ນ້ຳຕົກຕາດຜາສ້ວມ ເປັນຕາດທີ່ມີຄວາມສວຍສົດງົດງາມ, ມີປ່າໄມ້ທີ່ອຸດົມສົມບູນ ເຕັມໄປດ້ວຍທຳມະຊາດ ແລະ ນ້ຳໃສສະອາດ, ນ້ຳຈະງາມໃນຊ່ວງເດືອນ ຕຸລາ ຮູບຮ່າງຂອງຕາດຈະມີລັກສະນະເປັນຜາລຽນຕັ້ງເປັນລະບຽບ ມີຄວາມສູງປະມານ 5-7 ແມັດ ແລະ ມີກະແສນ້ຳທີ່ໄຫຼຜ່ານຕາມຜາຫີນດັ່ງກ່າວ ເຊິ່ງນ້ຳຕົກທີ່ໄຫຼຈາກຫ້ວຍຈຳປີ ອັນມີຈຸດກຳເນີດຈາກ ພູເທວະດາ, ເມືອງປາກຊ່ອງ ເຊິ່ງເປັນສາຍນ້ຳທີ່ໄຫຼຈາກໃຕ້ໄປຫາເໜືອ ທີ່ຜ່ານຫີນທີ່ມີຂະໜາດໃຫຍ່ ທີ່ມີລັກສະນະເປັນໂງ່ນຫີນ ຮູບຮ່າງຄືກັບຫ້ອງນອນຂອງຄູ່ບ່າວສາວ.
ນ້ຳຕົກຕາດຜາສ້ວມ ຕັ້ງຢູ່ບ້ານໜອງກອກ ຄຸ້ມບ້ານໂດນ, ເມືອງບາຈຽງ, ແຂວງຈຳປາສັກ ຫ່າງຈາກຕົວເມືອງປາກເຊປະມານ 24 ກິໂລແມັດ ຕາມເສັ້ນທາງເລກທີ 23 ຈະຜ່ານທາງແຍກເຂົ້າຄອນພະເພັງ ຕ້ອງລ້ຽວໃຫ້ໄປຊື່ ຈົນຮອດຫຼັກ ກມ ທີ່ 21 ແລ້ວລ້ຽວຊ້າຍເຂົ້າໄປອີກປະມານ 3 ກິໂລແມັດ ກໍຈະຮອດອຸທິຍານເມືອງບາຈຽງ ແລ້ວລ້ຽວຊ້າຍເຂົ້າໄປອີກ 1 ກິໂລແມັດ ຈະຮອດ ນ້ຳຕົກຕາດຜາສ້ວມ.
ພາຍໃນບໍລິເວນຕາດຜາສ້ວມ ຈະມີການບໍລິການທີ່ອຳນວຍຄວາມສະດວກ ໃຫ້ແກ່ນັກທ່ອງທ່ຽວເຊັ່ນ: ຮ້ານອາຫານ, ຮ້ານຂາຍສິ່ງຂອງທີ່ລະນຶກ ເພື່ອເປັນຂອງຝາກຂອງຕ້ອນ, ຫ້ອງນ້ຳ ແລະ ການໃຫ້ຂໍ້ມູນແຫຼ່ງທ່ອງທ່ຽວ ຈາກພະນັກງານນຳທ່ຽວປະຈຳທ້ອງຖິ່ນ ນອກນັ້ນຍັງມີປ້າຍຫ້າມ ແລະ ປ້າຍບອກທາງໃນການຍ່າງ ໄປສະຖານທີ່ທ່ອງທ່ຽວນຳອີກ.
ການເຂົ້າເຖິງຕາດຜາສ້ວມ ແມ່ນສະດວກສະບາຍ ເພາະເປັນທາງປູຢາງ ແລະລົດທຸກຊະນິດສາມາດເຂົ້າເຖິງໄດ້.
ນອກນັ້ນ ຍັງມີໝູ່ບ້ານຊົນເຜົ່າ 8 ຊົນເຜົ່າ ທີ່ຮວບຮວມເອົາພິພິດຕະພັນຂອງຊົນເຜົ່າ ມາຮວມກັນ ເພື່ອມາວາງສະແດງໃຫ້ນັກທ່ອງທ່ຽວໄດ້ຊົມ ເຊັ່ນ: ເຜົ່າກະລ່ຽງ, ເຜົ່າກະຕ້າງ, ເຜົ່າອາລັກ, ເຜົ່າກະຕູ ແລະ ຍັງມີເຮືອນເສົາດຽວ ເຊິ່ງແຕ່ກ່ອນເພິ່ນບອກວ່າ: ເປັນເຮືອນທີ່ສ້າງໄວ້ເພື່ອບ່າວສາວ ມາລົມກັນ ແຕ່ການລົມກັນໃນທີ່ນີ້ ແມ່ນລົມກັນພຽງແຕ່ຊົ່ວໂມງດຽວ ຖ້າມັກຮັກກັນແລ້ວ ແມ່ນໃຫ້ພໍ່ແມ່ມາສູ່ຂໍ ດັ່ງນັ້ນ, ນ້ຳຕົກຕາດຜາສ້ວມ ຈຶ່ງເປັນສິ່ງຈູງໃຈໃຫ້ນັກທ່ອງທ່ຽວພາກັນຢາກມາທ່ຽວຢູ່ສະຖານທີ່ແຫ່ງນີ້.
Hits: 8
