ອາການເຈັບຄໍ ມັກເກີດຈາກຫຼາຍສາເຫດ ບໍ່ວ່າຈະເປັນການທີ່ເຮົາກິນຂອງເຢັນຫຼາຍ, ມີເຊື້ອແບັກທີເຣຍສະສົມຢູ່ໃນລຳຄໍ, ສະພາບອາກາດປ່ຽນແປງ…ເຊິ່ງມັນອາດເປັນສາເຫດ ທີ່ເຮັດໃຫ້ເຮົາເກີດອາການເຈັບຄໍໄດ້, ມື້ນີ້ ເຮົາມີ 4 ສະໝຸນໄພໃກ້ໂຕ ທີ່ສາມາດບັນເທົາອາການແກ້ເຈັບຄໍໄດ້ ຄື: ຂີງ, ກະທຽມ, ຂີ້ໝິ້ນ ແລະ ຫົວຜັກບົ່ວ.
- ຂີງ: ມັນເປັນໂຕເລືອກຂອງຫຼາຍໆຄົນ ທີ່ຮູ້ສຶກເຈັບຄໍ ເພາະມັນສາມາດຊ່ວຍຕ້ານການອັກເສບ ລວມທັງຍັງສາມາດຊ່ວຍຂ້າເຊື້ອແບັກທີເຣຍ ທີ່ເປັນໂຕການຂອງອາການເຈັບຄໍໄດ້ອີກ. ວິທີໃຊ້ ແມ່ນນຳຂີງໄປຊອຍຕົ້ມກັບນ້ຳແລ້ວມາຈິບເປັນຊາ ຫຼື ຈະຫຍ້ຳຂີງສົດໆ ກໍໄດ້ ແຕ່ຖ້າຫາກບໍ່ມີເວລາ ຫຼື ບໍ່ມັກກິນຂີງສົດ ກໍໃຫ້ນຳຂີງຜົງມາຊົງນ້ຳອຸ່ນດື່ມ ກໍຊ່ວຍບັນເທົາອາການເຈັບຄໍໄດ້ຄືກັນ.
- ກະທຽມ: ກະທຽມເປັນສະໝຸນໄພໃນຄົວ ທີ່ມີລິດກະຕຸ້ນລະບົບພູມຄຸ້ມກັນໄດ້ຄືກັນກັບຢາຕ້ານຈຸລະຊີບ ທີ່ໃຊ້ໃນທາງການແພດ ແລະມີຄຸນປະໂຫຍດໃນການຕ້ານເຊື້ອແບັກທີເຣຍໄດ້ອີກ. ທ່ານ Michael Finkelstein ຜູ້ຊ່ຽວຊານຈາກ ນະຄອນ ນິວຢ໋ອກ ໄດ້ເປີດເຜີຍວ່າ: ກະທຽມເປັນສະໝຸນໄພທີ່ສາມາດປົວອາການເຈັບຄໍ ເນື່ອງຈາກການຕິດເຊື້ອໄດ້ ທັງຍັງຊ່ວຍຕໍ່ສູ້ກັບເຊື້ອໂຣກທີ່ເຮັດໃຫ້ເກີດອາການເຈັບຄໍໄດ້ອີກດ້ວຍ ເພາະວ່າມີສານອັນລິຊິນ (Allicin) ທີ່ຢູ່ໃນກະທຽມສົດນັ້ນເອງ. ລາວໄດ້ແນະນຳວ່າ ຖ້າຕ້ອງການໃຊ້ກະທຽມປິ່ນປົວອາການເຈັບຄໍ ແຕ່ບໍ່ມັກຄວາມຂິວຂອງມັນ ກໍໃຫ້ນຳເອົາກະທຽມໝົດຫົວ ໄປອຸ່ນໃນເຕົາໄມໂຄເວັບ 10-15 ວິນາທີ ຫຼື ຈະເຜົາໄຟກໍໄດ້ ແລ້ວຈຶ່ງນຳມາກິນ ຈະຊ່ວຍໃຫ້ກິ່ນຂິວຂອງກະທຽມຫຼຸດລົງໄດ້.
- ຂີ້ໝິ້ນ: ສ່ວນຫຼາຍນິຍົມມາແຕ່ງກິ່ນ ຫຼື ແຕ່ງສີອາຫານເທົ່ານັ້ນ. ແຕ່ສັບພະຄຸນຂອງຂີ້ໝິ້ນ ຖືວ່າດີຫຼາຍຢ່າງ ເພາະສານ ເຄີຄູມິນ (Curcumin) ທີ່ຢູ່ໃນຂີ້ໝິ້ນ ມີລິດໃນການຕ້ານການອັກເສບໄດ້ ເໝາະກັບການນຳໄປໃຊ້ກ່ຽວກັບອາການເຈັບຄໍທີ່ເກີດຈາກ ການອັກເສບຂອງເປືອກໜັງຄໍ ແຖມຍັງຊ່ວຍຫຼຸດອາການໄອໄດ້ອີກດ້ວຍ. ວິທີໃຊ້ ກໍພຽງແຕ່ນຳຂີ້ໝິ້ນຜົງມາຊົງກັບນ້ຳອຸ່ນ ແລະ ເຕີມນ້ຳເຜິ້ງລົງໄປເລັກໜ້ອຍ, ຈິບຂະນະທີ່ອຸ່ນໆ ກໍຈະຊ່ວຍໃຫ້ຊຸ່ມຄໍ ແລະ ເຊົາເຈັບຄໍໄດ້ໄວຂຶ້ນ.
- ຫົວຜັກບົ່ວ: ນອກຈາກກະທຽມແລ້ວ ຫົວຜັກບົ່ວກໍສາມາດປົວອາການເຈັບຄໍໄດ້ຄືກັນ ເພາະມັນມີສານຕ້ານອາການອັກເສບ ທີ່ມີປະສິດທິພາບຄືກັນ ແຖມຍັງຊ່ວຍຕ້ານເຊື້ອໄວຣັສ ແລະ ເຊື້ອແບັກທີເຣຍ ບາງຊະນິດໄດ້. ນອກນີ້ ຫົວຜັກບົ່ວ ຍັງຂຶ້ນຊື່ວ່າ ເປັນຢາຕ້ານເຊື້ອຈາກທຳມະຊາດທີ່ປອດໄພອີກ. ວິທີການໃຊ້ເພື່ອປົວອາການເຈັບຄໍ ກໍພຽງແຕ່ນຳເອົາຫົວຜັກບົ່ວ ມາສັບພໍມຸ່ນໆ ປະສົມກັບນ້ຳເຜິ້ງ 6 ອອນ (ປະມານ 177 ມີລີລິດ) ໜຶ້ງດ້ວຍໄຟອ່ອນໆ ປະມານ 2 ຊົ່ວໂມງ ຈາກນັ້ນ ນຳມາຊົງນ້ຳອຸ່ນ ຈິບຕະຫຼອດ ໝົດມື້ຈະຊ່ວຍໃຫ້ອາການເຈັບຄໍບັນເທົາລົງໄດ້.
