Monday, July 15, 2024
Lenovo

ມີຫຼາຍຢ່າງທີ່ໜ້າສົນໃຈໃນ “ບຸນພະເຫວດ”

ບຸນພະເຫວດ ຫຼື ບຸນມະຫາຊາດ ເປັນບຸນປາງໃຫຍ່ ທີ່ມີຄວາມສຳຄັນຫຼາຍ ໃນການເຕົ້າໂຮມຄວາມສາມັກຄີເປັນປຶກແຜ່ນກົມກຽວກັນຂອງປະຊາຊົນລາວໃນແຕ່ລະທ້ອງຖິ່ນແຕ່ເໜືອຕະຫຼອດໃຕ້. ເພື່ອຮັກສາໄວ້ຮີດຄອງປະເພນີອັນດີງາມຂອງລາວ ທີ່ເຄີຍປະຕິບັດສືບທອດກັນມາແຕ່ດົນນານ.

ບຸນດັ່ງກ່າວຈະຈັດຂື້ນໃນລະຫວ່າງເດືອນ 4 ຫາ ເດືອນ 6 ລາວ ເຊິ່ງກົງກັບ ເດືອນ ມີນາ ຫາ ເດືອນ ພຶດສະພາ ຂອງທຸກໆປີ. ໃນແຕ່ລະທ້ອງຖິ່ນອາດມີເງື່ອນໄຂໃນການຈັດງານບຸນນີ້ແຕກຕ່າງກັນ ແຕ່ເປົ້າໝາຍສ່ວນໃຫຍ່ແມ່ນການຟັງເທດນິທານຊາດົກເລື່ອງ “ພະເຫວດສັນດອນ” ໃຫ້ຈົບໃນມື້ໜື່ງວັນດຽວ ເພາະເຊື່ອວ່າບຸນກຸສົນແຫ່ງການໄດ້ຟັງເທດເລື່ອງ “ພະເຫວດສັນດອນ” ຈົນຈົບໃນວັນດຽວຈະໄດ້ພົບສາສະໜາຂອງພະສີອະລິຍະ (ພະພຸດທະເຈົ້າອົງໃໝ່ທີ່ຈະມາໃນພາຍພາກໜ້າ). ເປັນສາສະໜາທີ່ມີແຕ່ຄົນມີບຸນເທົ່ານັ້ນ. ດັ່ງນັ້ນ, ຈຶ່ງມີການເຮັດບຸນຟັງເທດນິທານເລື່ອງ ພະເຫວດສັນດອນມາຮອດທຸກມື້ນີ້.

ສຳລັບ ພິທີກຳ ແລະ ຂັ້ນຕອນຂອງການເຮັດບຸນພະເຫວດສັນດອນ ແມ່ນມີຫຼາຍຂັ້ນຕອນພໍສົມຄວນ ແຕ່ຈະຂໍສະເໜີເປັນບາງສ່ວນ ເຊັ່ນ: ພິທີກຳການແຫ່ພະເຫວດເຂົ້າເມືອງ ກໍເປັນຂັ້ນຕອນໜື່ງທີ່ສຳຄັນໃນການເຮັດບຸນພະເຫວດ. ບາງທ້ອງຖິ່ນຍັງຮັກສາມູນເຊື້ອແບບດັ້ງເດີມທີ່ປູ່ຍ່າຕາຍາຍເຄີຍພາປະຕິບັດມາໂດຍສະເພາະແຖວເຂດນອກ. ບາງບ່ອນກໍດັດປັບໃຫ້ເຂົ້າກັບສະພາບຕົວຈິງຂອງສັງຄົມ ຫຼື ຕາມເງື່ອນໄຂຄວາມເໝາະສົມ.

ພິທີກຳການແຫ່ພະເຫວດເຂົ້າເມືອງ ມື້ບຸນເວລາປະມານບ່າຍສອງໂມງ ທັງເຖົ້າແກ່ ແລະ ນ້ອຍໜຸ່ມຍິງສາວ ໄດ້ພ້ອມພາກັນອອກໄປປ່າ ຫຼື ທົ່ງນາແຄມບ້ານ ເພື່ອເຮັດພິທີກຳເຊີນພະເຫວດເຂົ້າມາເມືອງ ໂດຍຈະມີ ຄູບາ, ຈົວເນນ ແລະ ສາລະວັດ ເປັນຜູ້ນຳພາ ຊຶ່ງເພິ່ນຈະມີບົດເປັນຄຳເຊີນ ແລະ ບົດຕອບຮັບລະຫວ່າງພະຍາສີສົນໄຊ ແລະ ພະເຫວດສັນດອນ ໂດຍສະເພາະຂອງເພິ່ນ ເມື່ອຈົບແລ້ວກໍພາກັນແຫນແຫ່ຜ້າພະເຫວດຍາວຫຼາຍແມັດ ທີ່ມີຮູບແຕ້ມແຕ່ລະຕອນຂອງນິທານ ກັບເມືອສູ່ສາລາວັດ ແລ້ວເພິ່ນກໍເລີ່ມສືບຕໍ່ພິທີຕໍ່ໄປ.

ບາງບ່ອນເຂົາເຈົ້າຈະເຮັດແບບເປັນຂະບວນໃຫຍ່ແຫ່ແຫນຢ່າງມ່ວນຊື່ນ ຊຶ່ງເຂົາເຈົ້າຈະເອົາຄົນມາແຕ່ງໂຕສົມມຸດເປັນພະຍາສີສົນໄຊ, ເປັນນາງ ພຸດສະດີ, ເປັນພະເຫວດ, ເປັນນາງມະທີ, ເປັນທ້າວ ຊາລີ, ນາງ ກັນຫາ, ຊຸຍຊະກະພາມ, ທະຫານ ແລະ ປະຊາຊົນແຫ່ແຫນແພນກັ້ງ. ພ້ອມທັງມີໂຕຊ້າງ, ໂຕມ້າ ທີ່ເຮັດເປັນໂຄງຮ່າງເຮັດດ້ວຍໄມ້ໄຜ່ ຫຼື ເຫຼັກ ແລ້ວເອົາຜ້າຂ້າວມາຄຸມເປັນຫຸ່ນຊ້າງມ້າ ແລ້ວແຕ່ງແຕ້ມປະດັບປະດາໃຫ້ຈົບງາມ ບາງຄົນກໍເອົາເງິນຕິດໃສ່ແລ້ວແຕ່ສັດທາ. ພາກັນຍົກ ຫຼື ໃສ່ລົດແຫ່ໄປພາຍໃນບ້ານ ເພື່ອສ້າງສີສັນໃຫ້ງານບຸນມີຄວາມຄຶກຄື້ນມ່ວນຊື່ນ ພ້ອມທັງເປັນການຮັກສາໄວ້ຮີດຄອງປະເພນີຂອງລາວເຮົາ ບໍ່ໃຫ້ສູນຫາຍໄປ.

ອີກຢ່າງໜື່ງການເຮັດຫຸ່ນໂຕຊ້າງໂຕມ້າແຫ່ແຫນໃນງານບຸນພະເຫວດນີ້ ເພາະໃນສະໄໝນັ້ນ (ໃນນິທານ) ພາຫານະໃນການໃຊ້ເດີນທາງແມ່ນມີແຕ່ໂຕຊ້າງໂຕມ້າເທົ່ານັ້ນ ໃນການໄປອັນເຊີນພະເຫວດເຂົ້າມາເມືອງຂອງພະຍາສີສົນໄຊກໍໄດ້ອາໄສຂີ່ຊ້າງ ແລະລົດມ້າເປັນຂະບວນແຫ່ແຫນໄປ ເພາະຫົນທາງຈາກເມືອງປະເຊໄຊໄປຫາປ່າເຂົາວົງກົດແມ່ນໄກແສນໄກ ຕ້ອງໃຊ້ເວລາຫຼາຍເດືອນຈິ່ງຮອດ ເພາະສະນັ້ນຫຸ່ນໂຕຊ້າງ ແລະໂຕມ້າທີ່ເຂົາເຮັດໃນງານບຸນພະເຫວດຈິ່ງມີຄວາມໝາຍໃນການແຫ່ຂະບວນໄປເຊີນເອົາພະເຫວດເຂົ້າມາເມືອງນັ້ນແລ້ວ. ຍັງບໍ່ພໍເທົ່ານັ້ນ ພະຍາສີສົນໄຊຍັງໃຫ້ເສນາອາມາດ ແປງທາງປູກຕົ້ນກ້ວຍ, ຕົ້ນອ້ອຍ, ຕົ້ນພ້າວ ແລະອື່ນ… ຕາມແຄມທາງ. ເມື່ອຕອນກັບມາກໍສາ ມາດເກັບກິນ ຂື້ນກິນ ຫັກກິນ ຜົນລະປູກຕ່າງໆນັ້ນໄດ້.

ສະນັ້ນ, ເຄື່ອງຕ່າງໆທີ່ກ່ຽວກັບນິທານພະເຫວດສັນດອນ ທີ່ເຮົາສັງເກດເຫັນ ບໍ່ວ່າຈະເປັນຫຸ່ນຊ້າງມ້າ ຫຼື ເຄື່ອງບູຊາຕ່າງໆ ໃນສາລາໃນຫໍທະມາດເຊັ່ນ: ງ້າວ, ປືນ, ຕົ້ນກ້ວຍ, ຕົ້ນອ້ອຍ, ເບ້ຍພ້າວ, ເບ້ຍພູ, ເບ້ຍໝາກ, ໝ້ຽງ, ໝາກ, ໝາກພ້າວອ່ອນ, ໄຫນ້ຳ,…ແມ່ນຈະມີຄວາມໝາຍທັງນັ້ນ ຕົວຢ່າງ: ງ້າວ ແລະປືນ ເປັນອາວຸດຂອງທະຫານ, ໄຫນ້ຳ ແມ່ນໝາຍເຖິງສະໂບກຂາລະເນ ທີ່ມີບົວ ແລະປູປາອຸດົມສົມບູນ ເປັນຕົ້ນ.

ດັ່ງນັ້ນ, ການເຮັດບຸນພະເຫວດ ບາງບ່ອນກໍໄດ້ເອົາໃຈໃສ່ເຮັດແທ້ທຳຈິງຕາມປູ່ຍ່າຕາຍາຍເຄີຍພາເຮັດມາ ເພື່ອໃຫ້ລູກຫຼານຄົນຮຸ່ນໃໝ່ທີ່ເປັນຜູ້ສືບທອດຕໍ່ໄປໄດ້ເຫັນຄວາມສຳຄັນຂອງຮີດຄອງປະເພນີອັນດີງາມຂອງລາວເຮົາ ແຕ່ບາງບ່ອນຍັງຖືເບົາເອົາງ່າຍ ເຮັດໄປພໍແລ້ວຮີດແລ້ວຄອງ ເຮັດໃຫ້ງານບຸນປະຈຳປີ ຫຼື ບຸນພະເຫວດ ໝົດຄວາມສຳຄັນໄປເທື່ອລະເລັກລະນ້ອຍນັ້ນເອງ.

ໂດຍ: ທິດໃຕ້

More from author

Related posts

ຂໍຂອບໃຈນຳຜູ້ສະໜັບສະໜູນ

Latest posts

ຊໍາຊຸງ ເປີດໂຕ Galaxy Z Fold6 ແລະ Z Flip6 ຍົກລະດັບ Galaxy Al ລຸ້ນໃໝ່ສໍາລັບໂທລະສັບໜ້າຈໍພັບ.

ຊໍາຊຸງລາວ ເປີດໂຕ Galaxy Z Fold6 ແລະ Z Flip6 ພ້ອມໂປຣໂມຊັນພິເສດສໍາລັບຜູ້ທີ່ສັ່ງຊື້ລ່ວງໜ້າທີ່ Galaxy Experience Space ນະຄອນຫຼວງວຽງຈັນ  ເປິດປະສົບການ Galaxy AI ລຸ້ນຫຼ້າສຸດສໍາລັບໂທລະສັບມືຖືໜ້າຈໍພັບ  ໃຫ້ຜູ້ເຂົ້າຮ່ວມງານໄດ້ສໍາຜັດການໃຊ້ງານໂທລະສັບມືຖືທີ່ທັນສະໄໝ  ຮ່ວມກັບໂມງ Galaxy Watch7 ແລະ ຫູຟັງ Galaxy Buds3/Galaxy Buds3 Pro ເຊິ່ງໄດ້ເປີດໂຕພອ້ມກັນໃນງານ Samsung Unpacked ທີ່ປາຣີ  (Paris) ປະເທດຝຣັ່ງ ໃນວັນທີ 10 ກໍລະກົດ 2024 ທີ່ຜ່ານມາ.

ສາຍການບິນ Vietjet ບັນລຸ​ຂໍ້​ຕົກລົງ ​ຍົກລະດັບ​ການ​ເຊື່ອມ​ຕໍ່​ການ​ຂົນ​ສົ່ງ​ທາງ​ອາກາດ ລະຫວ່າງ ສປປ ລາວ ແລະ ສສ ຫວຽດນາມ

(ນະຄອນຫຼວງວຽງຈັນ, ວັນທີ 11 ກໍລະກົດ 2024) - ກະຊວງໂຍທາທິການ ແລະ ຂົນສົ່ງປະຈຳ ສປປ ລາວ ແລະ ສາຍການບິນ Vietjet ປະກາດຂໍ້ຕົກລົງເພີ່ມທະວີການເຊື່ອມຕໍ່ການຂົນສົ່ງທາງອາກາດລະຫວ່າງ ປະເທດລາວ-ຫວຽດນາມ.

Sky Connections ໄດ້ຂະຫຍາຍ: ເສັ້ນທາງໃໝ່ຂອງສາຍການບິນ Vietjet ໃນທົ່ວປະເທດຈີນ ແລະ ເກົາຫຼີໃຕ້

(ນະຄອນຫຼວງວຽງຈັນ, ວັນທີ 08 ກໍລະກົດ 2024) –  ສາຍການບິນ Vietjet ໄດ້ສ້າງບາດກ້າວຄັ້ງໃໝ່ໃນການເຊື່ອມຕໍ່ສາຍການບິນຜ່ານ ພາກພື້ນອາຊີປາຊີຟິກ ດ້ວຍ​ການ​ເປີດ​ບໍລິການ​ໂດຍ​ກົງ​ແຫ່ງ​ທຳ​ອິດ ​ທີ່​ເຊື່ອມ​ຕໍ່​ ນະຄອນໂຮຈີ​ມິນ ​- Xi'an (ຈີນ) ​ແລະ ການ​ປະກາດ​ເສັ້ນທາງ Nha Trang - Daegu (ສ.​ເກົາຫຼີ),