ບໍ່ວ່າຈະເປັນເລື່ອງການຮຽນ ການເຮັດວຽກ ສິ່ງເຫຼົ່ານີ້ສາມາດສ້າງຄວາມຄຽດ ຄວາມກົດດັນໃຫ້ກັບເຮົາໄດ້ ສ່ວນໃຫຍ່ມັກຈະຄ່ອຍໆສະສົມຄວາມເມື່ອຍ ຄວາມຄຽດໃຫ້ກັບຮ່າງກາຍ ແລະ ຈິດໃຈ ຈົນເຖິງຈຸດທີ່ໂຕຂອງເຮົາເອງຈະສົ່ງສັນຍານອອກມາ ເຊິ່ງຖ້າເຮົາມີສັນຍານເຫຼົ່ານີ້ ກໍຄວນຫາເວລາພັກຜ່ອນໃຫ້ໄວທີ່ສຸດ.
ສະມາທິສັ້ນ
ອາການທຳອິດຄືມັກຈະສະມາທິສັ້ນ ຮູ້ສຶກກັງວົນ ອາການນີ້ມັກເກີດຂຶ້ນຈາກການບໍ່ໄດ້ພັກຜ່ອນຢ່າງພຽງພໍ ຄວາມກັງວົນເຖິງງານທີ່ມີບັນຫາ ເຮັດໃຫ້ຄຸນນະພາບງານທີ່ໄດ້ອອກມາໜ້ອຍລົງ.
ນອນຫຼັບຍາກ
ກວ່າຈະນອນຫຼັບກໍຍາກ ຕື່ນຂຶ້ນມາຕອນກາງຄືນ ຫຼື ພະຍາຍາມນອນກໍບໍ່ຫຼັບ ອາການເຫຼົ່ານີ້ຫາກເກີດຕິດຕໍ່ກັນດົນໆ ຈະສົ່ງຜົນຕໍ່ທັງສຸຂະພາບຮ່າງກາຍ ແລະ ສຸຂະພາບຈິດ ສ່ວນໃຫຍ່ມັກຈະມາຈາກຄວາມຄຽດ ຄວາມກັງວົນຂອງເຮົາ.
ກິນບໍ່ປົກກະຕິ
ກິນຫຼາຍກວ່າປົກກະຕິ ຫຼື ກິນໜ້ອຍກວ່າປົກກະຕິ ເປັນສັນຍານຂອງຄວາມຄຽດຢ່າງໜຶ່ງທີ່ບອກກັບໂຕເຮົາວ່າ ເຮົາຄວນຕ້ອງຢຸດພັກຈາກກິດຈະກຳທີ່ເຮັດໃຫ້ເຮົາຄຽດ ແລະ ສິ່ງທີ່ເກີດຂຶ້ນໄດ້ຕະຫຼອດຄື ບໍ່ມັກກິນອາຫານມື້ຫຼັກ ກິນແຕ່ຂອງຫວ່າງ ຂະໜົມ ເຊິ່ງອັນນີ້ກໍເປັນສັນຍານບອກວ່າເຮົາຄວນພັກຜ່ອນໄດ້ເຊັ່ນກັນ.
ບໍ່ມີແຮງຈູງໃຈ
ໝົດກຳລັງໃຈ ບໍ່ຢາກລຸກໄປຮຽນ ຫຼື ລຸກໄປເຮັດວຽກ ເຊິ່ງປົກກະຕິເຄີຍຢາກເຮັດວຽກຢູ່ຕະຫຼອດ ຫຼື ລວມໄປເຖິງບໍ່ຢາກໄປພົບຜູ້ຄົນ ບໍ່ຢາກອອກໄປເຮັດສິ່ງທີ່ມັກ ອາການນີ້ສ່ວນໃຫຍ່ມາຈາກຄວາມເບື່ອ ຢູ່ໃນຈຸດທີ່ເບື່ອຫຼາຍຈົນບໍ່ຢາກເຮັດຫຍັງ.
ບໍ່ສະບາຍຕະຫຼອດ
ຮູ້ສຶກບໍ່ສະບາຍ ປວດຫົວ ປວດທ້ອງ ບໍ່ສະບາຍຕະຫຼອດເວລາ ອາການນີ້ເກີດຈາກຄວາມຄຽດ ຄວາມກັງວົນ ການພັກຜ່ອນບໍ່ພຽງພໍ ອາດສົ່ງຜົນຕໍລະບົບພູມຄຸ້ມກັນຂອງເຮົາ ເຮັດໃຫ້ບໍ່ສະບາຍງ່າຍ.
ຫາກເກີດອາການເຫຼົ່ານີ້ຂຶ້ນກັບໂຕເອງ ຄວນຫາເວລາໃຫ້ຕົວເອງໄດ້ພັກຜ່ອນ ລາງານອອກໄປທ່ຽວຜ່ອນຄາຍ ມີເວລາກັບໂຕເອງ ຫຼື ທາງທີ່ດີກໍຄວນປຶກສາແພດສະເພາະທາງຈະດີທີ່ສຸດ.
Hits: 2
