ໃນວັນ ທີ 14 ກຸມພາ 2023 ຢູ່ທີ່ ສະຖາບັນເລືອດແຫ່ງຊາດ ອົງການກາແດງແຫ່ງຊາດ ໄດ້ມີກິດຈະກຳ “ແບ່ງປັນເລືອດແບ່ງປັນຄວາມຮັກ” ເປັນການຮ່ວມມື້ກັນລະຫວ່າງ ສະຖາບັນເລືອດແຫ່ງຊາດ ແລະ ບໍລິສັດ ພົງສະຫວັນປະກັນໄພ (ເອພີເອ).
ຈຸດປະສົງ ແມ່ນເພື່ອຕ້ອງການສືບຕໍ່ປະກອບສ່ວນໃນການຊ່ວຍເຫຼືອສັງຄົມ ເນື່ອງຈາກພວກເຮົາເຫັນວ່າປັດຈຸບັນ ເລືອດຍັງຂາດແຄນຫຼາຍ ແລະ ມີຄວາມຈຳເປັນສຳລັບຫຼາຍໆຄົນທີ່ຕ້ອງການເລືອດໃນກໍລະນີສຸກເສີນ.
ຈາກການສອບຖາມ ນາງ ດາວັນ ພົງຊາ ນັກຮຽນຊັ້ນມໍ 7 ໂຮງຮຽນຫງວຽນຢູ ໜຶ່ງໃນຜູ້ເຂົ້າບໍລິຈາກເລືອດໃນຄັ້ງນີ້ ເວົ້າວ່າ: ການບໍລິຈາກເລືອດເທື່ອນີ້ ເປັນເທື່ອທຳອິດຂອງນ້ອງເລີຍ, ຮູ້ສຶກຕື່ນເຕັ້ນດີ ຕອນທຳອິດກໍຮູ້ສຶກຢ້ານໆຢູ່ ຢ້ານວ່າເລືອດເຮົາຈະບໍ່ຜ່ານ, ບໍ່ສາມາດເອົາອອກໄດ້ ແຕ່ກໍລົງໃຈທີ່ສຸຂະພາບເຮົາແຂງແຮງ ສາມາດນຳເລືອດຂອງຕົນເອງໄປຊ່ວຍຜູ້ທີ່ ຂາດແຄນເລືອດ.
ນາງ ພຸດທະພອນ ພະນັກງານຢູ່ BCEL ເວົ້າວ່າ: ການບໍລິຈາກເລືອດເທື່ອນີ້ເປັນເທື່ອທີ 7 ແລ້ວ ແຕ່ການທີ່ໄດ້ມາບໍລິຈາກເທື່ອໃດ ກໍຍັງມີຄວາມຕື່ນເຕັ້ນ ແລະ ລຸ້ນຢູ່ສະເໝີ ວ່າເຮົາຈະສາມາດເອົາເລືອດອອກໄດ້ບໍ່, ສ່ວນຕົວແລ້ວຈະມາບໍລິຈາກວັນທີ 14 ກຸມພາ ຂອງທຸກໆປີ ນອກນັ້ນ ການບໍລິຈາກເລືອດຍັງໄດ້ສຸຂະພາບທີ່ແຂງແຮງ ໂດຍສະເພາະແມ່ນ: ໄດ້ກວດສຸຂະພາບ, ໄດ້ຮູ້ໝວດເລືອດຕົນເອງ, ໄດ້ຊ່ວຍຊີວິດຄົນ ແລະ ໄດ້ບຸນກຸສົນນຳອີກ.
ທ່ານ ດຣ. ຈັນທະລາ ສຸກສາຄອນ ຫົວໜ້າ ສະຖາບັນເລືອດແຫ່ງຊາດ ອົງການກາແດງລາວແຫ່ງຊາດ ກ່າວວ່າ: ສະເພາະປີ 2022, ແຜນການຄາດໝາຍສູ້ຊົນ ໃນການປຸກລະດົມຮັບບໍລິຈາກເລືອດໃນທົ່ວປະເທດ ເຊີ່ງຕ້ອງໃຫ້ບັນລຸ 68,000 ຖົງ ແຕ່ພວກເຮົາສາມາດປະຕິບັດໄດ້ 67,017 ຖົງ ເທົ່າກັບ 98,5% ຂອງແຜນການ.
ສ່ວນ ປີ 2023, ແຜນການຄາດໝາຍສູ້ຊົນ ທີ່ສະພາແຫ່ງຊາດຮັບຮອງ ທົ່ວປະເທດຕ້ອງບັນລຸ 73,000 ຖົງ ເຊີ່ງກໍໄດ້ແບ່ງຕົວເລກໃຫ້ແຕ່ລະແຂວງໄປຈັດຕັ້ງປະຕິບັດ. ເຊີ່ງພວກເຮົາມີຄວາມມຸ້ງໝັ້ນຢ່າງແຮງກ້າທີ່ຈະໃຫ້ບັນລຸຕາມຄາດໝາຍດັ່ງກ່າວ ເພື່ອໃຫ້ເປັນໄປຕາມຄວາມຕ້ອງການເລືອດຂັ້ນຕໍ່າ ຂອງອົງການອານາໄມໂລກ ທີ່ກຳນົດໄວ້ວ່າ ຕ້ອງຮັບບໍລິຈາກເລືອດໃຫ້ໄດ້ 1% ຂອງປະຊາຊົນຕໍ່ປີ ຫຼື 10 ຖົງ ຕໍ່ 1,000 ຄົນ.
Hits: 2
