ທຸກຄົນລ້ວນແລ້ວແຕ່ມີເປົ້າໝາຍໃນຊີວິດທີ່ວາງໄວ້ ແລະ ມຸ້ງຫວັງທີ່ຈະເຮັດໃຫ້ມັນສຳເລັດ ບໍ່ວ່າຈະເປັນ ດ້ານວຽກງານ, ດ້ານການເບິ່ງແຍງສຸຂະພາບ ຫຼື ເປົ້າໝາຍໃນການເກັບເງິນ, ເຖິງວ່າເປົ້າໝາຍຂອງແຕ່ລະຄົນຈະແຕກຕ່າງກັນ ແຕ່ສຸດທ້າຍແລ້ວ ການຕັ້ງເປົ້າໝາຍໃນຊີວິດ ກໍເພື່ອການຕອບໂຈດໃຫ້ຕົນເອງເຮັດສິ່ງທີ່ຕັ້ງໄວ້ ໃຫ້ສຳເລັດ ມື້ນີ້ເຮົາຈະມາແນະນຳ ການຕັ້ງເປົ້າໝາຍໃນຊີວິດ ເພື່ອໃຜທີ່ຍັງຄິດບໍ່ອອກວ່າປີນີ້ຈະວາງແຜນຊີວິດແບບໃດລອງເອົາວີທີທີ່ເຮົາແນະນຳນີ້ໄປລອງໃຊ້ກັນໄດ້ເດີ.
- ຕັ້ງເປົ້າໝາຍໄວ້ວ່າສິ່ງທີ່ເຮົາເຮັດນັ້ນ ເຮົາຕ້ອງການຫຍັງ
ເມື່ອຕັ້ງເປົ້າໝາຍຊີວິດແລ້ວ ເຮົາຕ້ອງຕັດສິນໃຈຢ່າງເດັດຂາດ ແລະ ຈິງຈັງກັບມັນ, ບາງຄົນຢາກເຮັດທຸລະກິດ, ບາງຄົນຢາກມີເງິນຫຼາຍ, ບາງຄົນຢາກຈ່ອຍ ໃຫ້ເຮົາຄິດໄວ້ວ່າ ສິ່ງທີ່ເຮົາຈະເຮັດນັ້ນເປັນສິ່ງທີ່ເຮົາຕັ້ງໃຈແທ້ໆ ບໍ່ແມ່ນເຮັດເພາະເຫັນຄົນອື່ນເຮັດ ແລ້ວເຮັດຕາມ ແລະ ເວລາເຮັດບໍ່ສຳເລັດ ຈະມີຄວາມທໍ້ແທ້, ຢຸດເຮັດ ເພາະນັ້ນມັນບໍ່ແມ່ນສິ່ງທີ່ເຈົ້າຕ້ອງການແທ້ ເປັນພຽງແຕ່ກະແສຊົ່ວຄາວເທົ່ານັ້ນເອງ.
- ກໍານົດເປົ້າໝາຍ
ເມື່ອຮູ້ວ່າເປົ້າໝາຍຊີວິດ ຫຼືສິ່ງທີ່ຕ້ອງການເຮັດຄືຫຍັງແລ້ວ ຕໍ່ໄປກໍຄືການກຳນົດເປົ້າໝາຍ ເພາະການທີ່ຈະປະສົບຜົນສຳເລັດໄດ້ ສ່ວນໜຶ່ງກໍມາຈາກການກຳນົດເປົ້າໝາຍທີ່ຊັດເຈນ ກຳນົດໄປເລີຍວ່າຈະສຳເລັດໃນວັນທີ, ເດືອນ ແລະ ປີໃດ ແຕ່ຕ້ອງສອດຄ່ອງກັບຄວາມເປັນຈິງ ທີ່ຈະສາມາດເຮັດໃຫ້ສຳເລັດໄດ້ ສຸດທ້າຍແລ້ວຖ້າຕັ້ງເປົ້າໝາຍຊີວິດໄວ້ ແຕ່ບໍ່ຍອມລົງມືເຮັດ ເປົ້າໝາຍທີ່ຕັ້ງໄວ້ກໍເປັນພຽງຄວາມຝັນລົມໆແລ້ງໆ ບໍ່ມີມື້ເກີດຂຶ້ນຈິງ ດັ່ງນັ້ນຈຶ່ງຕ້ອງລົງມືເຮັດຢ່າງຈິງຈັງນຳ.
- ວາງແຜນ
ການວາງແຜນ ອາດກຳນົດຄວບຄູ່ໄປກັບການກຳນົດເປົ້າໝາຍໃນຊີວິດ ໂດຍອາດຈະຕ້ອງກຳນົດອອກມາວ່າ ມື້ນີ້ເຮົາຕ້ອງເຮັດຫຍັງ, ເດືອນໜ້າເຮົາຕ້ອງເຮັດຫຍັງຕໍ່ ໃຫ້ຂຽນເປົ້າໝາຍໄວ້ເປັນຂໍ້ຍ່ອຍໆ, ເປົ້າໝາຍຍ່ອຍໆແບບນີ້ອາດສົ່ງຕໍ່ໃຫ້ໄປເຖິງເປົ້າໝາຍທີ່ໃຫຍ່ໄດ້ ປຽບດັ່ງການກະຈາຍວຽກເຮັດເທື່ອລະນ້ອຍ ພໍລວມເຂົ້າກັນກໍອາດຈະກາຍເປັນເປົ້າໝາຍໃຫຍ່ ດັ້ງນັ້ນ ການວາງແຜນຈະຕ້ອງໃຫ້ສອດຄ່ອງກັບເປົ້າໝາຍ ແລະ ເຮັດໃຫ້ສຳເລັດຕາມທີ່ວາງໄວ້ນຳ.
- ລົງມືປະຕິບັດ
ເມື່ອກຳນົດເປົ້າໝາຍ ແລະ ວາງແຜນຮຽບຮ້ອຍແລ້ວ ກໍເລີ່ມລົງມືປະຕິບັດໄດ້ເລີຍ, ຈົ່ງມຸ້ງໝັ້ນຕັ້ງໃຈ, ທຸ້ມເທເຮັດໃຫ້ເຕັມທີ່ ໝັ່ນທົບທວນເປົ້າໝາຍໃນຊີວິດຢູ່ສະເໝີ ຢ່າກັງວົນຕໍ່ອຸປະສັກທີ່ຈະເກີດຂຶ້ນ ເພາະອຸປະສັກເປັນບົດທົດສອບ ປຽບເໝືອນຂັ້ນໄດ ໃຫ້ເຮົາກ້າວຂ້າມໄປສູ່ຄວາມສຳເລັດ ຫາກຄິດ ແລະ ແກ້ໄຂບັນຫາໄດ້ ຄວາມສຳເລັດກໍຈະຢູ່ບໍ່ໄກຢ່າງແນ່ນອນ.
- ສ້າງຄວາມສຳເລັດຕໍ່ເນື່ອງ
ເມື່ອເຮົາໄດ້ເລີ່ມເຮັດສິ່ງຕ່າງໆ ຈົນສຳເລັດຕາມເປົ້າໝາຍ ກໍຢ່າລືມຮັກສາມາດຕະຖານນີ້ໄວ້ໃຫ້ຄົງທີ ຢ່າມົວຫຼົງຢູ່ກັບຄວາມສຳເລັດທີ່ໄດ້ມາ ເພາະບໍ່ຮູ້ວ່າຄວາມສຳເລັດທີ່ໄດ້ມານັ້ນ ຈະຢູ່ກັບເຮົາໄປຕະຫຼອດຫຼືບໍ່, ຄວນຮຽນຮູ້ສິ່ງໃໝ່ໆຢູ່ສະເໝີ ເພື່ອການພັດທະນາຕົນເອງ ໃຫ້ປະສົບຜົນສຳເລັດໃນທຸກໆດ້ານ.
ດັ່ງນັ້ນແລ້ວ ບໍ່ມີຫຍັງຍາກ ເກີນຄວາມສາມາດຂອງເຮົາ ຫາກເຮົາມຸ້ງໝັ້ນຕັ້ງໃຈ ມີເປົ້າໝາຍໃນຊີວິດທີ່ແນ່ນອນ ບໍ່ຫຍໍ້ທໍ້ຕໍ່ອຸປະສັກທີ່ເຂົ້າມາລະຫວ່າງທາງ ເຊື່ອໄດ້ເລີຍວ່າ ຄວາມສຳເລັດຢູ່ບໍ່ໄກແນ່ນອນ ແລະ ເມື່ອເຈົ້າຮູ້ຈັກການຕັ້ງເປົ້າໝາຍ ແລະ ລະບຸຈຸດປະສົງຂອງເຈົ້າແລ້ວ ກໍອາດຈະເຮັດໃຫ້ຄວາມຝັນເຮົາສຳເລັດໄດ້.