ສິ່ງສຳຄັນກ່ອນທີ່ເຮົາຈະວາງແຜນການເງິນ ເພື່ອປະເມີນການໃຊ້ຈ່າຍ ການອອມເງິນ ແລະ ການລົງທຶນຂອງຕົນເອງ ເຮົາຈະຕ້ອງໄດ້ເຫັນພາບລວມຂອງການໃຊ້ຈ່າຍ ຈຶ່ງຈະສາມາດວາງແຜນການເງິນໃໝ່ໃຫ້ເໝາະສົມ ແລະ ເປັນປະໂຫຍດກັບໂຕເອງຫຼາຍຍິ່ງຂຶ້ນ ໂດຍສິ່ງທີ່ເຮົາຈະຕ້ອງຮູ້ປະກອບມີ:
- ກວດເບິ່ງໜີ້ສິນທີ່ມີຢູ່: ໜີ້ສິນຖືເປັນສິ່ງສຳຄັນອັນດັບທຳອິດ ທີ່ເຮົາຄວນກວດສອບ ແລະ ຈັດການຢ່າງຮີບດ່ວນ ໂດຍສະເພາະໃນຊ່ວງໃກ້ຮອດທ້າຍປີແບບນີ້ ເຮົາຄວນເຮັດລາຍການໜີ້ສິນຢ່າງລະອຽດ ຈັດລຳດັບວ່າເຮົາມີໜີ້ສິນເຫຼືອຢູ່ຈັກປະເພດ ປະເພດໃດໝົດແລ້ວ ປະເພດໃດຍັງເຫຼືອຢູ່ ເພື່ອໃຫ້ເຮົາເບິ່ງເຫັນລາຍຈ່າຍປະຈຳເດືອນຊັດເຈນ ເຊິ່ງຈະຊ່ວຍໃຫ້ເຮົາວາງແຜນການເງິນໄດ້ຢ່າງມີປະສິດທິພາບຍິ່ງຂຶ້ນ.
- ກວດເບິ່ງຄ່າໃຊ້ຈ່າຍລາຍເດືອນ: ກວດເບິ່ງນິໄສການໃຊ້ຈ່າຍໃນແຕ່ລະເດືອນ ການເບິ່ງຄືນໃນວິທີການໃຊ້ເງິນຂອງໂຕເອງໃນປີທີ່ຜ່ານມາ ຈະເຮັດໃຫ້ເຮົາຮູ້ວ່າ ເຮົາໃຊ້ເງິນທັງໝົດໄປກັບຫຍັງ ເຊິ່ງຫຼາຍຄັ້ງເຮັດໃຫ້ເຮົາເຫັນນິໄສການໃຊ້ຈ່າຍຊ້ຳໆຂອງຕົວເອງ ສິ່ງທີ່ຈ່າຍແຕ່ລະເດືອນມັນສຳຄັນ ແລະ ຈຳເປັນບໍ່? ລາຍຈ່າຍເພື່ອຄວາມສຸກສ່ວນຕົວສູງເກີນໄປ ຫຼືຕ່ຳເກີນໄປ ມີເງິນຝາກປະຢັດ, ການລົງທຶນ ພຽງພໍແລ້ວບໍ່ ເມື່ອພວກເຮົາປະເມີນການໃຊ້ຈ່າຍຂອງຕົນເອງໂດຍລວມ ມັນຈະຊ່ວຍໃຫ້ພວກເຮົາວາງແຜນການເງິນໄດ້ດີຂຶ້ນ ແລະ ງ່າຍຕໍ່ການກຽມວາງແຜນການເງິນສຳລັບປີຕໍ່ໄປ.
- ກວດເບິ່ງເງິນຖ້ອນ: ຕະຫຼອດປີທີ່ຜ່ານມາເຮົາໄດ້ຖ້ອນເງິນໄວ້ຫຼືບໍ່? ເພາະເງິນຖ້ອນຈະເປັນໂຕວິເຄາະວ່າເຮົາເຮັດຕາມເປົ້າໝາຍການຖ້ອນໄວ້ໄດ້ຫຼືບໍ່ ຖ້າບໍ່ເຖິງເປົ້າ ເຮົາຈະຕ້ອງຖ້ອນອີກເທົ່າໃດ ແລະ ຕ້ອງຖ້ອນເພີ່ມອີກເທົ່າໃດເພື່ອໃຫ້ເປັນໄປຕາມເປົ້າໝາຍທີ່ຕັ້ງໄວ້.
- ກວດເບິ່ງຄວາມພ້ອມ ເງິນສຳຮອງໃນຍາມສຸກເສີນ: ຫຼາຍຄົນຄິດວ່າໂຕເອງວາງແຜນການເງິນມາຢ່າງດີແລ້ວ ແຕ່ຍັງລືມເລື່ອງທີ່ສໍາຄັນໄປເຊັ່ນ ການກວດເບິ່ງວ່າ ປະກັນສຸຂະພາບທີ່ພວກເຮົາມີ ມັນພຽງພໍສໍາລັບຄ່າໃຊ້ຈ່າຍທາງການແພດໃນອະນາຄົດຫຼທບໍ່? ເນື່ອງຈາກອາຍຸທີ່ເພີ່ມຂຶ້ນ ເຮັດໃຫ້ພວກເຮົາມີຄວາມສ່ຽງຕໍ່ການເປັນພະຍາດຫຼາຍຂຶ້ນ ເຮັດໃຫ້ເຮົາຕ້ອງຈ່າຍເງິນທີ່ບໍ່ໄດ້ຄາດຄິດໃນການປິ່ນປົວ ເຊິ່ງນີ້ເປັນຜົນເຮັດໃຫ້ເຮົາເສຍເງິນີ່ເຮົາຖ້ອນໄວ້. ສະນັ້ນ, ເຮົາຕ້ອງໝັ່ນກວດສອບ ແລະ ຫຼຸດຄວາມສ່ຽງໃນຊີວິດ ຖ້າເຮົາພໍມີເງິນເຫຼືອເຮົາກໍສາມາດເຮັດປະກັນສຸຂະພາບໂຣກຮ້າຍໄດ້ ຫຼື ຖ້າຮູ້ສຶກວ່າມັນໜ້ອຍກໍເຮັດປະກັນອຸບັດເຫດ ຫຼືປະກັນຊີວິດເພື່ອໄວ້ໃນອະນາຄົດ.
ການກວດເບິ່ງ 4 ຢ່າງນີ້ເປັນສິ່ງທີ່ເຮົາຕ້ອງເຮັດທຸກປີ ເພາະຈະຊ່ວຍໃຫ້ເຮົາວາງແຜນການເງິນໄດ້ຢ່າງເໝາະສົມ ເນື່ອງຈາກວ່າໃນ 1 ປີ ຊີວິດຂອງຄົນເຮົາມັກມີການປ່ຽນແປງເກີດຂຶ້ນ ໂດຍສະເພາະຖ້າສຸຂະພາບບໍ່ດີ ຄ່າໃຊ້ຈ່າຍອາດໝົດໄປກັບການເຂົ້າໂຮງໝໍ ຫຼື ບາງປີມີການລົງທຶນ ເຮັດໃຫ້ມີລາຍຮັບລາຍຈ່າຍຕະຫຼອດ ຈຶ່ງເປັນສິ່ງສຳຄັນທີ່ເຮົາຕ້ອງກວດເບິ່ງເປັນປະຈຳທຸກປີ ເພື່ອໃຫ້ການວາງແຜນການເງິນ ມີປະສິດທິພາບຍິ່ງຂຶ້ນ.