PM 2.5 ເປັນຝຸ່ນລະອອງຂະໜາດນ້ອຍ ທີ່ມີຄວາມອັນຕະລາຍຕໍ່ສຸຂະພາບຂອງຄົນເຮົາ ແລະ ຝຸ່ນລະອອງ PM 2.5 ນີ້ມັກຈະເກີດຂຶ້ນຫຼາຍໃນຊ່ວງລະດູໜາວ ຍ້ອນຫຍັງຈຶ່ງເກີດຂຶ້ນຫຼາຍໃນລະດູນີ້ ໄປຮູ້ພ້ອມໆກັນເລີຍ.
ຕາມປົກກະຕິແລ້ວ ອາກາດທີ່ຢູ່ເທິງພື້ນດິນ ຈະມີອຸນຫະພູມສູງກວ່າ ອາກາດທີ່ລອຍຢູ່ເທິງທ້ອງຟ້າ ແລະ ອາກາດຈະເຄື່ອນຕົວຈາກບໍລິເວນທີ່ອຸນຫະພູມສູງ ໄປຫາບໍລິເວນທີ່ມີອຸນຫະພູມຕ່ຳ (ພື້ນດິນ ຫາ ທ້ອງຟ້າ) ໝາຍຄວາມວ່າ ໃນພາວະປົກກະຕິ ອາກາດທີ່ຢູ່ເໜືອພື້ນດິນທີ່ມີອຸນຫະພູມສູງຈະເຄື່ອນຕົວຂຶ້ນໄປຫາຊັ້ນບັນຍາກາດທີ່ສູງຂຶ້ນເລື້ອຍໆ ແລະ ຈະພັດພາເອົາຝຸ່ນລະອອງ, ຄວັນ ແລະ ສິ່ງອື່ນໆ ທີ່ປະປົນຢູ່ໃນອາກາດລອຍຂຶ້ນໄປນຳ.
ແຕ່ໃນລະດູໜາວ ປະເທດເຮົາ ຈະໄດ້ຮັບຄວາມກົດອາກາດສູງຈາກທາງພາກເໜືອແຜ່ລົງມາປົກຄຸມ ເຮັດໃຫ້ອຸນຫະພູມໃນປະເທດຕ່ຳລົງ ສົ່ງຜົນໃຫ້ພື້ນດິນມີການປ່ອຍຄວາມຮ້ອນຢ່າງໄວວາ ດັ່ງນັ້ນ ຈຶ່ງເຮັດອາກາດທີ່ຢູ່ເໜືອພື້ນດິນຈຶ່ງເລີ່ມເຢັນລົງໄປນຳ, ເຮັດໃຫ້ການເຄື່ອນຕົວຂອງອາກາດເກີດການປ່ຽນແປງທີ່ຮຽກວ່າ ພາວະອຸນຫະພູມປີ້ນກັບ (Temperature inversion) ມີອາກາດຮ້ອນເຂົ້າໄປແຊກຊຶມຢູ່ທາງກາງກາຍເປັນເກາະໜາຄ້າຍຄືກັບເພດານຫ້ອງນ້ຳ ເຮັດໃຫ້ອາກາດບໍ່ໄຫຼວຽນຕາມປົກກະຕິ, ບໍ່ມີລົມ, ບໍ່ມີການຖ່າຍເທອາກາດ ຫຼື ທີ່ຮຽກກັນວ່າ “ອາກາດປິດ”.
ດັ່ງນັ້ນ, ມື້ທີ່ອາກາດປິດ ເຊິ່ງຈະເກີດໃນຊ່ວງໜ້າໜາວ ຈຶ່ງເປັນມື້ທີ່ມີຄ່າຝຸ່ນລະອອງ ຫຼື PM 2.5 ພຸ່ງສູງຂຶ້ນ ເພາະຝຸ່ນເຫຼົ່ານີ້ ຖືກເພດານເກາະປິດກັ້ນເອົາໄວ້ ບໍ່ໃຫ້ລອຍຂຶ້ນສູ່ຊັ້ນບັນຍາກາດ ຈຶ່ງສະສົມກັນຢູ່ເທິງທ້ອງຟ້າ ແລະ ບາງຄັ້ງ ກໍສາມາດເບິ່ງເຫັນໄດ້ດ້ວຍຕາເປົ່າ ເມື່ອເຖິງມື້ທີ່ອາກາດເປີດ ຫຼື ຄວາມກົດອາກາດສູງພັດຜ່ານໄປ ອາກາດສາມາດເຄື່ອນຕົວໄດ້ຕາມປົກກະຕິ ຝຸ່ນລະອອງຂະໜາດໜ້ອຍ PM 2.5 ກໍຈະເບົາບາງລົງ.