ທຸກມື້ນີ້ ໂຊຊ້ຽວມີເດຍ (social media) ມີບົດບາດສຳຄັນຕໍ່ຊີວິດຂອງຄົນເຮົາຢ່າງຫຼວງຫຼາຍ ດ້ວຍຄວາມສາມາດທີ່ຊ່ວຍໃຫ້ຄົນທັງໂລກເຊື່ອມຕໍ່ກັນແບບບໍ່ມີຂອບເຂດ ຈົນເວົ້າໄດ້ເລີຍວ່າທຸກຄົນໜ້າຈະມີບັນຊີໂຊຊ້ຽວມີເດຍຂອງຕົນເອງຢ່າງໜ້ອຍໜຶ່ງບັນຊີ ບໍ່ວ່າຈະເປັນແພັດຟອມໃດກໍຕາມ.
ການໃຊ້ຊີວິດໃນໂຊຊ້ຽວມີເດຍ ຖືວ່າເປັນອີກຕົວຕົນໜຶ່ງຂອງເຮົາເລີຍກໍວ່າໄດ້ ລວມໄປເຖິງການທີ່ເຮົາອາດເປັນໃຜກໍໄດ້ທີ່ບໍ່ມີໃນໂລກແຫ່ງຄວາມເປັນຈິງ ເຊິ່ງນັ້ນເຮັດໃຫ້ມັນເປັນດາບສອງຄົມ ເພາະເຮົາອາດຈະຫຼົງເອົາພຶດຕິກຳທີ່ໃຊ້ໃນໂຊຊ້ຽວມີເດຍ ມາໃຊ້ໃນຊີວິດຈິງ ຈົນເຮັດໃຫ້ເກີດຂໍ້ຜິດພາດໄດ້, ມາເບິ່ງນໍາກັນວ່າ ທ່ານມີພຶດຕິກຳເຫຼົ່ານີ້ຫຼືບໍ່.
1. ໃຊ້ສະຕິກເກີ້ເກີນຄວາມຈຳເປັນ
ຫຼາຍຄົນອາດຄິດວ່າການໃຊ້ສະຕິກເກີ້ແທນຄຳເວົ້ານັ້ນ ຈະຊ່ວຍໃຫ້ການສົນທະນາເຂົ້າໃຈງ່າຍ ເບິ່ງເປັນກັນເອງ ຖ້າມີແຕ່ໜັງສືອາດຈະຄຽດເກີນໄປ ເລຍສົ່ງສະຕິກເກີ້ແທນຄວາມຮູ້ສຶກ, ແຕ່ຮູ້ບໍ່ວ່າໃນການສົນທະນາທີ່ເປັນທາງການ ເຊັ່ນ ໃນຮູບແບບຂອງທຸລະກິດເຮົາຄວນຫຼີກລ້ຽງການໃຊ້ສະຕິກເກີ້ ເພາະມັນຈະເຮັດໃຫ້ບົດສົນທະນານັ້ນເບົາລົງຈົນບໍ່ໜ້າເຊື່ອຖື ເບິ່ງບໍ່ເປັນມືອາຊີບ ໃນເມື່ອເຮົາບໍ່ຮູ້ວ່າຄູ່ສົນທະນາເຮົາມີທັດສະນະຄະຕິແນວໃດ ເຮົາກໍຄວນລະວັງໄວ້ກ່ອນ.
2. ໃຊ້ພາສາແບບຜິດໆ ຖືກໆ
ການໃຊ້ພາສາຜິດ ລວມໄປເຖິງການໃຊ້ຄຳຜິດຄວາມໝາຍ ຫາກລົມກັນໃນສະຖານະການທີ່ເປັນທາງການ ຄວນຫຼີກລ້ຽງການຂຽນສະກົດຄຳງ່າຍໆ ແບບທີ່ບໍ່ຖືກຫຼັກໄວຍາກອນ ຂຽນຄຳໃຫ້ຖືກຕ້ອງເຖິງວ່າເຮົາຈະອ່ານແລ້ວພໍເຂົ້າໃຈ ແຕ່ວ່າມັນບໍ່ຖືກກາລະເທສະ ແລະ ຄົນອື່ນອາດເຂົ້າໃຈເຮົາຜິດໄດ້.
3. ແຊຮ໌ຂ່າວກັນແບບງ່າຍໆ
ການຕິດຕໍ່ສື່ສານພາຍໃນ ມັກຈະມີກຸ່ມແຊັດພາຍໃນສຳລັບເວົ້າເລື່ອງງານ ລວມໄປເຖິງເລື່ອງສ່ວນຕົວ ບາງຄັ້ງທີ່ເຮົາອາດຈະເຫັນຂ່າວທີ່ໜ້າສົນໃຈ ແລະ ສົ່ງຂໍ້ມູນຕໍ່ດ້ວຍຄວາມຫວັງດີ ຢາກໃຫ້ຄົນອື່ນໄດ້ຮູ້ນໍາ ແຕ່ບໍ່ໄດ້ກວດສອບເລີຍວ່າ ຂ່າວນັ້ນຈະເປັນຂ່າວປອມ ຫຼື ຂ່າວແທ້ ແຕ່ຫາກເປັນຂ່າວປອມອາດຈະເຮັດໃຫ້ຂໍ້ມູນຖືກສົ່ງຕໍ່ໄປອີກໃນເວລາອັນສັ້ນ ສະນັ້ນຄວນກວດສອບກ່ອນແຊຮ໌.
4. ໂພສທຸກຢ່າງທີ່ຄິດໃນຫົວ
ເມື່ອທຸກຢ່າງເຂົ້າສູ່ໂລກອອນລາຍແລ້ວ ເຖິງຈະລົງບໍ່ດົນແລ້ວລົບຖິ້ມ ກໍຈະມີຄົນທີ່ແຄັບໄວ້ທັນ ຫາກວ່າມື້ໃດມື້ໜຶ່ງຖືກພົບເຫັນອາດກະທົບຕໍ່ຊີວິດໄດ້ ເພາະມີຫຼາຍກໍລະນີທີ່ບໍ່ມັກຄິກກັ່ນຕອງໃຫ້ດີກ່ອນໂພສ ໂດຍບໍ່ຄຳນຶງເຖິງຜົນເສຍຫານທີ່ຈະຕາມມາໃນພາຍຫຼັງ ເຊັ່ນ ໂພສດ່າຄົນນັ້ນຄົນນີ້ ຫຼື ໂພສຄຳບໍ່ສຸພາບ ແລ້ວຫາກກະທົບມາສ່ວນຫຼາຍກໍຈະບອກຮູ້ເທົ່າບໍ່ເຖິງການ.
5. ສ້າງຄວາມເຂົ້າໃຈຜິດໃນການສື່ສານ
ການສື່ສານຜ່ານໂຊຊ້ຽວມີເດຍ ສ່ວນຫຼາຍຈະເປັນການຊື່ສານຜ່ານຕົວອັກສອນ ບາງຄັ້ງອາດເຮັດໃຫ້ເຂົ້າໃຈການສົນທະນາຄາດເຄື່ອນໄດ້ ເພາະເຮົາບໍ່ມີທາງຮູ້ອາລົມ ນໍ້າສຽງ ສີໜ້າ ແລະ ປະຕິກິລິຍາ ໃນຕອນນັ້ນຂອງເຂົາໄດ້ ເຮັໃຫ້ເຮົາເຂົ້າໃຈເຂົາເຈົ້າຜິດໃນກາສົນທພນາໃນຄັ້ງນັ່ນ.
6. ເກີດສະພາວະເສບຕິດໂຊຊ້ຽວມີເດຍ
ການໃຊ້ເວລາໃນໂລກອອນລາຍຫຼາຍເກີນໄປ ອາດເຮັດໃຫ້ເຮົາເກີດອາການພາວະເສບຕິດໂຊຊ້ຽວມີເດຍໄດ້ ເຮັດໃຫ້ເກີດຜົນກະທົບກັບສຸຂະພາບຈິດໄດ້ ໂດຍສະເພາະອາດເກີດອາການ FOMO (Fear of Missing Out) ຫຼື ຢ້ານຕົກກະແສ ຂາດໂທລະສັບບໍ່ໄດ້ (No Mobile Phone Phobia).
Hits: 3
