາງດ້ານຄຸນນະພາບ ແລະ ລົດຊາດອາຫານ.
ສຳລັບ ຮ້ານອາຫານນາໆຊາດ ຈະແມ່ນເຈົ້າຂອງປະເທດນັ້ນໆເຊັ່ນ: ເກົາຫລີ, ຝຣັ່ງ ແລະ ເຢຍລະມັນ ຈະເປັນເຈົ້າຂອງຮ້ານ ແລະ ສ້າງເມນູອາຫານທີ່ເປັນລົດຊາດຕົ້ນຕຳຫລັບຂອງພວກເຂົາ ໃຫ້ບັນດາທ່ານໄດ້ຮັບປະທານ; ນອກນັ້ນ, ຍັງມີຮ້ານຜະລິດຕະພັນຫັດຖະກຳ ເຊັ່ນ: ຮ້ານຂາຍສິ້ນ, ເສື້ອຜ້າ, ກະເປົາ, ຮູບແຕ້ມ ແລະ ອື່ນໆ ທີ່ຫລາກຫລາຍ ທີ່ເປັນຜະລິດຕະພັນຂອງຄົນລາວ 100%.
ທີ່ມາ: ປະເທດລາວ Pathedlao