ຊ່ວງໜ້າຮ້ອນແບບນີ້ ຜູ້ໃຊ້ງານຄອມພິວເຕີສ່ວນຫຼາຍມັກຈະຫາວິທີ ເພີ່ີມຄວາມເຢັນໃຫ້ຄອມ ເພາະຄວາມຮ້ອນເປັນບັນຫາໃຫຍ່ທີ່ເຮັດໃຫ້ອຸປະກອນເຮົາເສື່ອມສະພາບໄວຂຶ້ນ. ມື້ນີ້ ອິນໄຊລາວ ມາແນະນຳວິທີເບື້ອງຕົ້ນໃນການທີ່ຈະຊ່ວຍຫຼຸດຄວາມຮ້ອນຂອງຄອມໄດ້ໃນລະດັບໜຶ່ງ ໄປເບິ່ງນໍາກັນເລີຍ.
1. ປິດ Software ຫຼື ໂປແກຣມທີ່ບໍ່ໄດ້ໃຊ້ງານ
ນີ້ແມ່ນວິທີພື້ນຖານເລີຍ ເມື່ອພວກເຮົາເປີດເຄື່ອງ ມັນຈະມີບາງໂປແກຣມທີ່ພວກເຮົາອາດຈະບໍ່ໄດ້ນໍາໃຊ້ທັນທີ ໂດຍສະເພາະໂປຣແກຣມທີ່ມາພ້ອມກັບ Windows ເຊັ່ນ Skyped, Teams ຫຼື ບາງໂປຣແກມ Game Luancher ຖ້າຍັງບໍ່ໄດ້ຫຼິ້ນແມ່ນໃຫ້ຢຸດ End Task ມັນກ່ອນ, ພຽງເທົ່ານີ້ກໍນີ້ຈະຫຼຸດການໃຊ້ຊັບພະຍາກອນ ແລະ ມັນຈະຫຼຸດຜ່ອນຄວາມຮ້ອນໄດ້.
2. ທຳຄວາມສະອາດຝຸ່ນ ແລະ ພັດລົມ
ຂີ້ຝຸ່ນຫຼາຍ ເຮັດໃຫ້ການໄຫຼຂອງອາກາດໃນເຄື່ອງໜ້ອຍລົງ ເຊິ່ງຈະເຮັດໃຫ້ເກີດການສະສົມຂອງຄວາມຮ້ອນ ສຳລັບເຄື່ອງຄອມທີ່ເປັນ PC ແຕ່ສຳລັບ Notebooks ແນະນຳໃຫ້ຊອກຫາພັດລົມມາເປົ່າລົມ ເພື່ອເອົາຝຸ່ນອອກ.
3. ໃຊ້ Cooling Pad
ສຳລັບໃຜທີ່ໃຊ້ Notebook ແລະ ໝັ້ນໃຈໃນລະບົບຄວາມເຢັນໃນເຄື່ອງ ເອົາຄວາມຄິດນັ້ນອອກໄປໄດ້ເລີຍ, ໂດຍສະເພາະກັບ Gaming Notebook ບອກວ່າມັນດີປານໃດກໍເອົາບໍ່ຢູ່. ທີ່ສຳຄັນແມ່ນການຈັດວາງ AIR Flow ໄດ້ດີ ເພາະສ່ວນໃຫຍ່ແລ້ວ Notebook ດູດອາກາດຈາກໃຕ້ເຄື່ອງ ແລະ ປ່ອຍອາກາດຮ້ອນຢູ່ທາງເທິງ ຫຼື ຂ້າງເຄື່ອງ ດັ່ງນັ້ນ Cooling Pad ຈະຊ່ວຍໃຫ້ Notebook ດູດອາກາດໄດ້ດີຂຶ້ນນັ້ນເອງ.
4. ປັບໂໝດຄອມໃຫ້ເຮັດວຽກແບບ Performance
ໃນ Notebook ຫຼາຍລຸ້ນ ລວມທັງເຄື່ອງຄອມພິວເຕີ PC ບາງເຄື່ອງຈະມີໂຫມດທີ່ຈະເລືອກປັບການໃຊ້ງານ ເຊັ່ນ: Power Efficiency (ປະຫຍັດພະລັງງານ), Balance (ການດຸ່ນດ່ຽງ) ແລະ Performance (ປະສິດທິພາບສູງ).
ໃນ Windows 10 ແລະ 11, ທ່ານສາມາດເຂົ້າໄປທີ່ໜ້າ Power Mode ແລ້ວເລືອກໃຊ້ງານ Best Performance ເພື່ອເຮັດໃຫ້ລະບົບປັບຄວາມໄວພັດລົມສູງຂຶ້ນ ແລະ ຄອມພິວເຕີເຢັນລົງ.
5. ຕິດຕັ້ງ Software ເພື່ອເບິ່ງອຸນຫະພູມ
ໃນ Windows ພວກເຮົາສາມາດຕິດຕັ້ງໂປແກຣມເພີ່ມເຕີມເພື່ອເບິ່ງອຸນຫະພູມຂອງຄອມພິວເຕີ້ໄດ້ງ່າຍ ແລະ ຕິດຕັ້ງໄດ້ໂດຍບໍ່ເສຍຄ່າ (ແຕ່ໃຫ້ລະວັງໄວຣັດ ຕ້ອງໂຫຼດໂດຍກົງຈາກເວັບໄຊທີ່ປອດໄພ) ໂປແກຣມເຫຼົ່ານີ້ຈະເຮັດໃຫ້ທ່ານເຫັນວ່າ ອຸນຫະພູມພາຍໃນຄອມພິວເຕີສູງເກີນໄປບໍ? ຖ້າມັນສູງເກີນໄປ, ທ່ານຄວນຫຼີກລ່ຽງການໃຊ້ມັນໃນຊ່ວງເວລານັ້ນ ຫຼື ຫາວິທີກະຈາຍອາກາດຫຼາຍຂຶ້ນ ເຊັ່ນ: ຕິດຕັ້ງພັດລົມລະບາຍອາກາດ ຫຼື ຍົກໄປໃຊ້ໃນບ່ອນທີ່ມີອຸນຫະພູມຕໍ່າ.