ລະດູໜາວ ນອກຈາກຈະນຳເອົາຄວາມເຢັນສົດຊື່ນມາໃຫ້ເຮົາໄດ້ສຳພັດແລ້ວ ແຕ່ຍັງແຟງດ້ວຍໂຣກໄພຕ່າງໆ ມາພ້ອມ ໂດຍສະເພາະແມ່ນ ເຊື້ອໄວຣັສ ແລະ ແບັກທີເຣຍ, ເຊິ່ງມື້ນີ້ ເຮົາຈະມາບອກກ່ຽວກັບ 5 ໂຣກ ທີ່ມາພ້ອມກັບລະດູໜາວ ທີ່ເຮົາຄວນລະວັງ.
- ໄຂ້ຫວັດ.
ເປັນໂຣກທີ່ເກີດຈາກ ອາກາດທີ່ປ່ຽນແປງຫຼາຍ ເມື່ອຮ່າງກາຍອ່ອນແອ ເຊື້ອໄວຣັສ ກໍເຂົ້າສູ່ຮ່າງກາຍໄດ້ງ່າຍ ເຊິ່ງຈະມີອາການ ໄຂ້ຕ່ຳ, ມີນ້ຳມູກ, ຄັດດັງ ແລະ ຈາມ. ສຳລັບວິທີ ປິ່ນປົວນັ້ນ, ຖ້າຫາກເປັນໄຂ້ຫວັດຈາກເຊື້ອໄວຣັສ ການພັກຜ່ອນໃຫ້ພຽງພໍ, ດື່ມນ້ຳຫຼາຍໆ, ກິນອາຫານໃຫ້ຄົບ 5 ໝູ່ ກໍສາມາດເຊົາໄດ້ເອງ ໂດຍທີ່ບໍ່ຕ້ອງກິນຢາ.
- ໄຂ້ຫວັດໃຫຍ່.
ເປັນໂຣກທີ່ເກີດຈາກ ໄວຣັສ ອິນຟລູເອັນຊາ (influenza virus) ທີ່ມັກພົບເຫັນຫຼາຍໃນລະດູໜາວ, ໂດຍອາການຈະມີໄຂ້ລະດັບປານກາງ ຫາ ສູງ, ມີອາການອ່ອນເພຍ, ປວດກ້າມຊີ້ນຫຼາຍ, ປວດຫົວ, ອາດມີນ້ຳມູກໄຫຼອອກມາ, ມາອາການໄອ… ສ່ວນວິທີປິ່ນປົວແມ່ນ ຄວນມາພົບແພດເພື່ອຮັບການປິ່ນປົວທີ່ເໝາະສົມ ຫຼື ປ້ອງກັນໂດຍການສັກວັກຊີນ.
- ປອດບວມ ຫຼື ປອດອັກເສບ.
ແມ່ນເກີດຈາກປອດຂອງເຮົາມີເຊື້ອໄວຣັສ ຫຼື ແບັກທີເຣຍ ເຂົ້າໄປຢູ່ໃນຖົງລົມ ເຮັດໃຫ້ຊີ້ນປອດໃນບໍລິເວນນັ້ນ ບໍ່ສາມາດຮັບອ໊ອກຊິເຈນໄດ້ຕາມປົກກະຕິ. ອາການຂອງປອດບວມ ມັກຈະແໜ້ນໜ້າເອິກ, ຫາຍໃຈບໍ່ອອກ, ໄອ, ມີກະເທີ່, ມີໄຂ້ສູງ ເຊິ່ງມັກພົບໃນຄົນເຈັບທີ່ເປັນໂຣກກ່ຽວກັບລະບົບທາງເດີນຫາຍໃຈ. ສ່ວນວິທີປິ່ນປົວ ແມ່ນຄວນມາພົບແພດ ເພື່ອຮັບຢາຫຼຸດໄຂ້ ຕາມຄວາມເໝາະສົມຂອງອາການ, ນອກຈາກນີ້ ການດື່ມນ້ຳຫຼາຍໆ ກໍສາມາດຊ່ວຍຫຼຸດຂີ້ກະເທີ່ໄດ້ເຊັ່ນກັນ.
- ໂຣກຖ່າຍຖອກທ້ອງ.
ເຊິ່ງເກີດຈາກໄວຣັສໂຣຕ້າ (Rota virus) ທີ່ພົບໄດ້ງ່າຍໃນລະດູໜາວ ແລະ ຄົນເຈັບສ່ວນໃຫຍ່ຈະເປັນເດັກນ້ອຍອາຍຸຕ່ຳກວ່າ 5 ປີ. ອາການຂອງຄົນເຈັບແມ່ນຖອກທ້ອງຖ່າຍແຫຼວຕະຫຼອດ, ຮາກ, ເຈັບທ້ອງ, ມີອາການໄຂ້ ແລະ ອ່ອນເພຍ. ວິທີປ້ອງກັນສຳລັບໂຣກນີ້ ໃນປັດຈຸບັນ ແມ່ນມີວັກຊີນປ້ອງກັນໄວຣັສນີ້ແລ້ວ ໂດຍໃຫ້ທາງປາກສຳລັບເດັກນ້ອຍ (ຈະບໍ່ໄດ້ສັກຄືກັບວັກຊີນຊະນິດອື່ນ).
- ໂຣກຫັດ.
ເກີດຈາກໄວຣັສຣູບີໂອຣາ (Rubeola virus) ມັກພົບໃນເດັກນ້ອຍ ທີ່ຍັງບໍ່ທັນມີພູມຄຸ້ມກັນຫຼາຍກວ່າຜູ້ໃຫຍ່ ຕິດຕໍ່ໄດ້ຈາກການໄອ, ຈາມ, ນ້ຳລາຍຂອງຄົນເຈັບ ເຊິ່ງມີໄລຍະໃນການຟັກຕົວປະມານ 10-14 ມື້. ສຳລັບອາການ ແມ່ນມັກຈະມີໄຂ້, ຕາແດງ, ນ້ຳຕາໄຫຼ, ມີຕຸ່ມນ້ອຍໆ ສີແດງກ່ຳຂຶ້ນຕາມຜິວໜັງ ແລະ ຈະຫາຍໄປເອງພາຍໃຈ 7 ມື້, ບາງຄົນເຈັບຕ່ອມນ້ຳເຫຼືອງຫຼັງໃບຫູບວມ. ສ່ວນວິທີປິ່ນປົວແມ່ນ ເນື່ອງຈາກໂຣກຫັດ ບໍ່ແມ່ນຟຣກທີ່ຮ້າຍແຮງ ການປິ່ນປົວຈຶ່ງປິ່ນປົວໄປຕາມອາການ ຈົນກວ່າຈະຫາຍດີ, ນອກຈາກນີ້ຍັງມີວັກຊີນທີ່ສາມາດສັກປ້ອງກັນໄດ້ຕັ້ງແຕ່ຕອນຍັງນ້ອຍອີກດ້ວຍ.
