ເພື່ອເປັນການຂະຫຍາຍການຕະຫຼາດໃຫ້ກວ້າງຂຶ້ນ ແລະ ກຽມຄວາມພ້ອມໃນການສົ່ງອອກໄປຕ່າງປະເທດ “ໝູຢໍ່ປ້າລີ” ຈຶ່ງຕັດສິນໃຈ ສ້າງໂຮງງານຂຶ້ນມາໃໝ່ ທີ່ທັງໃຫຍ່ສາມາດສ້າງຜະລິດຕະພັນອອກມາບໍ່ຕ່ຳກວ່າ 1-1,5 ໂຕນຕໍ່ມື້ ພ້ອມທັງຮັບປະກັນໄດ້ໃນເລື່ອງຂອງຄວາມສະອາດ, ຖືກຫຼັກອານາໄມ ໂດຍໂຮງງານຜະລິດໝູຢໍ່ປ້າລີ ແຫ່ງນີ້ ແມ່ນໄດ້ເປີດເປັນທາງການໃນວັນທີ 30 ພຶດສະພາ 2023 ຢູ່ທີ່ບ້ານ ດົງໝາກຄາຍ, ເມືອງ ໄຊທານີ, ນະຄອນຫຼວງ ວຽງຈັນ ແລະ .
ທ່ານ ວັນນະລັກ ຈັນທະວົງ (ອັອດດີ້) ຜູ້ບໍລິຫານ ໂຮງງານໝູຢໍ່ປ້າລີ ກ່າວວ່າ: ເມື່ອກ່ອນການເຮັດທຸລະກິດຂອງ ໝູຢໍ່ປ້າລີ ຈະເຮັດໃນລັກສະນະແບບຄອບຄົວ ໂດຍໃນເບື້ອງຕົ້ນແມ່ນສາມາດຜະລິດໝູຢໍ່ອອກມາໄດ້ພຽງແຕ່ 10-20 ກິໂລ ເທົ່ານັ້ນ! ແຕ່ເພິ່ນໄດ້ມີການພັດທະນາສູດຕ່າງໆ ຂຶ້ນມາ ເພື່ອໃຫ້ຖືກປາກຂອງຜູ້ບໍລິໂພກ ແລະ ໄດ້ມີການຂະຫຍາຍຕະຫຼາດອອກມາເລື້ອຍໆ ຈົນເຮັດໃຫ້ກຳລັງການຜະລິດສູງຂຶ້ນ, ເຊິ່ງກ່ອນໜ້າທີ່ຈະສ້າງໂຮງງານຂຶ້ນມາ ແມ່ນສາມາດຜະລິດໝູຢໍ່ໄດ້ 400-500 ກິໂລ ຕໍ່ມື້, ແຕ່ມັນກໍຍັງບໍ່ທັນພຽງພໍ່ກັບຄວາມຕ້ອງການຂອງຕະຫຼາດໃນປັດຈຸບັນ. ດັ່ງນັ້ນ, ເພິ່ນຈຶ່ງຕັດສິນໃຈສ້າງຕັ້ງໂຮງງານແຫ່ງນີ້ ຂຶ້ນມາ.
ນອກຈາກນີ້, ການສ້າງໂຮງງານ ຂຶ້ນມາແມ່ນເປັນການຕອບສະໜອງກັບຄວາມຮຽກຮ້ອງຕ້ອງການຂອງຕະຫຼາດ ທີ່ຢາກໃຫ້ໂຮງງານຂອງພວກເຮົາຜະລິດໝູຢໍ່ພາຍໃຕ້ແບຣນຂອງລູກຄ້າເອງ ແລະ ພາຍໃຕ້ແບຣນຂອງເຮົາເອງນຳ ເຊິ່ງກ່ອນໜ້າທີ່ຈະເປີດໂຮງງານແຫ່ງນີ້ ກໍໄດ້ໄປປຶກສາກັບຫຼາຍໆບ່ອນໃນເລື່ອງການສ້າງໂຮງງານວ່າມີຂໍ້ສະດວກ ແລະ ຂໍ້ຫຍຸ້ງຍາກຫຍັງແດ່.
ໃນເມື່ອຜະລິດຕະພັນຂອງເຮົາໄດ້ຮັບການຍົກມາດຕະຖານຂຶ້ນແລ້ວ ແມ່ນເຮົາຈະແນໃສ່ໃນເລື່ອງຂອງການສົ່ງອອກເປັນຫຼັກ ໂດຍສະເພາະແມ່ນຕະຫຼາດໃນປະເທດອ້ອມຂ້າງ ເຊິ່ງມາດຕະຖານທີ່ພວກເຮົາຈະໃຊ້ແມ່ນມາດຕະຖານ GMP ທີ່ກຳລັງກະກຽມສະໝັກໃນໄວໆ ນີ້.
ໃນປັດຈຸບັນ ພວກເຮົາຮັບປະກັນໄດ້ວ່າ ໂຮງງານຜະລິດ “ໝູຢໍ່ປ້າລີ” ສາມາດຜະລິດໝູຢໍ່ໄດ້ 1-1,5 ໂຕນຕໍ່ມື້ ແລະ ເຮົາສາມາດຮັບຊື້ວັດຖຸດິບຕ່າງໆ ຈາກຕະຫຼາດພາຍໃນ ແລະ ຕ່າງປະເທດ ພ້ອມທັງເຄື່ອງປຸງຕ່າງໆເຮົາກໍຈະພະຍາຍາມຊົມໃຊ້ຂອງຄົນລາວເຮົາເອງເກືອບທັງໝົດ, ນອກຈາກນີ້, ໂຮງງານຂອງພວກເຮົາແມ່ນໃຊ້ແຮງງານຄົນລາວ 100% ເພື່ອເປັນການສົ່ງເສີມກົນໄກການຕະຫຼາດຕ່າງໆ ພາຍໃນປະເທດເຮົາຫຼາຍຂຶ້ນ.
ສຳລັບຜະລິດຕະພັນ ໝູຢໍ່ປ້າລີ ປັດຈຸບັນ ແມ່ນມີຈຳໜ່າຍຢູ່ຮ້ານເຈມາກ ແລະ ຮ້ານສະດວກຊື້ຕ່າງໆ, ແຕ່ພາຍຫຼັງໂຮງງານສຳເລັດ ແລະ ມີການຜະລິດແລ້ວ ເຮົາກໍຈະແນໃສ່ຮ້ານຄ້າທຸກໆ ຮ້ານຄ້າຢູ່ໃນບ້ານເຮົາ ເພື່ອເຮັດໃຫ້ສັງຄົມຮູ້ຈັກຜະລິດຕະພັນຫຼາຍຂຶ້ນຕື່ມອີກ.
ນອກຈາກນີ້, ໝູຢໍ່ປ້າລີ ຍັງກຽມຈົດທະບຽນລິຂະສິດສິນຄ້າ ເພື່ອປ້ອງການປອມແປງ ແລະ ລອກຮຽນແບບແບຣນສິນຄ້າ ເຊິ່ງໄດ້ເກີດຂຶ້ນແລ້ວໃນໄລຍະຜ່ານມາ ທີ່ມີການກັອບປີ້ສະຕິກເກີ້ ໝູຢໍ່ປ້າລີ ໄປໃສ່ຜະລິດຕະພັນອື່ນທີ່ບໍ່ແມ່ນຂອງເຮົາ. ໃນອະນາຄົດ ແມ່ນກຽມຂະຫຍາຍສາຂາເພີ່ມອີກ 2-3 ສາຂາ ໃນ ນະຄອນຫຼວງ ວຽງຈັນ ແລະ ຢູ່ຕ່າງແຂວງ.
ຕິດຕໍ່ເພຈ ໝູຢໍ່ປ້າລີ ໄດ້ທີ່: https://www.facebook.com/MouyooParly.Donnoun?mibextid=LQQJ4d
