ວັນທີ 17 ສິງຫາ 2023 ທີ່ຜ່ານມາ ທ່ານນາງ ອຸຣີຣັດ ຈະເຣີນໂຕ, ຫົວໜ້າກົມຄວາມຮ່ວມມືລະຫວ່າງປະເທດ (TICA) ແລະ ທ່ານ ວິໂຣດ ສຸນດາຣາ ຫົວໜ້າກົມອາຊີ ປາຊີຟິກ ແລະ ອາຟຣິກາ ກະຊວງການຕ່າງປະເທດ ແຫ່ງ ສປປ ລາວ ເປັນປະທານຮ່ວມ ໃນກອງປະຊຸມຕິດຕາມການດຳເນີນງານພາຍໃຕ້ແຜນງານຄວາມຮ່ວມມືເພື່ອການພັດທະນາ ໄທ – ລາວ ໄລຍະ 3 ປີ ສະບັບທີ່ 2 (ປີ 2023 – 2025) ໂດຍມີ ທ່ານນາງ ມໍຣະກົດ ສີສະຫວັດ ເອກອັກຄະຣາຊະທູດ ທີ່ນະຄອນຫຼວງວຽງຈັນ ທ່ານ ອະທິປັດ ໂຣດຈະນະໄພບູນ, ກົງສຸນໃຫຍ່ ທີ່ແຂວງສະຫວັນນະເຂດ ເຂົ້າຮ່ວມກອງປະຊຸມດ້ວຍ.
ກອງປະຊຸມດັ່ງກ່າວມີຈຸດປະສົງເພື່ອຕິດຕາມຄວາມກ້າວໜ້າຂອງການດຳເນີນໂຄງການຄວາມຮ່ວມມືເພື່ອການພັດທະນາ ແລະ ການພັດທະນາຊັບພະຍາກອນມະນຸດຕາມຜົນກອງປະຊຸມຄວາມຮ່ວມມືທາງວິຊາການ ໄທ – ລາວ ຄັ້ງທີ່ 24 ເມື່ອວັນທີ 23 – 24 ສິງຫາ 2022 ທີ່ແຂວງຫຼວງພະບາງ ແລະ ສົ່ງເສີມກົນໄກການຕິດຕາມ ແລະ ປະເມີນຜົນການດຳເນີນງານຂອງທັງສອງຝ່າຍໃຫ້ມີປະສິດຕິພາບ ເພື່ອໃຫ້ເກີດຜົນໄດ້ຮັບຂອງການຮ່ວມມືທີ່ເປັນຮູບປະທຳ ເພື່ອສະໜັບສະໜູນການຟື້ນຟູເສດຖະກິດ ສັງຄົມ ແລະ ສິ່ງແວດລ້ອມ ຂອງ ສປປ ລາວ ພາຍຫຼັງສະຖານະການ COVID-19 ຕາມແຜນງານຄວາມຮ່ວມມືເພື່ອການພັດທະນາ ໄທ – ລາວ ໄລຍະ 3 ປີ (ປີ 2023 – 2025) ໃນ 7 ສາຂາ ໄດ້ແກ່: 1) ສາຂາກະສິກຳ; 2) ສາຂາການສຶກສາ ແລະ ກິລາ; (3) ສາຂາສາທາລະນະສຸກ; (4) ສາຂາການຄ້າ ອຸດສາຫະກຳ ແລະ ການທ່ອງທ່ຽວ; (5) ສາຂາສິ່ງແວດລ້ອມ; (6) ສາຂາພັດທະນາສັງຄົມ ແລະ ທຳມາພິບານ ແລະ (7) ສາຂາການພັດທະນາຊັບພະຍາກອນມະນຸດ.
ທີ່ປະຊຸມໄດ້ຮັບຊາບວ່າ ຈາກໂຄງການທີ່ກຳລັງຂັບເຄື່ອນຢູ່ ຈຳນວນ 35 ໂຄງການ ມີໂຄງການທີ່ສິ້ນສຸດໄລຍະເວລາການດຳເນີນງານ 1 ໂຄງການ ແລະ ຄາດວ່າຈະສິ້ນສຸດໄລຍະເວລາໂຄງການໃນປີ 2023 ອີກຈຳນວນ 5 ໂຄງການ ແລະ ມີພະນັກງານລັດຖະກອນລາວກຳລັງສຶກສາໃນສະຖາບັນການສຶກສາຕ່າງໆຂອງໄທ ຈຳນວນ 54 ຄົນ.
ທັງນີ້ ຝ່າຍລາວກ່າວຂອບໃຈທີ່ຝ່າຍໄທໄດ້ຈັດອົບຮົມຫຼັກສູດ English for Communication Course ໃຫ້ແກ່ພະນັກງານພະແນກການຕ່າງປະເທດແຂວງຕ່າງໆ ແລະ ໜ່ວຍງານທີ່ກ່ຽວຂ້ອງຂອງລາວ ລວມ 25 ຄົນ ເຊິ່ງເປັນປະໂຫຍດຢ່າງຫຼວງຫຼາຍຕໍ່ການພັດທະນາບຸກຄະລາກອນຂອງລາວ ແລະ ເປັນການສ້າງເຄືອຂ່າຍການຮ່ວມມື ຂອງພະນັກງານກະຊວງການຕ່າງປະເທດທັງສອງປະເທດ.
ນອກຈາກນີ້ ທີ່ປະຊຸມໄດ້ຮັບຊາບຂໍ້ມູນກ່ຽວກັບການດຳເນີນງານຄວາມຮ່ວມມືເພື່ອການພັດທະນາອື່ນໆ ໄດ້ແກ່: ໂຄງການອາສາສະໝັກເພື່ອນໄທ, ການຮ່ວມມືໄຕພາຄີ ແລະ ການຮ່ວມມືໃນຂອບອະນຸພາກພື້ນ ແລະ ພາກພື້ນຕ່າງໆ ເຊັ່ນ: ACMECS ທີ່ສົ່ງເສີມການພັດທະນາຢ່າງຍືນຍົງຕາມທີ່ໄທ ແລະ ສປປ ລາວ ໄດ້ຮ່ວມເປັນ “ຫຸ້ນສ່ວນຍຸດທະສາດເພື່ອການເຕີບໃຫຍ່ຂະຫຍາຍຕົວ ແລະ ການພັດທະນາຢ່າງຍືນຍົງ” ເມື່ອປີ 2022 ລວມທັງສົ່ງເສີມໃຫ້ ສປປ ລາວມີຄວາມພ້ອມແບບກວມລວມເພື່ອຫລຸດພົ້ນຈາກປະເທດດ້ວຍພັດທະນາ (Least Developed Countries – LDC) ໃນປີ 2026 ອີກທາງໜຶ່ງດ້ວຍ.
Hits: 31
